İsa Qəmbərov yerinə Qubad İbadoğlunu təyin edərək, başqanlıq postunu tərk edir

Mirzə Qərənfil:

İstefa verməyi İsa yubatdı,
Siyasi varisi, bizcə, Qubaddı,
Deyirlər bu adam qurumu satdı,
Müsavat İsanı pisləyir yaman,
Çoxusu get deyə bizləyir yaman,
Onlar yeni sədr gözləyir yaman.

İsa Qəmbərov:

İrəli sürübdü üzvünü Divan,
Qubad İbadoğlu olacaq başqan,
Mən başqan deyiləm daha bu andan,
Məni bədxahlarım izləyir yaman.

Qubad İbadoğlu:

Mən Divan üzvüyəm, Qubaddı adım,
Sədrçün pis adam, əsla, olmadım,
Mənə nə kim kişi, kimlərdir xadım,
İsa başqanlığa səsləyir yaman.

İsa Qəmbərov:

Bizim Müsavata aşiqsən özün,
Divanda ən uzun qaşınsan özün,
Həm çox səliqəli, həm şıqsan özün,
Bədxahlar ardınca bəd deyir yalan.

Qubad İbadoğlu:

Ay İsa, sən məni başqan elan et,
Sonra üsulluca istefaya get,
Bossların yanına gedib dil-dil öt,
Dostlar budağını çox əyir, yaman.

İsa Qəmbərov:

İqtisadiyyatıdır sənətin sənin,
Yoxdur bu sahədə qiymətin sənin,
Nisbətən yaxşıdır səhhətin sənin,
Əgər xəstəsənsə, tez bəyir, yaman.
Qubad İbadoğlu:

Deyir başqanını danana lənət,
İnəyin qısırsa, danana lənət,
Xəyanət edirsə, canana lənət,
Bu yerdə deməli bir şeir yaman.

İsa Qəmbərov:

Xətrini istərəm dünyalarca mən,
Başqan da, edərəm düşüb borca mən,
Şütüyə bilmirəm, bəlkə, sayca mən,
Ancaq verəcəyəm mən xeyir yaman.

Qubad İbadoğlu:

Aldım müdriklərdən elmi, dərsi mən,
Gəzdim başqanımla cümlə ərzi mən,
Əzbərdən bilirəm düzü-tərsi mən,
Atırlar yolumun üstə tir yaman.

İsa Qəmbərov:

A Qubad, gözünün yaşını qurut,
Nifrinlə lənəti bilmərrə unut,
Hamının yanında başını dik tut,
Axıtma alnından qətrə tər yaman.

Qubad İbadoğlu:

Qolum qırılanda, qanadım oldun,
Mənə başqan dedin, həyatım oldun,
Siyasət elmində ustadım oldun,
Çoxları atıbdı mənə şər yaman.

İsa Qəmbərov:

Birtəhər dəyirsən, Qubad, gözünə,
Baxsaydın həmişə mənim sözümə,
Mən varis edərdim səni özümə,
Mənə gəc baxmaqda bir nəfər yaman.

Qubad İbadoğlu:

Əzizim olarsan, başqan seçilsəm,
Daim öyünərdim, çuşqan seçilsəm,
Qazanc gətirərdim, toçkan seçilsəm,
Verərdim daimi bar-bəhər yaman.

İsa Qəmbərov:

Qafil gözlərinin odun yığardım,
Qrant gəlirinin şotun yığardım,
İpinin üstünə odun yığardım,
Əgər verməsəydin bol qəhər yaman.

Qubad İbadoğlu:

Məndən çox sanballı sədr olardı,
Bütün Müsavata çətir olardı,
Dünyada qalan da qədir olardı,
Bağlı qalmasaydı, min dəftər yaman.

İsa Qəmbərov:
Mən bu qənaətə özüm gəlmişəm,
Qəlbimdə mükəmməl əzm gəlmişəm,
Qubad, edib sənə təzim gəlmişəm,
Üzümü qarsmaqda mərəz, çər yaman.

Qubad İbadoğlu:

Mən bir iqtisadçı, zəyim çatışmır,
Qəmbərova bənzər bəyim çatışmır,
İşimi bilənəm, nəyim çatışmır,
Qırat xülyalıyam, qatır-xər yaman.

İsa Qəmbərov:

Başqan ordenini döşünə taxdım,
Ay Qubad, mən sənin arxınla axdım,
Spiker olarkən, keçmişə baxdım,
Xoşuma gəlmişdi Mircəfər yaman.

Qubad İbadoğlu:

Özüm Divan üzvü, adi bir bəndə,
Başqan təklifiylə salıbdı bəndə,
Xalqın deyiminə şərikəm mən də,
Arvad pis olarsa, olar ər yaman.

İsa Qəmbərov:

Hizbullahçı ollam, Livan seçərsə,
Rostova gedərdim, İvan seçərsə,
Başqan seçilərsən, Divan seçərsə,
Səni süzməkdədi o Qəfər yaman.

Qubad İbadoğlu:

Tutaydım başqanın kürsüsünü mən,
Atardım tənbəllik mürgüsünü mən,
Gözlərəm uğurlu gerçək günü mən,
Minərdim "Mersedes", at, kəhər yaman.