YAP-ın yaranma tarixindən 30 il ötür… TƏHLİL

Partiyamızın fəaliyyəti, ideyaları, apardığı siyasət gənc nəsil üçün də cəlbedicidir və bu, çox müsbət haldır. Bu, onu göstərir ki, Azərbaycanda bundan sonra da uzunmüddətli, dayanıqlı inkişaf təmin olunacaq və partiyanın təbliğ etdiyi, bəyan etdiyi prinsiplər bu gün xalq tərəfindən tam dəstəklənir.

İlham ƏLİYEV
Azərbaycan Respublikasının Prezidenti,
Yeni Azərbaycan Partiyasının Sədri

Bu gün ölkəmizin tarixində mühüm yeri olan, bütün dünya arenasında inkişafı ilə seçilən, mötəbər tribunalardan öz sözünü deyən Yeni Azərbaycan Partiyasının yaranmasının 30-cu ildönümünü qeyd edirik. Təbii ki, bu hadisə hər bir azərbaycanlını sevindirir, qürurlandırır. Tarixin səhifələrinə diqqət yetirsək görərik ki, Yeni Azərbaycan Partiyası respublikada çox çətin və keşməkeşli, müstəqil Azərbaycan dövlətçiliyinin məhv olmaq təhlükəsi ilə qarşılaşdığı bir zamanda yaradıldı. Düz 30 il əvvəl - 1992-ci ilin noyabr ayının 21-də böyük əziyyətlə yaradılan YAP cəmi altı ay sonra hakimiyyətə gəldi və tez bir zamanda ölkənin aparıcı iqtidar partiyasına çevrildi. "Bütünlüklə bütün fəaliyyətimi yalnız və yalnız Azərbaycanın müstəqilliyinin qorunub-saxlanmasına həsr edəcəyəm" - deyən dahi rəhbər Heydər Əliyev ilk növbədə bütün diqqətini ölkədə anarxiyanın, özbaşınalığın, xaosun aradan qaldırılmasına, sabitliyin bərpasına, vətəndaş həmrəyliyinin yaradılmasına yönəltdi. Ölkədəki mövcud durumu, ictimai-siyasi prosesləri hər zaman uzaqgörənliklə diqqətdə saxlayan Ulu öndər daim çıxışlarında bunu vurğulayırdı: - “Respublikada ictimai-siyasi sabitlik, sağlam ictimai-siyasi mühit olmasa, heç bir sosial-iqtisadi proqramın inkişafından, yaxud problemlərin həll edilməsindən söhbət gedə bilməz”.Məhz buna görə də O, Azərbaycanın güclü dövlətçilik xəttini, onun siyasi və iqtisadi əsaslarını yaratmaqla yanaşı, Azərbaycan xalqının milli intibah və inkişafının təməl sütunu olan bir ideyanın - azərbaycançılıq məfkurəsinin əsasını qoydu. Dövlət müstəqilliyini elan etdikdən sonra Azərbaycanın qarşısında bu müstəqilliyi qoruyub saxlamaq, dövlətçiliyimizi inkişaf etdirmək, demokratik islahatlar aparmaq kimi mühüm vəzifələr dururdu. Lakin müstəqilliyimizin elə ilk günlərindən Azərbaycanda baş verən ictimai-siyasi hadisələr - daxili çəkişmələr, soydaşlarımızın öz dədə-baba ocaqlarından qovulması, torpaqlarımızda gedən qanlı döyüşlər, xarici qüvvələrin müdaxiləsi və s. nəticəsində ölkəmiz böyük əziyyətlər hesabına yenicə əldə etdiyi müstəqilliyini itirmək və Azərbaycan Demokratik Respublikasının acı taleyini yaşamaq təhlükəsi qarşısında qalmışdı...Məhz həmin illərdə böyük siyasətçi Heydər Əliyev Bakıya gəldiyi zaman hakimiyyətdə olan qüvvələr onun xalq arasında olan nüfuzundan, ona bəslənən sonsuz məhəbbətdən, dərin zəkaya malik olan böyük siyasəti olmasından qorxuya düşərək hər vasitə ilə ona maneçilik törətməyə çalışdılar. Ulu Öndər Heydər Əliyev fəaliyyətini davam etdirmək, xalqla bir olmaq, onunla əlaqə yaratmaq üçün doğulduğu doğma yurda-Naxçıvana getməyi lazım bildi. Demək olar ki, o, Naxçıvanın bütün bölgələrində insanlarla görüşlər keçirdi. Özü demiş, bu görüşlər insanlar üçün böyük dəstək, təsəlli, arzuolunan istək oldu.