Heç kim heç kimə qoşulmaq istəmir

Rauf Arifoğlu:

"Azadlıq" seçkiyə ayrı gedəcək,
"DUİ" opponeti sıyırıb gedəcək,
Başqan Müsavatı ayırıb gedəcək,
Blok Məcnunlara bir Leyli yoxdu,
Dəstək elektorat bir xeyli yoxdu,
Birləşmək həvəsi və meyli yoxdu.

Nurəddin Məmmədli:

Vahid bir tonqalda köz yaranardı,
Birlik qapısına göz yaranardı,
Blok da, birlik də tez yaranardı,
Sizlərdi ortaya atan hər feli.

Rauf Arifoğlu:

Susqun qurbağası gölündə qaldı,
Birləşmək həvəsi dilində qaldı,
"Azadlıq" Əlinin əlində qaldı,
Başqa bloklara çatmadı əli.

Nurəddin Məmmədli:

"Azadlıq" daxili bəhsindədi,
"DUİ" Mirmahmudun nəhsindədi,
Müsavat liderlik həvəsindədi,
Bunu bilən Əli olacaq dəli.

Rauf Arifoğlu:

İsanın siyasi beyini yoxdu,
Lalənin son dəbli geyimi yoxdu,
Blok yaranması rüşeymi yoxdu,
Bu gedişlə birlik yaranmaz, bəli!

Nurəddin Məmmədli:

Pənah siyasətə hopmaq bilməyir,
"VİP" Əli qrant da qapmaq bilməyir,
Sədrlik postundan qopmaq bilməyir,
Sərdar ADP-də çılğın bir zəli.

Rauf Arifoğlu:

"Azadlıq" İsaya yük gedəcəkdi,
Daşı ətəyindən tök, gedəcəkdi,
Sərdar bu seçkiyə tək gedəcəkdi,
Tam başa vurmamış bu cari ili.

Nurəddin Məmmədli:

İfrat beyinlərdə almaz, filizdi,
Rəhimin başında qalan gilizdi,
Əlinin, Lalənin nitqi qəlizdi,
İsanın tərtəmiz zəhərdi dili.

Rauf Arifoğlu:

Qəfil hücum üçün fürsət gözləyir,
Hücum planını daim gizləyir,
Özünü təsdiqçün Qərbi səsləyir,
İsa həmkarlara çox qurdu pəli.

Nurəddin Məmmədli:

"Azadlıq" aralı düşüb xaşından,
Çıxıbdı başqanın dili aşından,
Sərdar olubsa da Əli aşından,
Qaşıq verməyəcək ona heç Vəli.

Rauf Arifoğlu:

"DUİ" ətrafına çəkibdi çəpər,
Əli Lalə ilə blokda köpər,
Başqan bataqlığa düşübsə əgər,
Çətin dəf eyləsin palçığı, lili.

Nurəddin Məmmədli:

"Azadlıq"dı keçən mürəkkəb testdən,
Son vaxtlar düşübdü İsa bəy vesdən,
Bir təpər olmasa Uqo Çavesdən,
Yardım göstərəcək Sərdara Çili.

Rauf Arifoğlu:

Vəsait xarici çox sevəndədi,
Boss da sizin-bizim kimi bəndədi,
"Yurd" Əli ABŞ-da vay-şivəndədi,
Qrant gətirəcək üzünün çili.

Nurəddin Məmmədli:

"DUİ" də, İsa da oğru yoldadı,
Yəqin Pənahın da bağrı yoldadı,
İndi bir "Azadlıq" doğru yoldadı,
Bir Lalə düzünə işlədir mili.

Rauf Arifoğlu:

Əvvəl deyirdilər qara tası yox,
Hazırda siyasi bir vəfası yox,
İndi birincilik iddiası yox,
Dəyibdi İsaya durğunluq yeli.

Nurəddin Məmmədli:

Əliyə dəyənlər dostundan getdi,
Bəd yellər "DUİ"-nin mostundan getdi,
Elə ki, baş nazir postundan getdi,
Cibinə basmışdı Pənah da ləli.

Rauf Arifoğlu:

Hamımız sanırdıq bir dəmir səni,
Qərargaha gələn ilk əmir səni,
İsa bəy, Pənah da istəmir səni,
Ağla, göz yaşı tök, civildə, ləli.

Nurəddin Məmmədli:

İsa, seçicini indidən tanı,
Qaldırar üstünə Azərbaycanı,
Küləyi Şirvanı, dalğa Muğanı,
Seli-yağışı da qarsardı Mili.

Rauf Arifoğlu:

Gündə qərargahda özü dəmdi ki,
Avropa, sərgərdan, lap sitəmdi ki,
Seçici güclüdü, İsa kimdi ki?!
Bu qüvvə yıxıbdı dəvəni, fili.

Nurəddin Məmmədli:

Bivecdi, başqanın veci qalmayıb,
Sökülüb-tökülüb, içi qalmayıb,
Blok yaratmağa gücü qalmayıb,
İsa gücənərsə, sınardı beli.

Rauf Arifoğlu:

Aranı əməlli qatıb ki, İsa,
Siyasi günclərə yatıb ki, İsa,
O qədər dərinə batıb ki, İsa,
İndi nahaq yerə qazıyır gili.

Nurəddin Məmmədli:

Son vaxtlar artmaqda başqanın fəndi,
Çoxunun dəyişib dövranı indi,
Qursa da möhkəm bir Müsavat bəndi,
İsanı aparar "Azadlıq" seli.