“Demokratiya Uğrunda İttifaq" çökdü

Tahir Kərimli:

Heç də gətirmədi "DUİ"-nin baxtı,
Siyasi meydanda çox zəif çaxdı,
Qurumun qəflətən çevrildi taxtı,
"MAP" bu gedişlərdən çıxdı çox naşı,
Qaldıra bilmədi "BAP" bircə daşı,
Mirmahmud dalınca tökdü göz yaşı.

Əhməd Oruc:

Mesajı ağaya ötürüb getdim,
"DUİ"-yə yüksəliş gətirib getdim,
Mən öz qurumumu götürüb getdim,
Qəlbimə salmadım əsla təlaşı.

Tahir Kərimli:

Əyrilərlə oldun, tapmadın düzü,
Qoşub böyrünüzə yalançı yüzü,
Tələsik tərpənib tökmüsən gözü,
Düzəldə bilmədin əsla sən qaşı.

Əhməd Oruc:

Çox qərargahlara nəm balaq asdım,
Ancaq "DUİ"-yə də nəhs zolaq asdım,
Mirmahmud nə dedi, mən qulaq asdım,
Çıxmadım heç zaman mən ona qarşı.

Tahir Kərimli:

Radikal meyliniz lap şərə döndü,
Cüzi qazancınız qəhərə döndü,
Digər bloklar min şükürə döndü,
Sizin "DUİ"-nizdə sındı çox kaşı.

Əhməd Oruc:

"Bərəkallah" desən, hop da yaxşıdı,
Bir qədər düz olsa gop da yaxşıdı,
"MAP" da, "Azadlıq" da, "BAP" da yaxşıdı,
Ancaq Mirmahmudun ağrıyıb başı.
Tahir Kərimli:

Verilən tapşırıq zorba düşürdü,
Öhdənizə ancaq torba düşürdü,
Sizə daim boyat şorba düşürdü,
Mirmahmud yeyirdi şüyüdlü aşı.

Əhməd Oruc:

İndi asudəsən, çəkil bir tinə,
Nahaqdan özünü salma çətinə,
"DUİ"-də nə işin, get Vəhdətinə,
Ya da ki, söykənib qarnını qaşı.

Tahir Kərimli:

Səndən üstün sayıb bizi Mirmahmud,
İtirib arada izi Mirmahmud,
Düz bir il aldadıb sizi Mirmahmud,
Qabağına çəkib ləzzətli xaşı.

Əhməd Oruc:

Siyasi əzmin var, buyur ud bizi,
Qoruyur su, torpaq, yellə od bizi,
Əgər aldadıbsa Mirmahmud bizi,
O zaman 70-ə çatmaz heç yaşı.

Tahir Kərimli:

Hər bir kəs edirdi "DUİ"-nizə lağ,
Burda lazım deyil olmaq falçı, maq,
Çox qüsurlu idi sizin ittifaq,
Başa vurmayacaq demişdim qışı.
Əhməd Oruc:

Qəribə jestlərin qəlbə yatmadı,
Vəhdətin əməlli bir kök atmadı,
Müasir kotana gücün çatmadı,
Odur ki, Basqalda möhkəm tut xışı.

Tahir Kərimli:

Sonra öyünərsən, bir gəl mənə çat,
Sonra öz hücrəndə qəm-kədərə bat,
Kababı Mirmahmud ötürür rahat,
Sən də get şor ilə qatla lavaşı.

Əhməd Oruc:

Ümid daşa dəydi biz qaldıq darda,
Bunlar deyilməyib əsla qərarda,
Mirmahmud asudə oldu kənarda,
Bizə təklif etdi qovğa-savaşı.

Tahir Kərimli:

Mirmahmud yolundan sapdı birinci,
Sizin tək hərifi tapdı birinci,
Plovu, kababı qapdı birinci,
Sizlərə ötürdü boyat bozbaşı.

Əhməd Oruc:

Əfəlin birisən, bir qərarın yox,
Nə mülkün, nə malın, nə də varın yox,
Əynində bir təzə pal-paltarın yox,
Guya geyinirsən alı-qumaşı.
Tahir Kərimli:
"BAP"-ına, "MAP"-ına eylə sən diqqət,
Çətin ki, yarana qəlbində hiqqət,
Mirmahmud xeyli tox görünür, fəqət,
Alnında genəlib sifət qırışı.

Əhməd Oruc:

Həmişə ucadan sən salmısan səs,
Ancaq çox cəhdlərin olubdu əbəs,
Ey mənə nahaqdan rişxənd edən kəs,
Dünən gəmirirdin çöldə qamışı.

Tahir Kərimli:

Bir şeyi biryolluq başa düş barı,
Bizim partiyada həddən çox darı,
Gəlsəydin sən nazsız Vəhdətə sarı,
Biz təmin edərdik sizə barışı.

Əhməd Oruc:

Sözsüz, xəbərsizik öz ulumuzdan,
Sapmarıq heç zaman biz yolumuzdan,
Tutmağa ehtiyac yox qolumuzdan,
İnamla keçirik biz hər qarışı.

Tahir Kərimli:

Qane olmadınız heç zaman aza,
Bənzədiz siyasi meydanda qaza,
Artıq "DUİ"-niz də getdi güdaza,
Uğurla vururuq başa yarışı.

Əhməd Oruc:

Bizdə ləpir yeni, aşkar iz yeni,
Köhnə siyasətlə sizlər, biz yeni,
Daxilə xərclədik biz enerjini,
Sizlər ikiəlli qapdınız dışı.