Çox keçmir ki, nicat yolunu yalnız və yalnız Heydər Əliyevdə görən xalq onu Naxçıvan Muxtar Respublikasının, eləcə də Azərbaycan Respublikasının parlamentinə deputat seçirlər. Beləliklə, bu təyinatdan sonra respublikanın ictimai–siyasi həyatında yeni bir səhifə, yeni bir mərhələ başlayır. MR Ali Sovetinin 1990-cı il noyabrın 17-də keçirilən birinci sessiyasında Ulu Öndər Heydər Əliyevin təşəbbüsü ilə Naxçıvan Muxtar Sovet Sosialist Respublikasının adından “sovet”, “sosialist” sözləri çıxardıldı. Naxçıvan MSSR Ali Sovetinin adı dəyişdirilərək Naxçıvan Muxtar Respublikasının Ali Məclisi adlandırıldı. Ali Məclisin sessiyasında, həmçinin Azərbaycan Xalq Cümhuriyyətinin üçrəngli, ay-ulduzlu bayrağının Naxçıvan Muxtar Respublikasının dövlət bayrağı kimi qəbul edilməsi haqqında qərar qəbul edildi və Azərbaycanın ali hakimiyyət orqanı qarşısında məsələ qaldırdı ki, Azərbaycan Respublikasının dövlət rəmzləri haqqında analoji qərarlar qəbul edilsin. Xalqının, millətinin mənafeyini hər şeydən üstün tutaraq Bakıya qayıdan Heydər Əliyev xalqın ümid yerinə çevrilərək xalqın etimadını doğurultmaq üçün bütün çətinlikləri mərhələli şəkildə dəf edərək, onların öhdəsindən layiqincə gəldi. 1991-ci il sentyabrın 3-də dahi siyasətçi Heydər Əliyevin Naxçıvan Ali Məclisinin sədri seçilməsi ilə Azərbaycan xalqının milli azadlıq hərəkatının mərkəzi Naxçıvandan Bakıya keçdi. Və bu hərəkatın rəhbəri məhz Heydər Əliyev oldu. Azərbaycanın müstəqilliyini, ərazi bütövlüyünü, müharibə şəraitindən çıxmasını istəyən xalq nicat yolunu məhz Dahi Öndər Heydər Əliyevdə gördü. Bu ağır dövrdə xalqın ümummilli hərəkata çevrilmiş çağırışı ilə "Ömrümün bundan sonrakı hissəsini yalnız və yalnız Azərbaycanın müstəqil dövlət kimi inkişaf etməsinə həsr edəcəyəm" deyərək, ölkəyə rəhbərliyi və ən əsası, xilaskarlıq missiyasını üzərinə götürən Heydər Əliyev mövcud siyasi, hakimiyyət və dövlət böhranının aradan qaldırılması yollarını, müstəqil Azərbaycanın daxili və xarici siyasətinin əsas istiqamətlərini müəyyənləşdirdi.Respublikanın hər tərəfindən Naxçıvan şəhərinə axışan siyasilərin, ziyalıların, sadə zəhmət adamlarının iştirakı ilə 21 noyabr günündə Yeni Azərbaycan Partiyası (YAP) təsis olundu. 1993-cü ilin iyununda xalqın tələbi ilə ümumxalq partiyasının sədri, Azərbaycan xalqının görkəmli lideri Heydər Əliyev siyasi hakimiyyətə qayıtdı. Onun geri qayıdışı ölkənin sağlam qüvvələrini bir araya toplamaqla yanaşı, Azərbaycanı mövcud iflasdan xilas etdi.YAP-ın yaranma zərurətindən danışarkən vacib bir amili qeyd etmək yerinə düşər. O zaman mövcud vəziyyətdən çıxmaq üçün tək bir çıxış yolu var idisə o da YAP-ın yaranması idi. Bu siyasi təşkilatın yaradılması tarixi zərurət idi. O zaman xalq nicat yolunu, yalnız Heydər Əliyevin hakimiyyətə tarixi qayıdışında görürdü. Elə həmin