Beynəlxalq əlaqələrin və yeni əməkdaşlıq üfüqləri - ŞƏRH

Müasir dünyada dövlətlər arasında qarşılıqlı etimada, siyasi dialoqa və ortaq maraqlara əsaslanan münasibətlərin inkişaf etdirilməsi beynəlxalq əməkdaşlığın əsas istiqamətlərindən biridir. Qlobal siyasi və iqtisadi proseslərin sürətlə dəyişdiyi bir dövrdə ölkələr arasında əlaqələrin genişləndirilməsi, yeni tərəfdaşlıqların qurulması və qarşılıqlı faydalı əməkdaşlıq imkanlarının reallaşdırılması xüsusi əhəmiyyət daşıyır. Azərbaycan Respublikasının Prezidenti İlham Əliyevin həyata keçirdiyi çoxşaxəli xarici siyasət də məhz bu məqsədlərə, ölkəmizin beynəlxalq mövqeyinin möhkəmləndirilməsinə və yeni əməkdaşlıq imkanlarının yaradılmasına xidmət edir.

2026-cı il oktyabrın 12-də Kamboca Krallığının Baş naziri Hun Manetin Azərbaycana rəsmi səfəri və Prezident İlham Əliyevlə keçirilən görüşlər iki ölkə arasında münasibətlərin inkişafı baxımından mühüm hadisə kimi diqqət çəkir. Səfər çərçivəsində dövlət başçıları arasında keçirilən görüşlərdən sonra mətbuata verilən bəyanatlar Azərbaycan-Kamboca əlaqələrinin gələcək istiqamətlərini, iqtisadi əməkdaşlıq perspektivlərini və beynəlxalq təşkilatlar çərçivəsində tərəfdaşlığın əhəmiyyətini bir daha ortaya qoydu.
Prezident İlham Əliyev bəyanatında Azərbaycan ilə Kamboca arasında mövcud olan dostluq münasibətlərinə toxunaraq, iki ölkənin beynəlxalq təşkilatlarda fəal əməkdaşlıq etdiyini və bir-birini dəstəklədiyini vurğulayıb. Birləşmiş Millətlər Təşkilatı, Qoşulmama Hərəkatı və Asiyada Qarşılıqlı Fəaliyyət və Etimad Tədbirləri üzrə Müşavirə (AQEM) çərçivəsində əməkdaşlıq iki ölkənin beynəlxalq münasibətlər sistemində qarşılıqlı fəaliyyətinin mühüm istiqamətlərindəndir. Azərbaycanın xarici siyasətinin əsas xüsusiyyətlərindən biri müxtəlif regionlarla əlaqələrin inkişafına, qarşılıqlı hörmətə və dövlətlərin suverenliyinə əsaslanan münasibətlərin qurulmasına önəm verilməsidir. Ölkəmiz həm regional, həm də qlobal miqyasda etibarlı tərəfdaş kimi mövqeyini möhkəmləndirməyə çalışır. Asiya və Avropa arasında əlverişli coğrafi mövqeyə malik olan Azərbaycan müxtəlif dövlətlər və iqtisadi məkanlar arasında əlaqələrin genişləndirilməsində mühüm rol oynayır.
Kamboca Baş nazirinin Azərbaycana səfəri bu baxımdan Cənub-Şərqi Asiya ilə münasibətlərin inkişaf etdirilməsi üçün yeni imkanlar yaradır. İki ölkə arasında diplomatik münasibətlərin otuz ildən artıq tarixə malik olması mövcud əlaqələrin davamlı inkişafı üçün mühüm zəmin təşkil edir. Prezident İlham Əliyevin bəyanatında əvvəlki illərdə qurulmuş münasibətlərin davam etdirilməsinə və yeni əməkdaşlıq istiqamətlərinin müəyyənləşdirilməsinə xüsusi diqqət yetirilməsi də bunu təsdiqləyir.Dövlət başçısının bəyanatında diqqət çəkən əsas məsələlərdən biri Azərbaycan ilə Kamboca arasında ticarət və investisiya əlaqələrinin genişləndirilməsidir. Prezident İlham Əliyev qeyd edib ki, iki ölkə arasında siyasi münasibətlər yaxşı səviyyədə olsa da, ticarət dövriyyəsi hələlik arzuolunan səviyyədə deyil. Bu səbəbdən mövcud potensialın araşdırılması, biznes