Radikallar heç vaxt birlik yarada bilməyəcəklər

Araz Əlizadə:

Hər biri zərərsiz adi bir tük ki,

Çiyinlərində var çox ağır yük ki,

Onlarda iddia elə böyük ki,

Yarada bilməzlər bir ciddi qurum.

Fuad Qəhrəmanlı:

Onlara güc verir dalğalı Xəzər,

Reytinqi artanda xarici bəzər,

"İP" təkrarsız, gözəl bloka bənzər,

Bizlərdə hələ ki, labüddü durum.

Araz Əlizadə:

Qəbristanda köhnə leş qurdalayın,

İş bacarmazsınız beş qurdalayın,

Limonlu çay içib diş qurdalayın,

Gedin siz çıtlayın çayxanada tum.

Fuad Qəhrəmanlı:

Bosslar qan dedilər, biz dərhal qandıq,

Qərb vəsait verdi lap sandıq-sandıq,

O qədər tükənməz qrant qazandıq,

Azdı səhrada da bu qədər toz, qum.

Araz Əlizadə:

Abrını ətəyə bükməkdə Əli,

Sənə yekə torba tikməkdə Əli,

Qrant çətinliyi çəkməkdə Əli,

Ay İsa, pul üçün sən xaricə cum.

Fuad Qəhrəmanlı:

Əli də, İsa da çox böyük zabit,

"İP"-ə toplaşanlar pak irfan zahid,

Köhnələr yerində dayanıb sabit,

Yeni liderlərə ilişər torum.

Araz Əlizadə:

"İP"-də yanmayacaq heç vaxt gur ocaq,

Olmaz münasibət, sözsüz ki, sıcaq,

Nə blok nə, birlik alınmayacaq,

Yeganə yeriniz dibsiz uçurum.

Fuad Qəhrəmanlı:

Bizə oxşamaqçün yarış, mod gedir,

Liderlər arası qızğın od gedir,

"İP"-də, "6-lar"da işlər xod gedir,

Sən get ASDP-ndə öz ağzını yum.

Araz Əlizadə:

Tezliklə işləri xitamlarsınız,

Səfehlər, naqislər, avamlarsınız,

Siyasətdən kənar adamlarsınız,

Sizə işləməkçün lazımdı bir SUM.

Fuad Qəhrəmanlı:

Nə başqa bir arzum, inayətim yox,

Həmkarlar yanında cinayətim yox,

Mənim liderlərdən şikayətim yox,

Bu gün rəvan davam etməkdə xorum.

Araz Əlizadə:

Sizin əlinizlə adi bir sancaq,

Yaxada mükəmməl dayanmaz ancaq,

Sizdə nə bir iclas, nə bir yığıncaq,

Nə də keçməyəcək heç bir dinc forum.

Fuad Qəhrəmanlı:

Mən belə olmuşam 20 il əvvəl,

Yükümü çəkməyə acizdi 10 kəl,

Özümü hiss etdim daim mükəmməl,

Çətinlik olsa da, çıxmamış şorum.

Araz Əlizadə:

Daimi peşəniz qalmaqal, nifaq,

Sizlər dağıdansız bloklar, tifaq,

Yarada bilməzsiz birlik, ittifaq,

İstəmirəm səni mən təkrar yorum.

Fuad Qəhrəmanlı:

İflasa apardıq doğmanı-yadı,

Bizə tay olmamış nə Hadı, Bıdı,

İsa da, Əli də inqilabçıdı,

Zirvədə dayanır o Tomas Morum.

Araz Əlizadə:

Ən yaxşı adınız siyasi oğru,

Heç vaxt dilinizdən çıxmadı doğru,

Yönünüz hazırda süquta doğru,

Sizlərin alnına nəhs möhür vurum.

Fuad Qəhrəmanlı:

Boss qrant vermədi, bu, bir zərbədi,

Niyyətlər, diləklər, sözsüz, hərbədi,

Bizim liderlərin yönü Qərbədi,

Kəfənim yırtılıb, çatlasın gorum.

Araz Əlizadə:

Liderlərdən gələn əzabdasınız,

Simi tarım olmuş mizrabdasınız,

Burunlu-qulaqlı girdabdasınız,

Sizə bir savabdı mənim bir çorum.

Fuad Qəhrəmanlı:

Hər bir opponentə hərif söylədim,

İsaya tərifi zərif söylədi,

Əliyə o qədər tərif söylədi,

Xeyli zədələnib başda şüurum.

Araz Əlizadə:

Hər gün qalmaqalda və "ÇP"-də siz,

Veyilləndiniz də LDP-də siz,

Gəlib məskunlaşın ASDP-də siz,

Sizin "İP"-inizdə mən blok qurum.

Fuad Qəhrəmanlı:

Haraya əl atdım xata yetişdi,

Əlidən də mənə qada yetişdi,

Nə İsanın bossu dada yetişdi,

Tıxacla qapandı bir qida borum.

Araz Əlizadə:

Sizin bazarınız bağlanıb "İP"-də,

Bir xeyir tapmazsan Əli tək tipdə,

İndi gəzməyəcək liderin cipdə,

Sən get avaralan, mən qulaq burum.

Fuad Qəhrəmanlı:

"İP"-dən çıxıb gedən lüt Pənahım var,

Kütlələr önündə yüz günahım var,

ASDP-çilərə etirafım var,

Az qalıb bu əskik yerimdən durum.

MİRZƏ QƏRƏNFİL