Əli Kərimovun və İsa Qəmbərovun ermənilərə söykənməsi haqda ballada

Araz Əlizadə:

Onlar hər varlıdan manat istəyir,
Qadir Yaradandan talant istəyir,
Xaricdən bolluca qrant istəyir,
Onların gözləri örtülüb qanla,
Sərsəm liderciklər bir həyəcanla,
Saziş imzalayır Manukunyanla.

Razi Nurullayev:

Bossların payını get İsayla ye,
"Yurd"um ermənidən dram almır, çe,
Sözünü Müsavat başqanına de,
Bizim Əli bəyi əfv et, az danla.

Araz Əlizadə:

Bəyini utancaq, sadə qız sayma,
Əlini, İsanı Pənahsız sayma,
Onu o qədər də günahsız sayma,
Onunla birlikdə bossları yanla.

Razi Nurullayev:

Sənin xörəyində çatışmır heç duz,
Özü də soyuyub olubdu bumbuz,
Xaricdə kifayət qədər bossumuz,
Özünə yağlıca bir boss nişanla.

Araz Əlizadə:

Əli də, İsa da qalıb dalanda,
Sizi çox tutubdu kütlə yalanda,
Yerevandan bollu dram alanda,
Sən də liderin tək erməni banla.

Razi Nurullayev:

İstərdin xaricə bata damağın,
Ayazla çıxartdı xata damağın,
Gəlsəydi azacıq dada damağın,
Daşnakı tutardın baş ilə, canla.

Araz Əlizadə:

Xalqın mənafeyi başlıca amal,
Məncə, xarablaşıb sizlərdə kamal,
Eybi yox, iş görüb, pulunu da al,
Sənin yalmandığın düşməndi, anla,

Razi Nurullayev:

Nə İsa, nə Əli çəkilməz qəsddən,
Xaric keçiribdi bizləri testdən,
Boylanıb baxmasaq Yerevan üstdən,
Neyləyə bilərdik "Yurd"dakı qınla.

Araz Əlizadə:

Nə qədər şişdirdi nər dağarcığı,
Dağıdıb ölkədə ər dağarcığı,
İsa da, Əli də şər dağarcığı,
İndi üzləşiblər Hörmüz azmanla.

Razi Nurullayev:

Olmamış demokrat kəslərlə aram,
Ayazda düşüncə yoxdu bir qram,
Dollar tək, avro tək yaxşıdı dram,
Sənə kim pul verər donub susmanla?

Araz Əlizadə:

İsanın, Əlinin başı üstə çən,
Dünyaya bizim tək baxana əhsən,
Çəkin gözünüzü ABŞ-dan, qəsdən,
Ünsiyyət yaradın ali osmanla.

Razi Nurullayev:

Birisi irəli boş sinə verir,
Boss da üstünlüyü sırf dənə verir,
Manukunyan bizə xəzinə verir,
Çürük qoz verərlər yazı yazmanla.

Araz Əlizadə:

İsa da, Əli də boyun əyəcək,
Başları daşlardan-daşa dəyəcək,
Nə sən, nə liderin yüksəlməyəcək,
Ayaqlar altını dərin qazmanla.

Razi Nurullayev:

Ayaz siyasətbaz, sən özün tirsən,
Mənən yoxolarsan, Kremlə girsən,
Sən özün nahaqdan vaxt itirirsən,
Ayazı yoluxub, ayaq basmanla.

Araz Əlizadə:

Qoy vətəndə olum olmasın param,
Gülüb sevinərdi o daşnak Aram,
Çoxalıb artandı cibimdə param,
Düşmən sevinərdi adi sızmanla.

Razi Nurullayev:

Ayaz eşidəndə, bizdən küsürsən,
Başdan-ayağacan xalis kəsirsən,
Hazırda bir həsir-Məmmədnəsirsən,
Qəhrəman olmadın kəsib-asmanla.

Araz Əlizadə:

Bosslar yatağında siz yata-yata,
Tezcə uğradınız iflas-süquta,
Yetirə bilmədin, düzü, sübuta,
Hədəqədən çıxıb, xeyli qızmanla.

Razi Nurullayev:

Biz nəhəng bir dağıq, palçıq qaya sən,
Çətin sağ çıxasan yazdan yaya sən,
Ayazı qaçırdın Moskvaya sən,
Güncdə-bucaqlarda oğrun pusmaqla.

Araz Əlizadə:

Ağzına vurarlar, laxta qan gələr,
Nə qədər boss çoxdu qarnından gələr,
Daşnakın dramı burnundan gələr,
Artar ağrıların təkrar qusmanla.

Razi Nurullayev:

Ayazın önündə başını əydin,
Onunla birlikdə sən yerə dəydin,
Bir zaman sən özün yoluq cücəydin,
Bizlər əlləşirdik şirlə-aslanla.

Araz Əlizadə:

Qaçdı altınızdan bircə ilə miz,
Qadir olmadınız qoymağa bir iz,
Çox da uzaqlara getmədiniz siz,
Şüar etdiyiniz böhtan-yalanla.

Razi Nurullayev:

Çoxu zirvə bildi avazda səni,
Həmişə biz gördük dayazda səni,
Ucalda bilmədi Ayaz da səni,
Üzbəüz qalmısan indi dalanla.