Müxalifətin baş tutmayan mitinq sevdası

Fazil Qəzənfəroğlu:

Hər həftə mitinqə can atsalar da,
Ancaq yetmədilər heç də murada,
Çünki satılıblar bosslara, yada,
Onları çox sərəsəm lider tək tanı,
İstərlər alaraq versinlər canı,
"Əməkdar müxalif mükafatı"nı.

Arif Hacıyev:

20 il mitinqdə nəfəs almışıq,
Küçə yürüşündən həvəs almışıq,
Sizlərin əlilə qəfəs almışıq,
Sən yaman tapdadın "bəylər"i, "xan"ı.

Fazil Qəzənfəroğlu:

Pisdi bostan əkib bossla mif olmaq,
Mənfi ədalətdə qalıb kif olmaq,
Ayıbdı 20 il müxalif olmaq,
Çoxdan itirmisiz siz adı-sanı.

Arif Hacıyev:

Məqsədə piketdə bəzən çatmışıq,
Günlərlə meydanda olub, yatmışıq.
Küçə yürüşündə daş da atmışıq,
İğtişaşlar vaxtı dadmışıq qanı.

Fazil Qəzənfəroğlu:

Xalqa, elə qarşı olmusuz inad,
Pulu alan kimi açmısız qanad,
Xaricin dəstəyi, maliyyə, qrant...
Daim doldurmusuz illik planı.

Arif Hacıyev:

London, Paris, Roma bizə yol verir,
Sizləri görəndə faza nol verir,
Bizə əhali yox, xaric pul verir,
Kütlə dəstəkləyir hay-küy salanı.

Fazil Qəzənfəroğlu:
Həmişə tez sönər hay- küyə basan,
Tərsinə çevrilər həm qaynar qazan,
Meydandan çıxarmaq olduqca asan,
Sizin "mütəşəkkil" zəif klanı.

Arif Hacıyev:

Bizi qorxutmadı polis zopası,
Əlinin, İsanın möhkəm qafası,
Xeyir-dua verib Roma Papası,
Vatikan dəstəkçi seçib Milanı.

Fazil Qəzənfəroğlu:

Çox yağır etməyin Qərbdə yolları,
Heç xaric də sevmir müti qulları,
Atıb önünüzə xaric pulları,
Saldı boynunuza əfi ilanı.

Arif Hacıyev:

Elə ki, bozarıb tündə getmişik,
Vaxt olub yorulub kündə getmişik,
Çox uğur qazanıb öndə getmişik,
Kütlələr sevmirlər dalda qalanı.

Fazil Qəzənfəroğlu:

Başqan müavini desin qəzəli,
Digər yetkililər yığsın xəzəli,
Betonu vedrədə tutsun "Yurd" Əli,
İsa da fırlatsın tez-tez malanı.
Arif Hacıyev:

Mitinq cəhdimiz də çətin heç olsun,
Mümkün ki, bir qədər uğur gec olsun,
Bizlərdən çətin ki, zəhmətkeş olsun,
Bizim arxamızda bossun kalanı.

Fazil Qəzənfəroğlu:

Arif, tı idi başqanu pürrəngi çay day,
Mətni yazsaydı da Leonid Qayday,
Kömək etməkdə pas sizə boss dayday,
İndi dəstək üçün çağır xalanı.

Arif Hacıyev:

Lazımmı bizlərə bu umu- küsü?
Qovma üstümüzə tüstünü- hisi,
Biz yaxşı bilirik yaxşını- pisi.
Sən bizə göstərmə tini-dalanı.

Fazil Qəzənfəroğlu:

Mitinqlər üstündə sıxlaşır bulud,
Sizləri meydanda gözləyir sükut,
Sizin nəsibiniz əbədi süqut,
Gətirin bloka zurna çalanı.

Arif Hacıyev:

Əlbəttə, meydanda dolandıq hədər,
Bizə bəxş etmədi lütfünü qədər,
Qüsur buraxmaq da kifayət qədər,
Sən eşşəyi qoyub, döymə palanı.
Fazil Qəzənfəroğlu:

Yola salındınız siz "Cəngi" ilə,
İfratlar uduzdu son rinqi ilə,
Əlinin, İsanın mitinqi ilə,
Yenə var gücünlə püflə yalanı.

Arif Hacıyev:

Bizi uçuruma apardı Pənah,
Bir o müqəssirdi, ondadı günah,
Diqqət kəsilsək də, görmədik, vallah,
Biz ayaq altında dərin çalanı.

Fazil Qəzənfəroğlu:

Sizin aksiyalar sönük, bayağı,
Xalqın ürəyinə çəkdiniz dağı,
Sizi qəbul etməz paytaxt torpağı,
Dəfn yerinizdi keçmiş Kolanı.

Arif Hacıyev:

Sizin istəyiniz bəd tuş gətirmək,
Lüzumsuz Sarkozi, Corc Buş gətirmək,
Çətini meydanda duruş gətirmək,
Asan yada salmaq filan- filanı.

Fazil Qəzənfəroğlu:

Əskik olan yalnız kamalınızdı,
Solub-saralan da camalınızdı,
Ara qarışdırmaq amalınızdı,
Saldınız iğtişaş vaxtı talanı.

Arif Hacıyev:

Sən güman etmə ki, dalda qalarıq,
Kütləylə mitinqdə fikrə dalarıq,
Seçkidə bir neçə mandat alarıq,
Bir də təkrar etdik üzdə olanı.