vaxtlar 91 nəfər Azərbaycan ziyalısı Naxçıvana, Ulu Öndər Heydər Əliyevə müraciət ünvanlamışdı. Əslində bu müraciət ümumən Azərbaycan xalqının birliyindən doğan tarixi zərurət idi. Həmin müraciətdə Dahi siyasətçidən xahiş olunurdu ki, yaradılacaq Yeni Azərbaycan Partiyasına rəhbərlik etməyi öz üzərinə götürsün. Çünki o dövrdə ölkənin üzləşdiyi problemlərin öhdəsindən layiqincə gələ biləcək şəxs yalnız Ulu Öndər Heydər Əliyev ola bilərdi. Ona görə də, 1992-ci il noyabrın 21-də Naxçıvanda yaradılan YAP-ın təsis konfransında Ümummilli Lider Heydər Əliyev yekdilliklə yeni yaradılan partiyanın Sədri seçildi. Bir il sonra isə Ulu Öndər Heydər Əliyev prezident seçkilərində xalqın səsini qazandı. Tarix göstərdi ki, çox çətin, məşəqqətli bir dövrdə yaranan Yeni Azərbaycan Partiyası demokratik prinsiplər əsasında formalaşan cəmiyyətdə, çoxpartiyalı sistemdə özünə layiqli yer tutdu.Bir sözlə, xalqın düzgün seçimi yeni və qüdrətli Azərbaycanın yaranması ilə nəticələndi. Ona görə ki, YAP üzərinə düşən missiyanı uğurla həyata keçirdi və bu gün də bu inkişaf göz önündədir. Ulu Öndər Heydər Əliyev öz xilaskarlıq missiyası ilə ölkəmizin müstəqilliyini qorudu, respublikada tüğyan edən ictimai-siyasi böhranı aradan qaldırdı və inkişafın təməlini qoydu. Bununla da, ölkədə uzun illər davam edən gərginlik və qarşıdurma səngidi, respublikamız vətəndaş müharibəsindən və parçalanma təhlükəsindən xilas oldu. Hadisələrin gedişatına diqqət yetirsək görərik ki, hakimiyyətdə olduğu illərdə (1993-2003) Azərbaycan xalqının Ümummilli Lideri Heydər Əliyev öz xalqına, eləcə də YAP Sədri kimi güclü, enerjili kadr potensialına arxalanaraq öz qətiyyəti, uzaqgörən siyasəti nəticəsində Azərbaycanı inkişaf yoluna çıxarmaqla yanaşı, imzasını dövlətçilik tarixinə müstəqil Azərbaycanın qoruyucu əbədiyaşar lideri kimi iri hərflərlə həkk etdi.2003-cü il oktyabrın 1-də Azərbaycan dövlətinin memarı və qurucusu, bütün ömrünü Azərbaycan xalqının rifahına həsr etmiş ümummilli lider Heydər Əliyevin xalqa tarixi müraciəti oldu. Ulu öndər Heydər Əliyev prezident seçkilərində öz namizədliyini İlham Əliyevin xeyrinə geri götürdüyünü bildirdi. O, çıxışında Azərbaycan xalqını özünün siyasi varisi, dünya siyasətini gözəl bilən, yüksək intellektli, qətiyyətli və praqmatik düşüncəli bir şəxsiyyət olan İlham Əliyevə səs verməyə çağırdı. Ulu Öndər İlham Əliyevə özü qədər inandığını, İlham Əliyevi güclü siyasətçi olmaqla yanaşı dövlətini, xalqını sevən və lazım gələrsə xalq yolunda canını belə verməyə hazır olan insan olduğunu bildirdi. Ulu öndər bütün fəaliyyəti dövründə xalqa arxalanırdı və xalq da Heydər Əliyevə inanırdı. Xalqımız çox gözəl bilirdi ki, dövlətimizi gələcək inkişafa, vətəndaşlarımızı rifaha aparan yol Heydər Əliyev yoludur və İlham Əliyev bu siyasi kursun, bu yolun ən layiqli davamçısı olacaq. 