“6-lar” “İP”-i qırdıqlarını iddia edirlər

İqbal Ağazadə:

Əliyə biz məhəl qoymuruq daha,

İsa ifratlara gəlməkdə baha,

"6-lar"ın özü əsil əjdaha,

"İP" duruş gətirməz qabağımızda.

Sərdar Cəlaloğlu:

Biz "İP"-siz çıxarıq hər bir yoxuşu,

Bizim "6-lar"ın vurub naxışı,

Hər biri Əlidən, İsadan yaxşı,

Düz altı lider var tabağımızda.

İqbal Ağazadə:

Təmiz su içərik Şollardan artıq,

Pullar qazanarıq pullardan artıq,

İsaya verilən dollardan artıq,

Bosslar pul atacaq çanağımıza.

Sərdar Cəlaloğlu:

Deyirəm, sevincdən barı göz dolsun,

"6-lar" sevinər bircə tez dolsun,

İncimərik təki cibimiz dolsun,

Şillə də vursalar yanağımıza.

İqbal Ağazadə:

Altı ehtiyac var altı tumara,

Bossdan nə almışıq qoyub qumara,

Əlini, İsanı atıb kənara,

"İP"-i oturdarıq budağımızda.

Sərdar Cəlaloğlu:

Etina etmirik keçələ, daza,

Qane də olmuruq İsa tək aza,

Bizi inkar edən siyasətbaza,

Bir yer də vermərik otağımızda.

İqbal Ağazadə:

Onlarda ciyərlər, dalaq tutulur,

Sağ adam edilib çoloq, tutulur,

"İP"-də həngamədən qulaq tutulur,

Biz rahat yatırıq yatağımızda.

Sərdar Cəlaloğlu:

Əli Orucovu AMİP-dən qopar,

"VİP" Əli bizimlə olubdu topar,

Nə qədər Mirmahmud, İqbal, Əvəz var,

Biz nicat görürük sabahımızda.

İqbal Ağazadə:

İsanı incidir varın ağrısı,

"Yurd"u təqib edir harın ağrısı,

Tutub "İP"-çiləri qarın ağrısı,

Otururuq rahat tifağımızda.

Sərdar Cəlaloğlu:

Edə bilməyəcək "İP" bizi pamal,

"6-lar" dadıblar ali hiss, amil,

Bizi dəstəkləyir bütün el, mahal,

Bu haqq Qazağımız, Yevlağımızda.

İqbal Ağazadə:

Mən niyə yalandan özümü yorum,

Bizi gözləməyir süqut, uçurum,

Nə "İP", nə də başa lüzumsuz qurum,

At oynada bilməz ovlağımızda.

Sərdar Cəlaloğlu:

Bizim altımız da hal əhli halıq,

Əsas silahımız nəvaziş, qılıq,

Digər qurumlara bizlər loyalıq,

Birinci "İP" bizim qınağımızda.

İqbal Ağazadə:

Biz iş görənlərik, söz, bəyanat az,

Ölüm xofu çoxdu, onda həyat az,

Bizim rəqiblərdə elektorat az,

Potensial çoxdu sınağımızda.

Sərdar Cəlaloğlu:

Bizə meyl etməkdə yüzlərlə mason,

Biz bunu saymırıq, əlbəttə ki, son,

Onların paltarı qırmızıfason,

Baxsınlar narıncı boyağımıza.

İqbal Ağazadə:

Qulağı kəsilmiş tazı olarıq,

Əmr etsə xaricin qazı olarıq,

Boss çoxlu pul versin, razı olarıq,

Şillə izi olsun yanağımızda.

Sərdar Cəlaloğlu:

Əli təkrar-təkrar cibi sevməsin,

Qoy xaric İsa tək tipi sevməsin,

İstəyirik, bosslar "İP"-i sevməsin,

Əl izi olsa da qulağımızda.

İqbal Ağazadə:

"İP"-ə müqavimət bizimçün ağır,

Burdan üstümüzə tənqidlər yağır,

Eşitsək, rəqiblər qazanıb uğur,

Sancılar başlanar dalağımızda.

Sərdar Cəlaloğlu:

Qoy dəysin faydası pulun, varın da,

İlin ən müxtəlif saatlarında,

"İP"-çilər qoy çapsın Qıratlarında,

Sakit oturarıq ulağımızda.

İqbal Ağazadə:

Qərb çevrilib indi həm göz dağına,

"İP"-çilər girirlər hey qılığına,

Böyük ehtiyac var boss bulağına,

Dirilik suyu var bulağımızda.

Sərdar Cəlaloğlu:

Pul ələ çatan tək vurarıq zərbə,

Dərhal başlayarıq rəqiblə hərbə,

Elə ki, əlimiz çatacaq Qərbə,

Biz "İP"-i qoymarıq talağımızda.

İqbal Ağazadə:

Bizi ötə bilməz zəif iki tip,

Onları irəli çəkən yalnız "İP",

İsada, Əlidə qüvvə tükənib,

Qüvvə daha çoxdu çolağımızda.

Sərdar Cəlaloğlu:

"İP"-dən çox yüksəkdə durmaqdayıq biz,

Bizə ilham verir çalxanan dəniz,

Tarlamız məhsuldar, həm də tərtəmiz,

İtib-batmamışıq alağımıza.

MİRZƏ QƏRƏNFİL