"Soyuq Müharibəyə doğru əmin addımlarla irəliləyirik''

ABŞ-ın Almaniyada uzaqmənzilli qanadlı raketlər yerləşdirmə qərarına münasibət bildirən Kreml sözçüsü Dmitri Peskov deyib:"Soyuq Müharibəyə doğru əmin addımlarla irəliləyirik''. SİA-nın əldə etdiyi məlumata görə, Rusiyanın "Rossiya-1" telekanalına müsahibə verən Dmitri Peskov ABŞ-ın Almaniyada uzaqmənzilli qanadlı raketlər yerləşdirmə qərarını qiymətləndirib.

Sözügedən qərarla bağlı prosesləri izləyəcəklərini vurğulayan Dmitri Peskov deyib: "Almaniya, ABŞ, Fransa və İngiltərə Ukraynadakı münaqişələrdə birbaşa iştirak edir. Bütün bunlar ölkəmizi sıxışdırmaq və döyüş meydanında strateji məğlubiyyətimizi təmin etmək üçün edilir''.

Yaşanan olayların soyuq müharibənin əlamətlərini daşıdığını ifadə edən Dmitri Peskov deyib: "Soyuq müharibəyə doğru əmin addımlarla irəliləyirik. Bütün bunlar daha əvvəl də yaşanmışdı''.

Rusiya xarici işlər nazirinin müavini Sergey Ryabkov verdiyi açıqlamada ''ABŞ-ın qərarına hərbi cavab hazırlayacağıq" ifadələrini işlədib.

ABŞ və Almaniyanın verdiyi ortaq açıqlamaya görə, 2026-cı ildən etibarən Almaniyada "Tomahawk" qanadlı raketlər və digər uzaq mənzilli silahlar yerləşdiriləcək.