Konqoda Ebola epidemiyası ölkə tarixində ən ölümcül xəstəliyə çevrilib

Konqo Demokratik Respublikasında (KDR) Ebola virusunun yayılması ölkə tarixində ən ölümcül epidemiya olub. Son məlumatlara görə, epidemiyadan ölənlərin sayı 2 325 nəfərə çatıb və bu rəqəm 2018–2020-ci illərdə qeydə alınmış 2 299 ölüm halını ötüb. Təsdiqlənmiş yoluxma hallarının ümumi sayı isə 4 945-ə yüksəlib. Son 24 saat ərzində daha 101 yeni yoluxma qeydə alınıb.SİA-nın xarici mətbuata istinadən verdiyi xəbərə görə, BMT-nin humanitar məsələlər üzrə rəhbəri Tom Fletcher epidemiyanı təşkilatın məlumatlarına əsasən “indiyədək ən sürətlə yayılan Ebola epidemiyası” kimi qiymətləndirib. O bildirib ki, virusun səhiyyə sisteminin cavab tədbirlərini qabaqlamasına imkan verməmək üçün sürətli və genişmiqyaslı tədbirlər görülməlidir.Bu, Konqo Demokratik Respublikasında qeydə alınan 17-ci Ebola epidemiyasıdır. İyulun sonunda yoluxma hallarının sayına görə artıq ölkə tarixində ən böyük epidemiya kimi qeydə alınmışdı. İndi isə ölüm sayına görə də əvvəlki rekordu geridə qoyub.Ümumdünya Səhiyyə Təşkilatının baş direktoru Tedros Adhanom Qebreyesus xəbərdarlıq edib ki, epidemiya hazırkı sürətlə davam edərsə, 2014–2016-cı illərdə Qərbi Afrikada baş vermiş və 11 mindən çox insanın ölümünə səbəb olmuş Ebola epidemiyasının miqyasını da ötə bilər.Hazırkı epidemiyaya Ebola virusunun Bundibugyo növü səbəb olur. Al Jazeera-nın məlumatına görə, bu virus növünə qarşı təsdiqlənmiş vaksin və müalicə vasitəsi yoxdur. Epidemiyanın mayın 15-də elan edilməsindən sonra onun yayılmasına zəif səhiyyə infrastrukturu, bölgələrin ucqar olması və Cənubi Sudan, Uqanda və Ruanda ilə sərhədyanı ərazilərdə davam edən münaqişələr də təsir göstərib.Xəstəliyə yoluxduqdan sonra ölüm göstəricisi iyunun əvvəlindəki təxminən 20 faizdən 46 faizə yüksəlib. Bu isə təsdiqlənmiş hər iki yoluxmadan təxminən birinin ölümlə nəticələnməsi deməkdir. Mütəxəssislər bir çox xəstənin tibbi yardıma çox gec müraciət etdiyini və bəzi hallarda yoluxmanın yalnız xəstənin ölümündən sonra müəyyənləşdirildiyini bildirirlər.Hazırda az sayda eksperimental vaksin və müalicə üsulu qiymətləndirilir. Beynəlxalq səhiyyə qurumları mövcud Ebola müalicələrinin qoruyucu təsir göstərə bilib-bilməyəcəyini də araşdırır. Lakin bu istiqamətdə əldə olunan sübutlar hələlik əsasən heyvanlar üzərində aparılan tədqiqatlarla məhdudlaşır.

Müəllif: Lətifə Musayeva