2003-cü il oktyabrın 15-də Azərbaycan xalqının böyük əksəriyyəti, 76 faizdən çoxu, prezident seçkilərində İlham Əliyevə səs verdi. Bu, Heydər Əliyev siyasi kursuna, İlham Əliyevə böyük inama verilən səs idi. Xalqımız öz seçimində yanılmamışdı. Prezident İlham Əliyev Azərbaycan dövlətini zirvələrə qaldırdı, dünyada söz sahibinə malik bir dövlətə çevirdi.Prezident seçildiyi ilk illərdən etibarən cənab İlham Əliyev iqtisadiyyatda, səhiyyə, təhsil sistemində, ordu quruculuğunda böyük irəliləyişlərə nail oldu. Müasir, dünya standartlarına uyğun yüzlərlə xəstəxana, minlərlə məktəblər inşa edildi. Gələcək nəsillərimizin sağlam böyüməsi, dünya idman arenalarında idmançılarımızın Azərbaycan bayrağını yüksəklərə qaldırması məqsədilə ölkəmizin demək olar ki, bütün regionlarında olimpiya idman kompleksləri inşa etdirildi.2005-ci il mart ayının 26-da Yeni Azərbaycan Partiyasının III qurultayında yekdilliklə partiyanın sədri seçilən cənab İlham Əliyev bu gün Ulu Öndərimizin quruculuq və inkişaf xəttinin layiqli davamçısıdır. Xalqımız prezident seçkilərində partiyanın lideri cənab İlham Əliyevi dəstəkləməklə, Azərbaycanda Heydər Əliyev yoluna özünün dərin inamını ifadə edib.Prezident İlham Əliyevin ölkəyə rəhbərlik etdiyi 2003-cü ildən ötən müddət Azərbaycan tarixinə hərtərəfli və sürətli inkişaf dövrü kimi daxil olub. Şübhəsiz, sosial-siyasi sabitliyin qorunmasının, mövcud iqtisadi inkişafın, hərtərəfli tərəqqinin təməlində ümummilli lider Heydər Əliyevin inkişaf strategiyası, onun müəyyənləşdirdiyi daxili və xarici siyasət xətti dayanır. O da həqiqətdir ki, Ulu öndərin əsasını qoyduğu daxili və xarici siyasət kursunun uğurla davam etdirilməsi sayəsində Azərbaycan bugünkü yüksəlişə və inkişafa nail olub. Gənc dövlətin əsaslarının möhkəmliyi və həyata keçirilən strategiyanın səmərəliliyi məhz Prezident İlham Əliyevin liderlik keyfiyyətləri, zəkası, siyasi iradəsi və uzaqgörənliyi, ümumilikdə, rasional varislik modeli sayəsində mümkün olub. Yeni Azərbaycan Partiyasının (YAP) 2021-ci il martın 5-də keçirilən VII qurultayı istər partiyanın, istərsə də ictimai-siyasi münasibətlər sistemimizin tarixində mühüm bir hadisə kimi yadda qaldı. Qurultayda partiyanın rəhbər strukturlarının yenidən formalaşdırılması ilə bağlı əhəmiyyətli qərarlar qəbul edildi. YAP-ın yeni Nizamnaməsi təsdiq olundu, İdarə Heyəti, Təftiş Komissiyası, Veteranlar Şurası seçildi və bir sıra siyasi partiyaların Yeni Azərbaycan Partiyasına qoşulmasına dair müraciətlərinə baxıldı. Azərbaycan Prezidenti, Yeni Azərbaycan Partiyasının Sədri cənab İlham Əliyev çıxışı zamanı Ümummilli Liderimiz Heydər Əliyevin qurucusu olduğu Yeni Azərbaycan Partiyasının keçdiyi tarixi inkişaf yoluna nəzər saldı, qarşıda duran vəzifələri diqqətə çatdırdı, mühüm fikirlər səsləndirdi. Partiyamızın VII qurultayı ölkəmizin ictimai-siyasi həyatında önəmli hadisədir. Yeni Azərbaycan Partiyası nəinki Azərbaycanın, Cənubi Qafqazın ən böyük siyasi partiyasıdır: “Partiyamızın böyük ənənələri var. Hesab edirəm ki, partiya yeniləşmiş formatda, o cümlədən rəhbər orqanlarında təmsil olunan namizədləri nəzərə alsaq daha fəal olacaq, ölkə qarşısında duran problemləri daha fəal icra edəcəkdir”.
