“Altılar”ın Avropa sərgüzəştləri

Mirzə Qərənfil:

Arzuları sinələrdə köz tutub,
Hər birini dağdan ağır söz tutub,
Radikallar Avropaya üz tutub,
Heç birisi arzu-kama yetmədi,
Dollar dəsti arasında itmədi,
Üzlərini ayaqlara sürtmədi.

Sərdar Cəlaloğlu:

Avropada hər şey axarla axır,
Adamlar içməkdə həm viski, çaxır,
Qurumlar bizlərə pis gözlə baxır,
Məqsədimiz irəlidə getməkdi.

İsa Qəmbərov:

Müsavatım "altılar"dan biridi,
Digər beşi bizlərdən çox geridi,
Bu Avropa üstümüzə yeridi,
Bizə verdikləri quru ətməkdi,

Əli Kərimov:

İsa durub öz Müsavat atında,
Sanır özün göyün yeddi qatında,
O, dursa da "altılar"ın altında,
Hər saniyə marağını güdməkdi.

İqbal Ağazadə:

Avropada bizi sayan olmadı,
Heç bir ciddi kömək, həyan olmadı,
Bizi ifrat kişi sayan olmadı,
Qaysaq bağlamayan yara qərtməkdi.

Lalə Hacıyeva:

Avropa bəyənər radikal olsaq,
Fəqət, bəyənməzlər şil-topal olsaq,
Daim qapazlarlar, əgər mal olsaq,
Başlıca vəzifə qurub-tikməkdi.

Əli Əliyev:

On liderdən onuncusu özüməm,
"Altılar"ın sonuncusu özüməm,
Özlüyümdə ağ-qaralı gözüməm,
Radikalın aqibəti çökməkdi.

Sərdar Cəlaloğlu:

Qərb baxmaqda bizə üstdən aşağı,
Həm də Şərqə kəsilməkdə Qərb yağı,
Radikallar bərkitməsə qurşağı,
Peşəsi nəhs bülbül kimi ötməkdi.

İsa Qəmbərov:

Hamı baxır altdan-altdan tox bizə,
Nahaq yerə atır güllə, ox bizə,
Qurumlarda qəti maraq yox bizə,
Tövsiyələr əriyərək bitməkdə.

Əli Kərimov:

Bu gün mən də Avropaya əl açdım,
Qrant umub pardaxlanıb gül açdım,
Donorları görüb pulçün dil açdım,
Bossun işi cibimə pul tökməkdi.

İqbal Ağazadə:

Avropada bizə fikir verən az,
Bir çox bossun özü xəsis, başı daz,
Biz onların qarşısında qoyun, qaz,
Məqsədimiz ciblərini sökməkdi.

Lalə Hacıyeva:

Avropanı ələ alaq biz gərək,
Özümüzə tabe edək tez gərək,
Bunun üçün bizə çoxlu göz gərək,
Avropadan həm də nəzər çəkməkdi.

Əli Əliyev:

"Altılar"la mən də getdim xaricə,
Mənə kömək eyləmədi dəriçə,
Qorxurdum ki, bosslar məndən sürüşə,
Hər biri də polad kimi tökmədi.

Sərdar Cəlaloğlu:

Onlarda Rusiya arağı yoxdu,
Bosslarda heç saqqal darağı yoxdu,
Xaricin bizlərdə marağı yoxdu,
Arxamdan vurulan rezin çəkmədi.

İsa Qəmbərov:

Bizi qəbul etmir burda bir qurum,
Arada yaranıb dərin uçurum,
Onunçün xoş keçmir heç bircə turum,
Burada üstümdən bir quş səkmədi.

İqbal Ağazadə:

Mənim Avropada bəxtim gətirmir,
"Ümid"də verdiyim əhdim gətirmir,
Bossdan pul istəmək cəhdim gətirmir,
Heç bir boss tarlamda qrant əkmədi.

Lalə Hacıyeva:

Liberal güc üçün qrant lazımdı,
Pul qazanmaq üçün talant lazımdı,
Bossların özünə qanad lazımdı,
İndi qrantlar da bütöv, tökmədi.

Əli Əliyev:

Mən ölkədə işimizi pislədim,
Oxucular, sizdən nəyi gizlədim,
Bosslarımdan çoxlu qrant gözlədim,
Bağlamama bir avro da bükmədi.

Sərdar Cəlaloğlu:

Bunu yaxşı bilir Moşu, Söylü də,
Bizə vermək istəmirlər xeyri də,
Müsavatın "Azadlığ"a meyli də,
Radikalın tarixində çökmədi.

İsa Qəmbərov:

Qarğıdalı cadını da görmüşük,
Jımıxların dadını da görmüşük,
Avropanın adını da görmüşük,
Onlar bizə nəzərini dikmədi.

İqbil Ağazadə:

Müxalifət dilimizdən bezibdi,
Radikallar ölümüzdən bezibdi,
Avropa da əlimizdən bezibdi,
Ölkəmizdə bir qurum da tikmədi.