İsa Qəmbərov qurultaya qədər Müsavatdan kənarlaşdırılacaq

Rauf Arifoğlu:

Qaynamır qurumda isti qazanı,

Kamil bir ekspert bunun yozanı,

Müsavatda heç kəs sevməz İsanı,

Onu atacaqlar başqan postundan.

Arif Hacıyev:

İsa salmamışdı bizi çətinə,

Uyğundu ruhumuz niyabətinə,

Məftunuq biz onun siyasətinə,

Yoxdu məhrum edən onu çustundan.

Rauf Arifoğlu:

İsa enəcəkdir, desən də ucal,

Başının üstündə dolanır acal,

Qurultaya qədər verilməz macal,

Raması ayrılar azman mostundan.

Arif Hacıyev:

Təpədən-dırnağa qəlbin pas, kir ki,

Daim qəlbimizi kədər didir ki,

İsa bəy bu günlər pəjmürdədir ki,

Sənin kimiləri çıxdı rastından.

Rauf Arifoğlu:

Əsla, inanmayın, itib geniyəm,

Şər-xata işlərdə hələ yeniyəm,

Sizin yanınızda mən şükrəniyəm,

Çoxu ziyan görüb siz tək dostundan.

Arif Hacıyev:

Burda iş dovşana, filə də qalıb,

Gedənlərin çoxu tələdə qalıb,

Mənim tək təmizlər hələ də qalıb,

Zaylar da çox çıxıb İsa çastından.

Rauf Arifoğlu:

Hələ başqanlıqdan əlim çıxmadı,

Müsavatdan doğru təlim çıxmadı,

İsadan siyasi müəllim çıxmadı,

Aldım öz dərsimi Metedən, Hunndan.

Arif Hacıyev:

Bizi çox sevəydi bu boss əmilər,

Qrantla dolsaydı dibsiz gəmilər,

Bizdən uzaqlaşdı sizin kimilər,

Dəyirmançıyıq çün, üstümüz undan.

Rauf Arifoğlu:

Əvvəl belinizdə çox ölçdü şallaq,

İndi atırsınız önündə şıllaq,

Ona görə gəlir kəlləmayallaq,

Səngər düzəltdiniz İsaya yundan.

Arif Hacıyev:

Mən mədəni bitki, sözsüz, çayır sən,

Özündən yeni bir başqan qayır sən,

Qurultaya şəxsən təşrif buyur sən,

Vakant sədr postu vurmaqda fantan.

Rauf Arifoğlu:

Boss nə göndərdisə, basıb yediniz,

Siz yemi tavandan asıb yediniz,

Biri-birinizə çox bəy dediniz,

Axırda siz məhrum oldunuz xandan.

Arif Hacıyev:

Başqanın postundan çəkib gözünü,

Demə, sədr olarsan, öymə özünü,

Püflə sən havaya öz boş sözünü,

Hələ ki, başqandı İsa bu andan.

Rauf Arifoğlu:

Bilirəm, küt gedir təndirdə kündən,

Bəxtiniz bəd gələr sizin o gündən,

İsa atılacaq öz kürsüsündən,

Müsavat olacaq sizlərə zindan.

Arif Hacıyev:

Çoxu qərargaha diyirləyir tir,

Sən də öz tövləni adlandırma pir,

İsa Müsavatda bizi sümürür,

Sənin nə vecinə, çıxmısan qından.

Rauf Arifoğlu:

Dayazsan, dərdini dərin verərsən,

Kədərli keçmişi şirin verərsən,

Sən özün yaradan irin verərsən,

İsa da boğular kükrəyən qandan.

Arif Hacıyev:

Meydanda danışır əsil klan tək,

Daldada bizləri çalır ilan tək,

İsa yalanını deyir yalan tək,

Etiraf edim ki, bezmişik ondan.

Rauf Arifoğlu:

Bacarsan başqana bir qada yetir,

İsa bir agentdir, sübuta yetir,

Müsavat qarışıq süquta gedir,

Başda İsa duran yarıtmaz bandan.

Arif Hacıyev:

Döndüm dilənçiyə toçkam olandan,

Boss mənim çəlləyim, boçkam olandan...

İsa Müsavata başqan olandan,

Dolmayıb heç çantam, düşmüşəm candan.

Rauf Arifoğlu:

Qarın buraxdım, sən pis günə qaldın,

İsanın yanında yaman alçaldın,

Mübarək, qilü-qal içində qaldın,

Vaxtında sürüşüb çıxdım oyundan.

Arif Hacıyev:

Fəzilət sizlərdə, bizdə qabahət,

Adi qəpik-quruş bizimçün qəhət,

İsa çaşan gündən itibdi cəhət,

Burda kəl seçilmir adi qoyundan.

Rauf Arifoğlu:

Qışın oğlan çağı ömür yazında,

Bir tük də qalmamış onun dazında,

Süqut tüpürcəyi İsa ağzında,

Sənin də üstünə düşüb suyundan.

Arif Hacıyev:

Bosslardan ibarət çox tuzu vardır,

İki cüt bananı, bir qozu vardır,

Deyirlər xaricdə nüfuzu vardır,

Çoxları yapışıb İsa soyundan.

Mirzə QƏRƏNFİL