Dövlətimizin başçısı, YAP-ın Sədri cənab İlham Əliyev qurultayda qeyd etdi ki, siyasi partiyalarda fəaliyyət göstərən gənc nəslə elə təlimat verilməlidir ki, onlar gələcək həyata hazırlıqlı olsunlar, onlar ölkəmizin müstəqilliyini hər şeydən üstün tutsunlar: “Burada, əlbəttə ki, təcrübəli nəslin fəaliyyətindən çox şey asılıdır. Misal üçün, Yeni Azərbaycan Partiyasında Veteranlar Şurası yaradılıb. Hesab edirəm ki bu, çox önəmli addımdır. Bu Veteranlar Şurasının tərkibində tanınmış hörmətli insanlar fəaliyyət göstərəcəklər”. Qeyd edim ki, onun bu addımı – YAP Veteranlar Şurasının yaradılması Yeni Azərbaycan Partiyasının qurucu nəslinə böyük diqqət, ehtiramı ilə yanaşı, Veteranların təcrübəsindən, məsləhətlərindən gənclərin istifadə etməsi deməkdir. Bu gün Ümummilli lider Heydər Əliyevin qoyduğu tarixi ənənələr YAP tərəfindən sədaqətlə həyata keçirilir. Bu tarixi reallığı müdrik prezident, YAP sədri cənab İlham Əliyev qətiyyəti, dönməz siyasəti ilə gerçəkləşdirir. Azərbaycanın get-gedə artan nüfuzu, beynəlxalq arenada söz sahibi olması dünyanın ən nüfuzlu şirkətlərinin iqtisadiyatımızın mühüm sahələrinə investisiya qoyulmasını gündəmə gətirərək daha da surətləndirdi. Ən başlıcası da budur ki, xalq bu addımları məmnunluqla qarşılayır və yüksək dəyərləndirir.Azərbaycan Respublikasının II Qarabağ savaşında qələbə qazanması böyük tarixi əhəmiyyət kəsb etməklə yanaşı, həm dövət başçısı, həm də Yeni Azərbaycan Partiyasının sədri kimi cənab İlham Əliyevə bəslənən ümidləri bir daha artırdı. Xalq başa düşdü ki, böyük dövlətlərin himayəsində olan Ermənistanla böyük zəfərə gedən yolda qələbə qazanılması heç də anidən, asanlıqla başa gəlməmişdir. Belə ki, daim ərazilərimizi atəşə tutan ermənilər 27 sentyabr 2020-ci il səhər saatlarında genişmiqyaslı təxribat törədərək cəbhəboyu zonada yerləşən Azərbaycan ordusunun mövqelərini və yaşayış məntəqələrini iriçaplı silahlar, minaatanlar və müxtəlif çaplı artilleriya qurğularından intensiv atəşə tutmuşlar. Ermənistan ordusunun döyüş aktivliyinin qarşısını almaq, mülki əhalinin təhlükəsizliyini təmin etmək məqsədilə Azərbaycan ordusunun komandanlığı tərəfindən qoşunların bütün cəbhəboyu sürətli əks-hücum əməliyyatı başlaması barədə qərar verildi. İkinci Qarabağ müharibəsi zamanı Azərbaycan xeyli az itki ilə böyük zəfərə imza atdı. Müzəffər Ali Baş Komandan İlham Əliyev noyabr ayının 8-də xalqımıza Şuşanın azad edilməsi müjdəsini verdi. “Bu tarixi bir gündə Azərbaycan xalqına bu müjdəni vermək mənim həyatımda bəlkə də ən xoşbəxt günlərimdən biridir” söyləyən cənab İlham Əliyev əminliklə bildirmişdir: “Əziz Şuşa, sən azadsan! Əziz Şuşa, biz qayıtmışıq! Əziz Şuşa, biz səni dirçəldəcəyik! Şuşa bizimdir! Qarabağ bizimdir! Qarabağ Azərbaycandır!” Şuşa zəfəri, əslində, müharibənin taleyini həll etdi. Ertəsi gün daha 70-dən çox kəndin azad olunması xəbəri gəldi və bundan bir gün sonra N.Paşinyan Azərbaycan Prezidentinin şərtlərini qəbul edərək “kapitulyasiya aktı”na imza atmağa məcbur