Azərbaycan Respublikası və Kamboca Krallığı arasında ikitərəfli münasibətlər - ŞƏRH

12 oktyabr 2026-cı il tarixində Azərbaycan Respublikasının Prezidenti İlham Əliyev və Azərbaycanda rəsmi səfərdə olan Kamboca Krallığının Baş naziri Hun Manet mətbuata bəyanatlarla çıxış ediblər. Liderlərin görüşü və ardınca səsləndirilən bəyanatlar iki ölkə arasında siyasi dialoqun dərinləşməsi, iqtisadi əməkdaşlığın genişləndirilməsi və bir çox qlobal məsələlərdə qarşılıqlı dəstəyin gücləndirilməsi baxımından mühüm əhəmiyyət daşıyır.
Cənab Prezident çıxışı zamanı Kambocanın Baş naziri Hun Maneti Azərbaycanda görməkdən məmnunluq duyduğunu ifadə edərək, bu səfərin iki ölkə arasında mövcud olan dostluq münasibətlərinin bariz nümunəsi olduğunu vurğulayıb. Ölkə başçısı 12 il əvvəl Kambocanın keçmiş Baş naziri, hazırda Senatın sədri olan rəsmi şəxslə Azərbaycanda keçirdiyi görüşü xatırladaraq, aparılan siyasətin varislik xarakteri daşıdığını qeyd edib.
Azərbaycan və Kamboca BMT, Qoşulmama Hərəkatı və Asiya ilə Avropa arasında əməkdaşlıq platformaları (o cümlədən AQEM Zirvə görüşü) çərçivəsində sıx əməkdaşlıq edir, beynəlxalq hüququn norma və prinsiplərinə, həmçinin beynəlxalq təşkilatların qərarlarına sadiqlik nümayiş etdirirlər. İkitərəfli münasibətlərin inkişafında coğrafi məsafənin hər hansı bir maneə törətmədiyini vurğulayan Prezident İlham Əliyev ticarət və investisiya sahələrində geniş potensialın mövcudluğunu diqqətə çatdırıb: Tərəflər ticarət və sərmayə qoyuluşu sahəsində praktiki addımlar atmaq, əməkdaşlığın mexanizmlərini formalaşdırmaq üçün birgə işçi qrupu təsis ediblər.
Hər iki ölkənin qanunvericilik orqanlarında fəaliyyət göstərən dostluq qrupları ikitərəfli münasibətlərin möhkəmlənməsinə mühüm töhfə verir. Bəyanat zamanı hər iki ölkənin qarşılaşdığı ümumi təhlükə və çağırışlardan biri də mina problemi olub. Prezident İlham Əliyev qeyd edib ki, həm Azərbaycan, həm də Kamboca keçmiş münaqişələrin mirası olan minalardan güclü əziyyət çəkib və çəkməkdədir:
İşğaldan azad edilmiş ərazilərdə həyata keçirilən genişmiqyaslı bərpa-quruculuq işləri və "Böyük Qayıdış" Proqramı çərçivəsində görülən işlər barədə məlumat verilib.
Bu istiqamətdə təcrübə, bilik, praktiki bacarıqların mübadiləsi və mütəxəssislər üçün təlimlərin keçirilməsinin əhəmiyyəti vurğulanıb.
Baş nazir Hun Manetin Azərbaycana rəsmi səfəri və liderlərin mətbuata verdiyi birgə bəyanatlar Asiya regionu ilə əlaqələrin şaxələndirilməsi istiqamətində atılan növbəti strateji addım kimi qiymətləndirilir. Səfər çərçivəsində əldə olunan razılaşmalar, yaradılan işçi qrupları və qarşılıqlı dəstək prinsipləri Azərbaycan ilə Kamboca arasında tərəfdaşlığın gələcək illərdə daha da dərinləşəcəyindən xəbər verir.
Azərbaycan ilə Kamboca arasında qurulan əməkdaşlıq körpüsü göstərir ki, coğrafi məsafələr dövlətlər arasında dostluğun, qarşılıqlı etimadın və ortaq maraqların reallaşmasına maneə deyil. Cənab Prezident İlham Əliyevin və Baş nazir Hun Manetin görüşü iki ölkənin münasibətlərində yeni imkanların araşdırılması, siyasi dialoqun möhkəmləndirilməsi və iqtisadi əlaqələrin genişləndirilməsi baxımından əhəmiyyətli addım kimi diqqət çəkir.
Dövlətlər arasında münasibətlərin əsl dəyəri imzalanan sənədlərlə yanaşı, onların xalqların həyatında yaratdığı müsbət dəyişikliklərlə ölçülür.* Azərbaycan–Kamboca əməkdaşlığının gələcək inkişafı da məhz qarşılıqlı etimadın konkret layihələrə, siyasi anlaşmanın iqtisadi tərəfdaşlığa, bugünkü təşəbbüslərin isə sabahın davamlı nəticələrinə çevrilməsindən asılıdır.
Beləliklə, Bakıdan verilən mesaj aydındır: dostluq və əməkdaşlıq üçün məsafələr maneə deyil, qarşılıqlı iradə və ortaq məqsədlər isə yeni imkanların qapısını açan əsas amillərdir. Azərbaycan və Kamboca arasında inkişaf edən münasibətlərin gələcəkdə daha geniş əməkdaşlıq sahələrini əhatə etməsi hər iki ölkə üçün yeni perspektivlər yarada bilər.

Əlağa Ağayev
YAP Xocalı rayon təşkilatının sədr müavini