Pənah “İctimai Palata”da “Kölgə Kabineti” yaratmağa çağırır

Pənah Hüseynov:

Gözəl fikirləri qorutmalı "İP",

Özünü qurum tək yarıtmalı "İP",

"Kölgə Kabineti" yaratmalı "İP",

Geri qayıdaram mən də o zaman.

Ədalət Yusifov:

Söksün "palata"nı, eyləyibdi qət,

Keçmişdən qalıbdı onda bu adət,

"KŞ" qərarına göstərmir hörmət,

Pənah öz fikrində haqsızdı yaman.

Pənah Hüseynov:

Mən "İP"-i tərk etdim, görəndə batdım,

Hər bir tədbirində doyunca yatdım,

"Kölgə Kabineti" müsbətə addım,

"İP"-in içərisi pambıq yox, saman.

Ədalət Yusifov:

"İP" də təklifiylə sökülməyəcək,

Başına qrantlar tökülməyəcək,

Haraya üz tutsa çəkilməyəcək,

Pənahın başının üstündən duman.

Pənah Hüseynov:

Qafqaz dağlarında çəkərik kefi,

Mən əmin etmişəm hər iki şefi,

Qəbul etsəydilər "İP"-də təklifi,

Özüm təbə gəlib çalardım kaman.

Ədalət Yusifov:

Təhlükə yaratmır cinah sindromu,

Bu şəxs başdan-başa günah sindromu,

"İP"-də diqqət çəkmir Pənah sindromu,

"Təklif bəyənilər?" etmirəm güman.

Pənah Hüseynov:

Mən onu əzəldən saymışam məqbul,

Mənim bu ideyam verəcək məhsul,

Sözsüz ki, iddiam edilər qəbul,

Daim gerçəkləşir ürəyə daman.

Ədalət Yusifov:

Onu qəbul etməz nə İsa, Əli,

O, təklif də sürür gic, dəli-dəli,

Boşda qalacaqdı Pənahın əli,

Əli boşda qalar çox şeyi uman.

Pənah Hüseynov:

Qüdrətim artıqdı, "palata" sökər,

İnşallah, tezliklə "İP"-iniz çökər,

Qəbul edilməsə təklifim əgər,

Nə görkəmə düşər o zaman səman?

Ədalət Yusifov:

Adam var əməli hey başda qalar,

Pis əməl sahibi, bil, boşda qalar,

Yaxşı təklif verən yaddaşda qalar,

Sərsəm təklif verən edər ah-aman.

Pənah Hüseynov:

"İP" Qərbə meyilli, Şimal açıram,

Kiçicik hücrəmdə amal açıram,

İdeyam sönəndə, mən fal açıram,

Mənim köməyimə yetişir şaman.

Ədalət Yusifov:

Müstəqil olan kəs heç qul edilməz,

Jüridə pis təklif məqbul edilməz,

Sözsüz ki, təklifin qəbul edilməz,

O zaman qaralıb dəyişər siman.

Pənah Hüseynov:

Hazırda özümü xəcalət boğur,

Məndə ideyama bir şübhə doğur,

Taktiki gedişim qazansa uğur,

Məni ağuşuna alacaq iman.

Ədalət Yusifov:

Həyata keçməzdi niyyətin qəti,

Sən öz fikirinə gətir ən bədi,

Elə ki, təklifin gerçəkləşmədi,

Xaricə aparmaz səni bir liman.

Pənah Hüseynov:

Kütləşib azalsa siyasi zorum,

Qəbul eyləməzsə məni bir qurum,

Sınarsa "ideya generatoru"m,

Girib internetə taparam roman.

Ədalət Yusifov:

Amal xaralında çox kifləşibdi,

Taktiki gedişin xəfifləşibdi,

Artıq ideyan da zəifləşibdi,

Heç kəsi cəlb etmir sənin puç teman.

Pənah Hüseynov:

Mən liderlərinə çox vermişəm beh,

Dirçəltməz "İP"-i də heç bir xəfif şeh,

Sən "İP"-in adi bir üzvü tək səfeh,

Nəsə yaradacaq xəyala cuman.

Ədalət Yusifov:

Başının üstündə şimşək də çaxmır,

Nə İsa, nə Əli üzünə baxmır,

Səni bir qurum da yaxın buraxmır,

Əlindən alınıb AXP koman.

Pənah Hüseynov:

Həmişə əllərdə olubdu yaxam,

Olub doğulandan əynimdə çuxam,

Düz 20 ildi ağzı açığam,

Çıxıb siyahıdan ağzını yuman.

Ədalət Yusifov:

Salmaqda cismini dara buludlar,

Vurub ürəyinə yara buludlar,

Səni təhdid edir qara buludlar,

Gedib ayağına dolaşır tuman.

Pənah Hüseynov:

Nəyinə lazım ki, əyilim, çöküm?

Bəlkə istəyirsən abrını büküm,

Elə etmə sənə mən qarğış töküm,

Üstündə ağlayar ağbirçək maman.

Ədalət Yusifov:

Keçir dodağına köhnə demi sən,

At, öz yaddaşından İvan, Semi sən,

Yalandan demə ki, kabab yemisən,

Qalıb dodağında yediyin xaman.

Mirzə QƏRƏNFİL