Ukrayna Aİ-nin ilk müdafiə xəttidir - Ursula fon der Leyen

Avropa Komissiyasının rəhbəri bəyan edib ki, Ukraynanın təhlükəsizliyi uzunmüddətli perspektivdə təmin edilməlidir. O, həmçinin qeyd edib ki, maliyyələşdirmə təklifləri artıq müzakirə olunur. Avropa Komissiyasının sədri Ursula fon der Leyen Ukraynanı “Aİ-nin ilk müdafiə xətti” adlandıraraq, ölkənin təhlükəsizlik zəmanəti alması lazım olduğunu bildirib. "Səs" qəzeti xəbər verir ki, Von der Leyen bunu prezident Vladimir Zelenski ilə görüşdən sonra X sosial media platformasında yazıb.

"Biz prezident Zelenskiyə bir daha təsdiq etdik ki, Aİ sabit və öz prinsiplərinə sadiqdir. Ukraynanın suverenliyinə hörmət edilməlidir. İttifaqımızın birinci müdafiə xətti kimi Ukraynanın təhlükəsizliyi uzunmüddətli perspektivdə təmin edilməlidir", - AK prezidenti bildirib.

O qeyd edib ki, sülh danışıqları zamanı Aİ Ukraynaya dəstəyində sabit qalır. "Bizim maliyyələşdirmə təkliflərimiz artıq masadadır. Məqsəd döyüş meydanında və danışıqlar masası arxasında güclü Ukraynadır", - rəsmi əlavə edib.

Von der Leyen həmçinin qeyd edib ki, bu prioritetlər onun NATO-nun baş katibi Mark Rutte ilə müzakirələrinin mərkəzində olub. O, Avropanın “Ukraynada ədalətli və davamlı sülhə nail olmaq üçün bütün səylərə” töhfə verməkdə davam edəcəyini vurğulayıb.

Xatırladaq ki, bazar ertəsi axşam Zelenski NATO-nun baş katibi Mark Rutte, Avropa Şurasının sədri Antonio Kosta və Avropa Komissiyasının sədri Ursula fon der Leyen ilə görüşərək, ABŞ-la apardığı danışıqların nəticələri barədə məlumat verib.

VƏLİ