Enerji və nəqliyyat imkanları Azərbaycanın yeni iqtisadi inkişaf xəritəsini formalaşdırır - ŞƏRH

Azərbaycanın son illərdə həyata keçirdiyi iqtisadi siyasətin mühüm istiqamətlərindən biri ölkənin mövcud enerji potensialından səmərəli istifadə etməklə yanaşı, yeni inkişaf sahələrinin yaradılması və regional iqtisadi mövqeyinin daha da gücləndirilməsidir. II Azərbaycan Beynəlxalq İnvestisiya Forumu çərçivəsində keçirilən tədbirdə Prezident İlham Əliyevin çıxışı bu baxımdan Azərbaycanın qarşıdakı illər üçün müəyyən etdiyi əsas prioritetləri aydın şəkildə ortaya qoydu.
Dövlət başçısının çıxışında Azərbaycanın enerji potensialı xüsusi diqqət çəkən məsələlərdən biri oldu. Prezident İlham Əliyev bildirib ki, yalnız Xəzər dənizinin Azərbaycan sektorunda 157 giqavatlıq enerji potensialı mövcuddur. Bu rəqəm Azərbaycanın gələcəkdə bərpaolunan enerjinin istehsalı və ixracı sahəsində malik olduğu imkanların miqyasını göstərir. Quruda Günəş və külək elektrik stansiyalarının fəaliyyət göstərməsi isə bu istiqamətdə artıq praktiki addımların atıldığını nümayiş etdirir.
Azərbaycanın enerji siyasətində əsas məqsədlərdən biri elektrik enerjisi istehsalında təbii qazdan istifadənin tədricən minimuma endirilməsi və mövcud qaz ehtiyatlarının daha çox ixrac məqsədlərinə yönəldilməsidir. Bu yanaşma bir tərəfdən bərpaolunan enerji mənbələrinin inkişafını sürətləndirir, digər tərəfdən isə Azərbaycanın enerji resurslarından daha səmərəli istifadə etməsinə imkan yaradır.
Xəzər dənizinin külək enerjisi potensialının geniş olması Azərbaycanın yaşıl enerji gündəliyində mühüm üstünlüklər yaradır. Bu potensialın reallaşdırılması üçün enerji istehsalı ilə yanaşı, ötürücü xətlərin, enerji saxlanc sistemlərinin və digər infrastrukturun inkişaf etdirilməsi də vacibdir. Prezidentin çıxışında da Azərbaycanın yeni ötürücü xətlər inşa etdiyi və mövcud şəbəkəni genişləndirdiyi bildirilib.
Enerji ilə yanaşı, Azərbaycanın iqtisadi inkişafında nəqliyyat və logistika infrastrukturu da xüsusi əhəmiyyət daşıyır. Dövlət başçısının qeyd etdiyi kimi, ölkənin tranzit imkanlarının genişləndirilməsi üçün uzun illər ərzində böyük həcmdə investisiyalar yatırılıb. Dəmir yolları, dəniz limanları, hava yolu ilə yükdaşıma infrastrukturu və avtomobil yollarının inkişafı Azərbaycanın regional nəqliyyat sistemindəki rolunu gücləndirən əsas amillərdəndir.
Bu siyasətin əsas məqsədi Azərbaycanın coğrafi mövqeyindən maksimum səmərəli istifadə etməkdir. Azərbaycan Avropa ilə Asiya arasında yerləşən mühüm nəqliyyat marşrutlarının üzərində qərarlaşır. Şərq-Qərb və Şimal-Cənub istiqamətlərində formalaşan bağlantılar ölkəyə beynəlxalq yükdaşımaların inkişafında əlavə imkanlar yaradır.

Dəniz nəqliyyatı sahəsində də mühüm işlər görülür. Azərbaycanın dəniz limanının genişləndirilməsi ölkənin tranzit potensialının artırılmasına xidmət edir. Dənizə birbaşa çıxışı olmayan Mərkəzi Asiya ölkələri ilə Avropa bazarları arasında yükdaşımaların həyata keçirilməsində Azərbaycan ərazisindən keçən marşrutların əhəmiyyəti getdikcə artır. Bu isə nəqliyyat infrastrukturu ilə yanaşı, logistika, anbar, gömrük və rəqəmsal xidmətlər üçün də yeni imkanlar formalaşdırır.
Müasir dövrdə nəqliyyat bağlantılarının yalnız fiziki infrastrukturla məhdudlaşmadığı da nəzərə alınmalıdır. Rəqəmsallaşma, gömrük prosedurlarının sadələşdirilməsi, yüklərin elektron izlənməsi və logistika proseslərinin sürətləndirilməsi beynəlxalq tranzit marşrutlarının rəqabət qabiliyyətini müəyyən edən əsas amillərə çevrilib. Azərbaycan da bu istiqamətdə öz imkanlarını genişləndirərək nəqliyyat dəhlizlərinin daha səmərəli fəaliyyət göstərməsinə çalışır.
Enerji və nəqliyyat sahələrinin paralel inkişafı Azərbaycanın iqtisadi potensialının şaxələndirilməsi baxımından da mühüm əhəmiyyət daşıyır. Bərpaolunan enerji mənbələrinin genişləndirilməsi yeni investisiyaların cəlb olunmasına, yeni texnologiyaların tətbiqinə və müasir sənaye sahələrinin inkişafına şərait yarada bilər. Nəqliyyat və logistika infrastrukturu isə Azərbaycanın bu iqtisadi imkanlarını regional və qlobal bazarlara çıxarmaq üçün mühüm vasitədir.
II Azərbaycan Beynəlxalq İnvestisiya Forumu çərçivəsində Prezident İlham Əliyevin səsləndirdiyi fikirlər göstərir ki, Azərbaycanın iqtisadi inkişaf strategiyasında əsas məqsədlərdən biri mövcud üstünlükləri yeni imkanlarla birləşdirməkdir. Enerji, nəqliyyat, logistika və rəqəmsal bağlantıların inkişafı ölkənin investisiya potensialının genişləndirilməsi ilə yanaşı, Azərbaycanın regional iqtisadi əlaqələr sistemində rolunun daha da möhkəmlənməsinə xidmət edən mühüm istiqamətlərdir.

Hacı Məmmədov
YAP Kəngərli rayon təşkilatının fəalı