İsa Qəmbərov və Əli Kərimov: qarşılıqlı ittihamlar

İsa Qəmbərov:

Elçibəy dövründə bütövdü cəbhə,
Sən gəldin, yol verdin 10-larla səhvə,
Nəticədə cəbhə üz qoydu məhvə,
Səninki təzyiqə, günaha keçdi,
Qüdrət lap Allaha pənaha keçdi,
Mirmahmud "klassik" cinaha keçdi.

Əli Kərimov:

20 il əvvəlki bir qoturdun sən,
Başqanlıq postuna gec oturdun sən,
Boss pul buraxanda, çox qudurdun sən,
Səninki dişaltı tamaha keçdi.

İsa Qəmbərov:

Qərbdə sən özünü bez kiriş gördün,
Diş qıcasan belə, öndə diş gördün,
Cəbhədə o qədər ucuz iş gördün,
Təsiri özünə çox baha keçdi.

Əli Kərimov:

Yazığın artmışdı kədəri, qəmi,
Gözaltı etmişdi bədbəxt sitəmi,
İsa Müsavatı fəth edən kimi,
Atıb başqanlığı o, şaha keçdi.

İsa Qəmbərov:

Bu bosslar da sevmir maraq güdəni,
Sözsüz, saxlamazlar çıxıb gedəni,
İstefa verənlər küsdürdü məni,
Sən dirçəl, mənimki, bil, daha keçdi.

Əli Kərimov:

Gəldi partiyaya bir ağa kimi,
İşini apardı bir çağa kimi,
İsa qımıldandı tısbağa kimi,
Sandı Müsavatdan əjdaha keçdi.
İsa Qəmbərov:

İstədi özünü görə cürətdi,
O, ola bilmədi əsla sürətdi,
Cəbhədə o qədər bəd iş törətdi,
Əlinin işləri pəsdaha keçdi.

Əli Kərimov:

Siyasətçi kimi işləri bitdi,
İsanın yanından çoxları getdi,
İbrahim, Sülhəddin onu tərk etdi,
Qəmbərov nədənsə Pənaha keçdi.

İsa Qəmbərov:

Zirvə fəth eyləməz təkəsiz keçi,
Göazaltı etməkçün daimi heçi,
Əli bir sıravi, adi cəbhəçi,
Ancaq elə bildi bir düha keçdi.

Əli Kərimov:

O, yüksəliş üçün keçərdi candan,
Şükür ki, dağıldı, ay İsa, bandan,
Ali Sovet sədri olduğun andan,
Müsavat adlanan güruha keçdi.

İsa Qəmbərov:

Bürüdü vaxtında zəli cəbhəni,
Bu naqis eylədi dəli, cəbhəni,
O qədər dağıtdı Əli cəbhəni,
Cismən ölgünləşib, bir ruha keçdi.
Əli Kərimov:

Həmkarçün, vətənçün ölməyən İsa,
20 il sevinib-gülməyən İsa,
Bu gün bir iş görə bilməyən İsa,
Bir qədər düşünüb sabaha keçdi.

İsa Qəmbərov:

Cəbhə sədr tapdı lap bərbadını,
"Yurd" Əli taleyin gördü dadını,
"İslahatçı" qoyub Əli adına,
Tələsik o, şəxsi rifaha keçdi.

Əli Kərimov:

O, ucalıq saydı qocaldığını,
Duymadı quruma od saldığını,
İsa bəy görəndə tək qaldığını,
Vay-şivən qopardı, həm aha keçdi.

İsa Qəmbərov:

Burnundan töküldü bossun yeməyi,
Daim puça çıxdı Əlinin səyi,
Qadın üzvlər də atdı bu bəyi,
Mahizəri atıb, cəld maha keçdi.

Əli Kərimov:

Çox pullar göndərdi sinaqoq, kilsə,
Qapdı hamısını sanki bir lisa,
Duruş gətirmədi küçədə İsa,
Yerindən hoppanıb pah-paha keçdi.
İsa Qəmbərov:

Alışıb xaricin çərəzinə o,
Dözmədi bossların qərəzinə o,
Tutuldu quduzluq mərəzinə o,
Əli bəy "ah-vaya, vallah"a keçdi.

Əli Kərimov:

Söndürdü evlərdə əclaf çox şamı,
Çox evi çökdürdü, yıxdı çox damı,
İsa güllələtdi neçə adamı,
Tövbə edib "Allah-Allah"a keçdi.

İsa Qəmbərov:

Bəzi boss day-daylar qarşıladılar,
"Yurd"a yaxın soylar qarşıladılar,
Onu "qoluboy"lar qarşıladılar,
Bu adam xaricdə çox mıxa keçdi.

Əli Kərimov:

Xaricin qrantı mənə qalmadı,
"Bizdə qal dedilər" yenə qalmadı,
İsanın cibində heç nə qalmadı,
Rəqibin əlinə bir yaxa keçdi.

İsa Qəmbərov:

Son anda cəbhənin bortunda qaldı,
Qarnının doymayan qurdunda qaldı,
Cəbhədə tək quru "Yurd"unda qaldı,
Hesab istədilər, o, yaxa keçdi.

Əli Kərimov:

Başqanı pis gündə görüb qaçdılar,
İsanın üstünə hürüb qaçdılar,
Dostları istefa verib qaçdılar,
Azdan əl üzərək, o, çoxa keçdi.