Dağ-mədən və metallurgiya sənayəsinin inkişafına dair Dövlət Proqramı - ŞƏRH

Prezident İlham Əliyev bildirib ki, aprel ayında imzaladığı sərəncam əsasında hazırlanmış "2027–2030-cu illərdə dağ-mədən (metal filizləri) və metallurgiya sənayəsinin inkişafına dair Dövlət Proqramı" ölkə iqtisadiyyatı, xüsusən qeyri-neft sektoru üçün böyük perspektivli sahə olub, beş mindən çox daimi iş yeri yaradacaq və dörd il ərzində – 2027–2030-cu illərdə – tam icra olunacaq. Dövlət başçısı ümumi iqtisadi artımın "Azəri-Çıraq-Günəşli" yatağının 30 ilə yaxın istismarda olması səbəbindən neft hasilatının azalması ilə məhdudlaşdığını, buna qarşılıq qeyri-neft sənayəsində son 8 ayda 5,4 faiz artım əldə edildiyini vurğulayıb.
Dağ-mədən sənayəsinin lazımi səviyyədə inkişaf etməməsinin səbəblərini iki qrupda izah edib: obyektiv səbəb kimi sovet dövründə aşkarlanmış bir çox yatağın işğal altında olan ərazilərdə yerləşməsini və Ermənistanın işğal dövründə təbii sərvətləri (qızıl, mis, molibden) talan etməsini, subyektiv səbəb kimi isə sovet hökumətinin bu sahəni prioritet saymayaraq əsas diqqəti neft sənayəsinə yönəltməsini göstərib. Bu baxımdan Kəlbəcər, Ağdərə və Zəngilan rayonlarındakı yataqların işə salınması, mövcud ehtiyatların müasir üsullarla yenidən dəqiqləşdirilməsi və Naxçıvanda yeni geoloji-kəşfiyyat işlərinin başlanması prioritet elan edilib.
İş dövlət xətti ("AzerGold") və özəl sektorun (o cümlədən xarici investorların) iştirakı ilə iki istiqamətdə aparılacaq; Balakəndəki "Filizçay" yatağı, Qərb Sənaye Parkı çərçivəsində "Daşkəsən" layihəsi əsasında zənginləşdirmə, pelet və briketləşdirilmiş dəmir zavodlarının qurulması, həmçinin maksimum ekoloji nəzarətin təmin olunması əsas istiqamətlər kimi qeyd olunub. Metallurgiya sahəsində 2030-cu ilədək alüminium istehsalının 100 min tona çatdırılması hədəflənir. Prezident proqramın maliyyə təminatının artıq müəyyənləşdirildiyini, dövlətin investor iştirakından asılı olmayaraq onu icra edəcəyini, lakin yerli və xarici investorlar üçün əlverişli şəraitin yaradıldığını bildirib. Yekun olaraq proqramın yeni sənaye istiqaməti formalaşdıracağını, işğaldan azad olunmuş ərazilərdə məşğulluğu artıracağını, ixrac potensialını gücləndirəcəyini və gözlənilən illik müsbət maliyyə effektinin 1 milyard manatdan çox olacağını vurğulayıb.

Kənan Quliyev
YAP Laçın rayon təşkilatının məsləhətçisi