Sabunçu rayonunda şəhidlərin anım tədbirləri davam edir

Sabunçu rayonunda Vətən müharibəsi şəhidləri Hüseynov Xaliq Kamil oğlunun və Əliyev Saleh Namiq oğlunun ildönümləri münasibətilə anım tədbirləri keçirilib.

Şəhidlərin məzarları ziyarət olunub, məzarların önünə gül dəstələri düzülüb, əziz xatirələri dərin ehtiramla yad edilib, ruhlarına dualar oxunub.

Anım tədbirlərində YAP Sabunçu rayon təşkilatının sədr müavini Zülfüqar Cəfərov, aparatının məsləhətçisi Altun İbrahimov, Sabunçu Rayon İcra Hakimiyyəti başçısı aparatının Müharibə iştirakçıları və şəhid ailələri ilə işin təşkili sektorunun müdiri Fəqan Əlizadə, Sabunçu Rayon İcra Hakimiyyəti başçısının Nardaran qəsəbəsi üzrə nümayəndəsi Zülfüqar Mirzəliyev, Sabunçu Rayon İcra Hakimiyyəti başçısının Zabrat qəsəbəsi üzrə nümayəndəsi Həmid Qalayev, Nardaran bələdiyyəsinin sədri Əlihüseyn Ağayev, Zabrat bələdiyyəsinin sədri Nailə Nəsirova, şəhidlərin ailə üzvləri və qəsəbə sakinləri iştirak ediblər.

Qeyd edək ki, Xaliq Hüseynov Bakı şəhərində anadan olub. Orta təhsilini Sabunçu rayonu, Nardaran qəsəbəsi 295 nömrəli tam orta ümumtəhsil məktəbdə alıb. 2020-ci il 16 oktyabr tarixində Suqovuşan qəsəbəsi istiqamətində gedən döyüşlərdə qəhrəmancasına şəhid olub. Ölümündən sonra Azərbaycan Respublikasının Prezidenti İlham Əliyevin Sərəncamları ilə “Vətən uğrunda”, “Cəsur döyüşçü” və “Suqovuşanın azad olunmasına görə” medalları ilə təltif olunub.

Saleh Əliyev 1992-ci il avqustun 18-də Bakı şəhərində anadan olub. 2007-ci ildə Sabunçu rayonu, Zabrat qəsəbəsində yerləşən şəhid Elxan Misirxanov adına 71 nömrəli tam orta ümumtəhsil məktəbini bitirib. Füzuli rayonu istiqamətində döyüş tapşırığını yerinə yetirərkən qəhrəmancasına şəhid olub. Ölümündən sonra Azərbaycan Respublikasının Prezidenti İlham Əliyevin Sərəncamları ilə “Vətən uğrunda”, “Füzulinin azad olunmasına görə” və “Xocavəndin azad olunmasına görə” medalları ilə təltif olunub.