Sabir Çingizi, Çingiz isə Sabiri bəyənmir

Sabir Rüstəmxanlı:

Mən onun sədriyəm, DAK əlimdədi,
Sanıram pul dolu bak əlimdədi,
VHP kimi dağ əlimdədi,
Kənardan mənə bax və ləzzət apar,
Ey QHT acı , düşüncəsi dar,
De görüm əlində sənin nəyin var?

Çingiz Qənizadə:

Sən qalib gəlməzsən özün tək mənə,
Qol-qanad verməkdə bu istək mənə,
Üsaməni yenən Qərb dəstək mənə,
İş gör əvvəl, sonra qiyamət qopar.

Sabir Rüstəmxanlı:

Qıcı Qərb tərəfə iti dişini,
Sən bir qazanırsan, bizsə beşini,
VHP daxildə görər işini,
Xarici işləri DAK-çılar yapar.

Çingiz Qənizadə:

Qərbin qrantını qapar ən bici,
Nəzarətində bir ölkənin içi,
Canilər dilimdə bir siyasətçi,
Vəzifəm mükəmməl xarici çapar.

Sabir Rüstəmxanlı:

Bir tufan qoparaq, eylə tamaşa,
Zaval gəlsə gələr QHT başa,
VHP DAK ilə qardaşdı qoşa,
Xəyalım elə bu arada çapar.

Çingiz Qənizadə:

Sənin partiyada işlərin çətin,
Yerinə yetməzdi heç vaxt niyyətin,
Ancaq bir QHT dayanar mətin,
DAK da, VHP də yerindən qopar.
Sabir Rüstəmxanlı:

Sən özün xaricə yalmanan yaltaq,
DAK yüksək zirvədi, QHT muldaq,
Sizin QHT -lər adi fırıldaq,
Kim yalan deyirsə, olsun ona ar.

Çingiz Qənizadə:

Dağların fısdığı, zoğalı bizim,
Yerevan dığasız-dığalı bizim,
Qərbin ən ləzzətli qoğalı bizim,
Sizin nəsibiniz yalnız boran-qar.

Sabir Rüstəmxanlı:

DAK bizə gətirir üz ağartısı,
Səni qorxutmaqda biz ağartısı,
Qərbdən gələr sənə göz ağartısı,
Həm də bədənindən sel tək axar par.

Çingiz Qənizadə:

DAK -ın özündən də QHT zorba,
Sənə qurumunda tikilər torba,
Sən gedib evində yeyəndə şorba,
Məni cəlb eyləyir Qərbə neçə bar.

Sabir Rüstəmxanlı:

Nifrətə kökləyir səni xain əl,
Bu lüzumsuz yolla zirvəyə yüksəl,
Qərbdə gitaranın səsinə sən gəl,
Mənsə öz DAK-ımda dinləyərəm tar.
Çingiz Qənizadə:

İşdi, qurtararsa cibimdə pulum,
İmkan var bir-iki bossu da yolum,
Qərbə təzim etmək dəyişməz yolum,
Axar su, sözsüz ki, çuxuru tapar.

Sabir Rüstəmxanlı:

QHT-də iş yaş, bizdə qurudu,
Sizi Qərb, bizləri kütlə qorudu,
Bizim DAK-ımızda işlər qurudu,
Bulanıq suyu da duruldar axar.

Çingiz Qənizadə:

VHP bağında qoz-badam yoxdu,
Sizi sevən bir ser, bir madam yoxdu,
Ardınızca gedən bir adam yoxdu,
Sizi el, bizləri bəd tamah yıxar.

Sabir Rüstəmxanlı:

Alman-ingilisin get ol içində,
QHT boğulur gur sel içində,
Oturub-dururuq biz el içində,
Gözünüz zillənib xaricə baxar.

Çingiz Qənizadə:

Özün sərnişinsiz boş bir dərəsən,
İrəli gedərsən, ayaq dirəsən,
Cəhd eylə DAK-ında çox iş görəsən,
Kütlə ordenləri döşünə taxar.
Sabir Rüstəmxanlı:

Görübsən həmişə bəd işlər gic-gic,
Axırda QHT-n olacaq iflic,
Sənə müftə yerə pul vermir xaric,
Göstər öz çöhrəni, maskanı çıxar.

Çingiz Qənizadə:

Qaz vurdum erməni on keşiş ilə,
Əlləşdin-vuruşdun, sözsüz, leş ilə,
De, DAK-ın sevinir hansı iş ilə?
Sənin VHP-dən, söylə nə çıxar?

Sabir Rüstəmxanlı:

Hələ anlamırsan sözün düzünü,
Elə ki, qaraltdı iki gözünü,
Görərsən sən Qərbin astar üzünü,
Eybi yox, başında şimşəklər çaxar.

Çingiz Qənizadə:

Xaricdə önümə çəkirəm qabı,
Sanki ilişibdi kişmişə yabı,
Sən ye qərargahda vətən kababı,
Səndən fərqli Çingiz Qərbdə yem tıxar.

Sabir Rüstəmxanlı:

Bara meyillilər, bil, barda qalar,
Dəhlizdən keçməyən, kandarda qalar,
Cızığından çıxan kənarda qalar,
Gördüyün hər işdə mahiyyət qoxar.

Çingiz Qənizadə:

Pulu çeklə almaq xaricdə qayda,
Mən də varlanaram elə bu mayda,
Əlbəttə, vaxt gələr, gətirər fayda,
Mənim QHT-mə xarici maqlar.