Mehriban Vəzir: “Fikrət Qoca YAP şairidir”

Fikrət Qoca:

Siyasilər içrə sondadı yerin,

Kəllə işlədərək düşünsən dərin,

O bir yadigarı Ulu Öndərin,

Fəxr eyləyirəm ki, YAP şairiyəm.

Mehriban Vəzir:

Yaxşısa mitinqə bəndə olardım,

Onunla bir canda, təndə olardım,

Dedi sırasında mən də olardım,

Fikrət Qoca xalis YAP şairidi.

Fikrət Qoca:

Açıq deyəcəyəm sözün düzünü,

Bəyəndim mən Milli Lider sözünü,

Təqdir eyləmişəm YAP-ın özünü,

Fəxr eyləyirəm ki, YAP şairiyəm.

Mehriban Vəzir:

Onlarla ziyalı aramızdadı,

Uğursuzluğumuz yaramızdadı,

Musa Yaqub özü sıramızdadı,

Fikrət Qoca xalis YAP şairidi.

Fikrət Qoca:

Olubdu sizlərə bir yük etimad,

Nəzərinizdə bir tük etimad,

YAP şairi olmaq böyük etimad,

Fəxr eyləyirəm ki, YAP şairiyəm.

Mehriban Vəzir:

Plovun üstündə beçə bizimdi,

Bossun göndərdiyi külçə bizimdi,

Mərkəzi meydanlar, küçə bizimdi,

Fikrət Qoca xalis YAP şairidi.

Fikrət Qoca:

Sizinki basabas, dava-davadı,

Təqdir etmirsiniz elmi-savadı,

YAP-ın meyli daim inkişafadı,

Fəxr eyləyirəm ki, YAP şairiyəm.

Mehriban Vəzir:

Keçmiş xülyaları yaşatmaq bizdə,

Küçə-meydanlara baş atmaq bizdə,

Polisə, əsgərə daş atmaq bizdə,

Fikrət Qoca xalis YAP şairidi.

Fikrət Qoca:

Sədrinə denən ki, qarnını borda,

YAP-dan dəstək gəlir bu doğma yurda,

Lider ideyası harda, mən orda,

Fəxr eyləyirəm ki, YAP şairiyəm.

Mehriban Vəzir:

Radikal durumda post bizimlədi,

Hər yerindən duran dost bizimlədi,

Bu gün Qərbdən gələn boss bizimlədi,

Fikrət Qoca xalis YAP şairidi.

Fikrət Qoca:

YAP xilas yolunu görür əməkdə,

Gələcək uğurçün bir işləməkdə,

YAP xalqı, xalq YAP-ı dəstəkləməkdə,

Fəxr eyləyirəm ki, YAP şairiyəm.

Mehriban Vəzir:

Bişirib yeyərik biyana kimi,

Bossdan töhfə allıq tiyana kimi,

Gedərik mitinqdən üsyana kimi,

Fikrət Qoca xalis YAP şairidi.

Fikrət Qoca:

YAP-la dostluq edir hazırda qitə,

Sanma, içinizdə problem bitə,

YAP-ın sıraları artır get-gedə,

Fəxr eyləyirəm ki, YAP şairiyəm.

Mehriban Vəzir:

Mitinqdən mitinqə keçib adlarıq,

Küçə-meydanlarda tonqal odlarıq,

Bu xalqa, millətə yaban, yadlarıq,

Fikrət Qoca xalis YAP şairidi.

Fikrət Qoca:

Xalqın qarşısında hamar yamac, dik,

Bir an xalqdan uzaq dura bilmərik,

YAP-ın mövqeyinə milyonlar şərik,

Fəxr eyləyirəm ki, YAP şairiyəm.

Mehriban Vəzir:

Tədbir keçirmərik şəhərdən kənar,

Mərkəzi meydanda dəstəkçilər var,

Üzvlər durubdu sırada naçar,

Fikrət Qoca xalis YAP şairidi.

Fikrət Qoca:

Taktiki gedişlər sizi silkələr,

YAP-la münasibət qurur ölkələr,

YAP-ı dəstəkləyir bütün bölgələr,

Fəxr eyləyirəm ki, YAP şairiyəm.

Mehriban Vəzir:

Bizə lazım deyil çəmən, bağça-bağ,

Tərəqqi qəlbimə çəkməkdə min dağ,

Başlıca istəkdir yıxmaq, dağıtmaq,

Fikrət Qoca xalis YAP şairidi.

Fikrət Qoca:

Mitinq deyirsiniz payızda, yayda,

Məhv edib uçurmaq sizlərdə qayda,

YAP bu gün veribdi xalqa çox fayda,

Fəxr eyləyirəm ki, YAP şairiyəm.

Mehriban Vəzir:

Bizim sədrlər boss suyu içibdi,

Küçə yürüşləri yolu seçibdi,

Poetik təfəkkür vaxtı keçibdi,

Fikrət Qoca xalis YAP şairidi.

Fikrət Qoca:

Bizə lazım deyil sizin tək qəmxar,

Çoxları olmaqda quruma həmkar,

YAP-çılar bu gün də nikbin, əzmkar,

Fəxr eyləyirəm ki, YAP şairiyəm.

Mirzə QƏRƏNFİL