əlaqələrinin genişləndirilməsi və qarşılıqlı sərmayə imkanlarının müəyyənləşdirilməsi qarşıda duran əsas vəzifələrdəndir. u məqsədlə ticarət və investisiya əməkdaşlığının praktiki məsələləri ilə məşğul olacaq birgə işçi qrupunun yaradılması barədə razılıq əldə edilib. Belə bir mexanizmin formalaşdırılması iki ölkənin sahibkarları arasında əlaqələrin gücləndirilməsinə, qarşılıqlı bazar imkanlarının öyrənilməsinə və konkret iqtisadi layihələrin hazırlanmasına kömək edə bilər.
Prezident İlham Əliyev ölkələr arasında coğrafi məsafənin müasir dövrdə əməkdaşlığa ciddi maneə olmamalı olduğunu, əsas məsələlərdən birinin isə qarşılıqlı məlumatlılığın artırılması olduğunu diqqətə çatdırıb. Bu fikir müasir beynəlxalq iqtisadi münasibətlərin mahiyyətini əks etdirir. Rəqəmsal texnologiyalar, müasir nəqliyyat imkanları və biznes əlaqələri coğrafi məsafələrin yaratdığı çətinlikləri əhəmiyyətli dərəcədə azalda bilər.
Səfər çərçivəsində keçirilən biznes forumunun da məhz bu məqsədə xidmət etməsi nəzərdə tutulub. Azərbaycan və Kamboca şirkətlərinin bir araya gəlməsi, iqtisadi prioritetlər və investisiya imkanları barədə məlumat mübadiləsi aparması gələcəkdə birgə layihələrin reallaşdırılmasına şərait yarada bilər. Sənaye, birgə istehsal müəssisələrinin yaradılması, turizm, nəqliyyat və rəqəmsal transformasiya əməkdaşlıq üçün perspektivli istiqamətlər kimi diqqətə çatdırılıb.
Azərbaycan-Kamboca münasibətlərinin inkişafında təhsil və humanitar əməkdaşlıq da mühüm yer tutur. Prezident İlham Əliyev bəyanatında sovet dövründə yüzlərlə kambocalı tələbənin Azərbaycanda təhsil aldığını xatırladaraq, bu ənənənin bərpa olunmasının vacibliyini vurğulayıb. Tələbə mübadiləsinin genişləndirilməsi, təqaüd imkanlarının artırılması və təhsil müəssisələri arasında əlaqələrin yaradılması iki xalq arasında münasibətlərin daha da yaxınlaşmasına töhfə verə bilər.
Səfər çərçivəsində əldə olunmuş razılaşmaların konkret layihələrə çevrilməsi Azərbaycan və Kamboca arasında iqtisadi əlaqələrin daha da inkişafına şərait yarada bilər. Birgə işçi qrupunun fəaliyyəti, biznes dairələri arasında birbaşa təmaslar və yeni əməkdaşlıq istiqamətlərinin araşdırılması bu prosesdə mühüm rol oynayacaq.
Bu səfər Azərbaycanın müxtəlif regionlarla əlaqələrini genişləndirmək, beynəlxalq əməkdaşlıq imkanlarını artırmaq və ölkəmizin etibarlı tərəfdaş kimi mövqeyini möhkəmləndirmək siyasətinin davamı kimi qiymətləndirilə bilər. Prezident İlham Əliyevin bəyanatı bir daha göstərir ki, müasir beynəlxalq münasibətlərdə siyasi dialoqla yanaşı, iqtisadi tərəfdaşlıq, humanitar əməkdaşlıq və ortaq problemlərin birgə həlli də böyük əhəmiyyət daşıyır.
Azərbaycanın qarşılıqlı faydaya, dostluğa və əməkdaşlığa əsaslanan xarici siyasəti yeni tərəfdaşlıqların qurulması və mövcud əlaqələrin dərinləşdirilməsi üçün geniş imkanlar yaradır. Kamboca ilə münasibətlərin inkişafı da bu baxımdan ölkəmizin beynəlxalq əlaqələrinin şaxələndirilməsinə və yeni əməkdaşlıq üfüqlərinin açılmasına xidmət edir.

Hacı Məmmədov
YAP Kəngərli rayon təşkilatının fəalı