Dövlət suverenliyinin tam təntənəsi: 23 saatlıq zəfərlə yazılan tarixi ədalət və zirvəyə ucalan milli qürur - ŞƏRH

Müasir Azərbaycanın dövlətçilik salnaməsi 2023-cü ilin sentyabr ayında özünün ən şanlı, həlledici və tarixi zəfər səhifəsinə imza atdı. 2020-ci ilin 44 günlük Vətən müharibəsində qazanılmış Böyük Qələbədən sonra Azərbaycanın Qarabağ iqtisadi rayonunda hələ də qanunsuz olaraq qalan Ermənistan silahlı qüvvələrinin birləşmələri, habelə qanunsuz xunta rejimi regionda dayanıqlı sabitliyə və təhlükəsizliyə ən böyük maneə olaraq qalmaqda idi. İllər boyu davam edən sülh çağırışlarına, diplomatik cəhdlərə və xəbərdarlıqlara baxmayaraq, təxribatlarını davam etdirən separatçı ünsürlərin minalama fəaliyyətləri və hərbi hücumları bardağı daşıran son damla oldu. Azərbaycan Respublikasının Prezidenti, Müzəffər Ali Baş Komandan İlham Əliyevin rəhbərliyi və qətiyyətli əmri ilə 19–20 sentyabr 2023-cü il tarixlərində həyata keçirilən lokal antiterror tədbirləri bu təhlükəyə birdəfəlik son qoydu. Dövlət başçısının həmin tarixi zəfərdən sonra xalqa müraciətində qeyd etdiyi kimi: “Bir gündən az davam edən antiterror əməliyyatı nəticəsində separatçıların kökü kəsildi, Azərbaycan öz dövlət suverenliyini tam təmin etdi, beynəlxalq hüquq zəfər çaldı və Azərbaycan öz gücünü bir daha göstərdi.”
Cəmi 23 saat 43 dəqiqə davam edən bu unikal hərbi əməliyyat yüksək peşəkarlıq, misilsiz dəqiqlik və dövlət iradəsi ilə icra olundu. Şanlı Azərbaycan Ordusunun rəşadətli zabit və əsgərləri mülki əhaliyə, sülhpərvər sakinlərdən ibarət yaşayış məntəqələrinə və mülki infrastruktura heç bir zərər vurmadan, yalnız legitim hərbi hədəfləri, düşmənin otuz il ərzində qurduğu mürəkkəb istehkamları, komanda məntəqələrini və ağır artilleriya nöqtələrini yüksək dəqiqlikli müasir silahlarla sıradan çıxardı. Ağır itkilər verən, idarəetmə sistemini tamamilə itirən və müqavimət göstərmək gücündə olmadığını anlayan separatçılar ağ bayraq qaldırmağa, tərksilah olunmağa və Azərbaycan dövlətinin irəli sürdüyü bütün sərt şərtləri qeyd-şərtsiz qəbul etməyə məcbur oldular. Bu hərbi-strateji əməliyyat dünya hərb tarixində ən qısa müddətdə, minimum itkilərlə və ən yüksək dəqiqliklə tamamlanan parlaq hərbi uğurlardan biri kimi dərsliklərə daxil oldu.
Lokal antiterror tədbirlərinin müasir tariximizdəki və gələcək nəsillər qarşısındakı strateji əhəmiyyəti onun tarixi nəticələrində özünü bütün əzəməti ilə büruzə verir. Məhz bu qələbə ilə Azərbaycan Respublikası ölkənin bütün ərazisində öz konstitusiya quruluşunu, qanunlarının aliliyini və dövlət suverenliyini 100 faiz təmin etdi. Ərazimizdə mövcud olan qanunsuz hərbi birləşmələrin ləğvi, separatçı rejimin çökməsi və onun rəhbərlərinin ədalət mühakiməsi qarşısına çıxarılması tarixi ədalətin təntənəsi oldu. 2023-cü ilin 15 oktyabrında Prezident İlham Əliyevin Xankəndi, Xocalı, Xocavənd, Əsgəran və Ağdərədə Azərbaycan Respublikasının üçrəngli dövlət bayrağını ucaltması, noyabrın 8-də isə Xankəndi şəhərinin mərkəzi meydanında tarixi Hərbi Paradın keçirilməsi suverenliyimizin tam bərpasının və bölünməzliyinin əbədi rəmzinə çevrildi. Beynəlxalq hüququn norma və prinsipləri, BMT Nizamnaməsi və Azərbaycanın ərazi bütövlüyü kağızlar üzərində deyil, dövlətimizin qüdrəti, iqtisadi müstəqilliyi və ordumuzun yenilməz gücü ilə birbaşa döyüş meydanında bərpa olundu.
Bu gün Qarabağ və Şərqi Zəngəzur tamamilə azad, təhlükəsiz və suveren Azərbaycan torpağı kimi özünün ən möhtəşəm quruculuq və inkişaf erasını yaşayır. Separatizmin və qanunsuz hərbi mövcudluğun kökünün kəsilməsi regionda davamlı sülhün, təhlükəsizliyin, genişmiqyaslı bərpa-quruculuq işlərinin və keçmiş məcburi köçkünlərin öz baba yurdlarına qayıdışını nəzərdə tutan "Böyük Qayıdış" proqramının sürətlə gerçəkləşməsinə tam zəmin yaratdı. 2023-cü ilin sentyabr Zəfəri Azərbaycanın müstəqillik dastanında tarixi ədalətin tam və yekun qələbəsi kimi gələcək nəsillərə müraciət edən sarsılmaz dövlətçilik təntənəsidir. Bu zəfər bir daha sübut etdi ki, Azərbaycan dövləti öz milli maraqlarını qorumağa, öz suverenliyini təmin etməyə və istənilən təhdidi anında dəf etməyə qadir olan güclü və suveren bir dövlətdir.

Kərimli Elvin
Yap Ordubad Rayon Təşkilatının əməkdaşı