Fransada “Respublikaçılar"ın prezident seçkiləri üçün maliyyə qayğıları var

Mart ayında bələdiyyə seçkiləri başa çatan kimi Fransada növbəti prezident seçkiləri üçün kampaniya mərhələsi yaxınlaşacaq. Lakin hazırkı vəziyyətdə “Respublikaçılar” (LR) partiyası bu kampaniyanı maliyyələşdirmək imkanına malik deyil. Partiya daxilində təsirli mövqeyə malik bir funksionerin sözlərinə görə, bu gün LR böyük bir seçki kampaniyasını maliyyələşdirə bilən partiya deyil.

Xəbər verilir ki, prezident seçkiləri kampaniyasının dəyəri təxminən 20 milyon avro təşkil edir. Brüno Rötayoya yaxın bir mənbə açıq şəkildə bildirir ki, LR-in kassasında bu qədər vəsait yoxdur. Partiyanın ehtiyat fondu mövcud deyil və LR-dən olan bir nazir bunu gizlətmir.

Doğrudur, son illərdə partiyanın maliyyə vəziyyəti qismən yaxşılaşdırılıb, lakin struktur problemlər hələ də qalır. Bu çətinliklərin kökü 2012-ci ilə, Nikola Sarkozinin seçki məğlubiyyətinə və kampaniya xərclərinin dövlət tərəfindən geri qaytarılmamasına gedib çıxır. Həmin dövrdən bəri LR bütün parlament seçkilərində mövqelərini itirib. Halbuki dövlət dotasiyaları birbaşa deputatların sayından asılıdır.

Buna əlavə olaraq, Loran Vokyeyə yaxın olan bir qrup deputat maliyyə baxımından partiyaya bağlanmamaq qərarı verib. Bu isə LR-i ildə azı 100 min avro gəlirdən məhrum edir. Digər bir ciddi problem isə bank kreditləri ilə bağlıdır.

Bu vəziyyət əslində bir qapalı dairəyə çevrilib. Partiya banklara müraciət etdikdə, maliyyə qurumları onun borcu qaytarmaq qabiliyyətini yoxlayır. İndi isə sual yaranır: LR 2027-ci ildə daha yaxşı nəticə göstərə biləcəkmi?

Üstəlik, partiya artıq qərargahının sahibi deyil, kirayəçidir. Bu isə binanı girov qoyaraq kredit götürmək imkanını tamamilə aradan qaldırır. Məhz buna görə də partiya sədri Brüno Rötayo maliyyə vəziyyətinin ciddiliyini yaxşı bildiyi üçün pərdəarxası fəallığını artırıb. Onun yaxın ətrafından bir nəfər iri donorlar tapmaqla məşğuldur.