oldu. Noyabr ayının 10-da Azərbaycan Respublikasının Prezidenti İlham Əliyev, Ermənistan Respublikasının Baş naziri Nikol Paşinyan və Rusiya Federasiyasının Prezidenti Vladimir Putin münaqişə zonasında atəşin və bütün hərbi əməliyyatların tam dayandırılması barədə bəyanat imzaladılar. Bəyanata əsasən noyabrın 20-də Ağdam. Beləliklə, Azərbaycanın hərbi qələbəsi Ermənistanı kapitulasiyaya məcbur etdi. 44 gün davam edən hərbi əməliyyatlar nəticəsində Azərbaycan xalqı tarixi qələbə qazanmış, ölkəmizin ərazi bütövlüyü bərpa olunmuşdur. Azərbaycan Respublikası Prezidentinin “Azərbaycan Respublikasında Zəfər Gününün təsis edilməsi haqqında” 2020-ci il 3 dekabr tarixli Sərəncamına əsasən Vətən müharibəsində misilsiz qələbənin əbədiləşdirilməsi məqsədilə hər il 8 noyabr tarixinin Azərbaycanda “Zəfər Günü” kimi qeyd edilməsi qərara alınmışdır. Dekabrın 10-da keçirilən möhtəşəm Zəfər paradı isə Azərbaycanın hərbi gücünü və tarixi Qələbəmizi bütün dünyaya bir daha nümayiş etdirdi. Zəfər paradı müzəffər Ali Baş Komandan cənab İlham Əliyevin rəhbərliyi ilə rəşadətli Ordumuzun 44 gün davam edən “Dəmir yumruq” hərbi əməliyyatında qazandığı tarixi Qələbənin təcəssümü oldu. Paradda nümayiş etdirilən texnikalar dövlətimizin başçısı İlham Əliyev tərəfindən hərbi sahəyə göstərilən diqqət və qayğını nümayiş etdirdi. Bakı Metropoliteninin 29 may 2021-ci ildə istifadəyə verilən stansiyasına ölkə başçısı İlham Əliyevin xüsusi təşəbbüsü ilə Zəfər Günü münasibətilə “8 Noyabr” adı verildi. Bu stansiya dövlətimizin keçdiyi keşməkeşli yolun xoşbəxt sonluğuna, “Dəmir yumruğun” gətirdiyi Qələbə müjdəsinə şahidlik edəcəkdir. Beləliklə, 44 günlük müharibə Azərbaycan xalqının nə qədər vətənpərvər, böyük xalq olduğunu, milli birliyini, həmrəyliyini bütün dünyaya sübut etdi. Azərbaycan tarixi torpaqlarına - Qarabağa qovuşdu, tarixi zəfərə imza atdı, şəhidlərimizin, Xocalı qurbanlarının, Gəncə, Bərdə, digər şəhər və rayonlarımızda törədilən soyqırımları zamanı həlak olan günahsız insanların qisası döyüş meydanında alındı, işğalçı Ermənistana layiq olduğu yer göstərildi. Bu qələbəni, zəfəri bizlərə yaşadan isə Ulu Öndər Heydər Əliyev siyasi kursunun layiqli davamçısı, ölkə Prezidenti, Ali Baş Komandan İlham Əliyevin qətiyyəti, siyasi iradəsi, güclü ordumuz, rəşadətli əsgər və zabitlərimizdir. Bu gün biz böyük fərəhlə torpaqlarımızın adlarını çəkir, doğulduğumuz doğma ocaqlarımıza gedə biliriksə bunun üçün onlara minnətdarıq.Bu il oktyabrın 20-də ölkə başçısı İlham Əliyevin Birinci xanım Mehriban Əliyeva ilə Zəngilan rayonuna səfərimi həyatımın ən xoş, yaddaqalan, möhtəşəm günü hesab edirəm. Görüş zamanı sevincimizin, qürurumuzun həddi-hüdudu yox idi. Görüş çox səmimi, mehriban şəraitdə keçdi. Sözlə ifadə etmək çətindir, bu hissləri yaşamaq lazımdır. Zəngilan barədə hər kəs səmimi söhbət edirdi. Mən də yadıma ötən illəri, yaşadığımız xoş uşaqlıq, gənclik illərini salırdım. Axı mən də illərlə həsrətini çəkdiyim Zəngilan torpağında doğulmuş, həyatımın