RAMAZAN AYINDA NECƏ SAĞLAM QİDALANAQ?

Hər səhər oruc tutduqdan əvvəl niyyət etmək lazımdır. Bu niyyəti ucadan sözlə ifadə edərək və ya ürəkdə azad bir formada tutmaq olar. Misal üçün: "Mən bu orucu Allah naminə tutmağı niyyət edirəm". Axşam namazının azanı səslənən kimi oruc tutan insan iftarını aça bilər. Bu məqsədlə dua oxunandan sonra 1 stəkan su içmək və bir neçə xurma yemək lazımdır.

Məhz bu üsulla siz mədə-bağırsaq sisteminizin normal fəaliyyətinə təkan verir və həddindən artıq yeməyin qarşısını alırsınız. Müxtəlif vitamin və mikroelementlərlə zəngin olan xurma insana tez bir zamanda toxluq hissi və enerji bəxş edir. Buna görə də xurma hər bir oruc tutan insanın gündəlik rasionunda mütləq olmalıdır. İftarını açdıqdan sonra müsəlman namazını qılmalı, zikr etməli və yalnız bundan sonra əsas qida qəbuluna başlamalıdır. Çalışın ki, həddindən artıq yeməyəsiniz - bu sizin həm fiziki, həm də ruhi sağlamlığınız üçün ziyanlıdır. 14-15 saat ərzində aclığa və susuzluğa dözən orqanizm çox miqdarda qidaya tab gətirə bilməz və insanın halı o dərəcədə pisləşə bilər ki, hətta həkimin köməyinə ehtiyac yarana bilər. Yemək zamanı çalışın su, şirə və s. mayeləri içməyəsiniz. Bu halda, həzm prosesi pozular. Mayeni əsas qidadan əvvəl və ya bir müddət sonra etmək olar.

Ramazan ayında ağır, yağlı, qızarmış, ədviyyatlı, duzlu qidalardan imtina etmək lazımdır. Yağı az olan ət və balıq növlərinə üstünlük verin. Qida rasionunuzda çoxlu meyvə və tərəvəzlər, meyvə quruları, göyərtilər olmalıdır. Bunlar təbii bitki liflərilə zəngindir ki, insanın mədə-bağırsaq sisteminin fəaliyyətinə yaxşı kömək edir. Mütləq süd məhsullarından da istifadə edilməlidir. Ümumiyyətlə, çalışmaq lazımdır ki, Ramazan ayında siz mümkün qədər xeyirli və çeşidli qidaları qəbul edəsiniz. Səhər namazına qədər qəbul edilən qida çox yüngül və eyni zamanda, doydurucu olmalıdır ki, iftar vaxtına qədər siz aclıqdan əziyyət çəkməyəsiniz. Bunun üçün müxtəlif sıyıqlar (manna yarması, qarabaşaq, yulaf yarması və s.), tərəvəz salatları, meyvələr, müxtəlif meyvə quruları (əncir, ərik, qara qavalı), süd məhsulları (kəsmik, xama və s.), yumurta və s. uyğun gəlir. Səhər qida qəbulunda şirin qidalara (tort, pirojna, şirin peçenye, şəkər və s.) üstünlük verməyin. Duzlu, ədviyyatlı və yağlı qidaları qəbul etməyin ki, sizi gün ərzində susuzluq hissi narahat etməsin. Gün ərzində insan 2 litr maye içməlidir. Bu qaydaya xüsusi diqqət yetirin ki, böyrəkləriniz əziyyət çəkməsin. Səhər limon qatılmış su içmək yaxşıdır. Çay bir qədər sidikqovucu təsirə malikdir və bu səbəbdən səhər qida qəbulu zamanı çoxlu çay içmək tövsiyə olunmur. Mineral sulardan da imtina edin. Onlar duzlarla zəngindir və bu susuzluğu artırır. Orucun birinci həftəsində orqanizm yeni şəraitə uyğunlaşdığı üçün insan baş ağrısı, baş gicəllənməsi, yorğunluq, huşsuzluq hiss edə bilər. Oruc tutan insan gün ərzində mümkün qədər çox dincəlməli, uzanmalı və yatmalıdır. Arıqlamaq, sağlamlıq naminə və s. fikirlərlə tutulan oruc qəbul olunmaz! Yalnız Allah rizası üçün tutulan oruc, İnşaallah, qəbul olunar və orucu tutan insan Allah tərəfindən mükafatlandırılar.

Allah orucunuzu qəbul etsin!

Ramazan ayının 9-cü gününün duası: İlahi, bu gün öz bol rəhmətini mənə nəsib et. Məni öz parlaq dəlillərinlə istiqamətləndir. Məni sənin razılığına bais olan və hər cür xeyri özündə cəm edən əməllərə doğru çək. Məhəbbətinə and verirəm, ey şövqlülərin istəyinin mücəssəməsi!

İmsak: 03:07

İftar: 20:28

Hazırladı: SƏDAQƏT