ən şirin, maraqlı uşaqlıq illəri burada keçmişdi. İbtidai təhsilimi Zəngilan rayonunun Pirçivan qəsəbəsində almışam. Sosialist Əməyi Qəhrəmanı Ziyad Məmmədovun qızıyam. Atam 1940-cı ildən 1953-cü ilədək Zəngilan rayonu İcraiyyə Komitəsinin sədri vəzifəsində çalışıb. Müharibə illərində və sonra da quruculuq işləri ilə məşğul olub...Görüşdə işğaldan əvvəlki Zəngilan və işğal dövründə rayonun tamamilə dağıdılması haqqında, eləcə də bu gün həyata keçirilən tikinti-quruculuq işlərindən danışıldı. Biz dağıdılmış Dağüstü Parkın yanından başlayaraq rayon mərkəzinə doğru gedərkən Zəngilanın bərəkətli torpağından Azərbaycanın Birinci vitse-prezidenti Mehriban xanım Əliyevaya danışırdıq. O, bizi çox maraqla dinləyirdi. Zəngilan torpağında keçirilən bu görüş bizə böyük qürur verdi. Yenə də qeyd etdim ki, bütün bunların səbəbkarı, Azərbaycanı qalib dövlətə çevirən, xalqımızın başını uca edən Prezident İlham Əliyevdir. Bu xoşbəxt günləri bizə bəxş etdiyi üçün dövlətimizin başçısına minnətdarıq. Biz Azərbaycan xalqının övladı olmağımızla fəxr edirik.Lider-Xalq-Ordu birliyi sayəsində zəfər qazandıq. Sevincli, şərəfli günlərimizi yaşayırıq. Qalib xalq kimi fəxr edirik. Bu məqamda Prezident İlham Əliyev haqqında Ulu öndər Heydər Əliyevin vaxtilə söylədiyi bu fikri yada salmaq yerinə düşər: “Mən ona özüm qədər inanıram və onun gələcəyinə çox böyük ümid bəsləyirəm”. Ulu Öndərin bu fikirlərinin hər keçən gün öz təsdiqini tapdığının və İlham Əliyevin hər bir azərbaycanlının Prezidenti olduğunun şahidi oluruq.“Dağlıq Qarabağ bizim qədim, tarixi torpağımızdır və biz o torpaqlara qayıdacağıq”. Bu sözləri öz çıxışlarında dəfələrlə qeyd edən Prezident İlham Əliyev Ulu öndər Heydər Əliyevə və xalqımıza verdiyi sözləri tutdu. Ata vəsiyyətini yerinə yetirdi. Ordumuza, eləcə də möhkəm iradəli xalqımıza inanaraq Zəfər qazandı. Ərazi bütövlüyümüz bərpa edildi.Sentyabrın 27-dən başlayan Vətən müharibəsi Azərbaycan xalqının “Dəmir yumruq” ətrafında birləşməsi tarixidir. Erməni mifinin dağıdılmasının başlanğıc ərəfəsidir. Qarabağın tacı olan Şuşanın azad edilməsi dünya hərb tarixinə düşəcək unikal hərbi əməliyyat idi. Bu, bizim şanlı qələbəmizdir.Azərbaycanın Birinci vitse-prezidenti Mehriban Əliyevanın sözləri ilə desək, bizim vahid arzumuz Qarabağ şikəstəsini Qarabağ torpağında birlikdə eşitməkdir. Zəngilanda da “Qarabağ şikəstəsi” səsləndi.Tarixi ədaləti bərpa edən Müzəffər Ali Baş Komandan İlham Əliyev qurucu lider, sərkərdə və xalqımızın ən böyük arzularını gerçəkləşdirən şəxsiyyət kimi adını əbədi olaraq tarixə həkk etdi.Qarabağ Azərbaycandır! Yaşasın Azərbaycan xalqı!Azərbaycan Respublikasının Prezidenti cənab İlham Əliyev Ümummilli lider Heydər Əliyevin siyasi ənənələrinə söykənərək “daim yeniləmə, daim dəyişmə və daim inkişaf etmə” prinsipini əldə rəhbər tutaraq Yeni Azərbaycan Partiyası ilə birgə irəliləyir...

Adilə Abasova,
2-ci dərəcəli dövlət müşaviri,
YAP Veteranlar Şurasının üzvü,
Fizika -riyaziyyat elmləri doktoru,
professor