Vurğun Əyyubov, Tofiq Yaqublu və Gülağa Aslanlı Müsavat başqanı olmaq istəyirlər

İsa Qəmbərov:

Dünən can deyənlər şərinə sənin,

Tüpürməyə hazır dərinə sənin,

Hətta göz dikiblər yerinə sənin,

Nə günə qalıbsan, ay İsa Qəmbər?!

Vurğun Əyyubov:

Bəsdi, partiyada çox oldun ağa,

Kürsünü mənə ver, gedim qabağa,

Yerinə namizəd Tofiq, Gülağa,

Olmazsan sən bizə tay, İsa Qəmbər.

İsa Qəmbərov:

Onlar adi halda qəlbə dəyirlər,

Hər bir təklifə də ağız əyirlər,

Həmkarlar getdikcə çox istəyirlər,

Bosslar da az verir pay, İsa Qəmbər.

Vurğun Əyyubov:

Keçmişdə lüzumsuz ağır daş idin,

Bossun hesabına bir əyyaş idin,

Əvvəllər bir qədər diribaş idin,

Son vaxtlar olubsan zay, İsa Qəmbər.

İsa Qəmbərov:

Meydanlar qəlbinə saldı atəşi,

İndi dost ətrafın olubdu vəhşi,

Sənə işıq saçar Qərbin Günəşi,

Gülərdi üzünə Ay, İsa Qəmbər.

Vurğun Əyyubov:

İndi Müsavatda sən adi yoluq,

Bossun yardım etmir, boşalıb tuluq,

Payızda işlərin olacaq şuluq,

Arxada qalıbdı may, İsa Qəmbər.

İsa Qəmbərov:

Yatıb, pusmağınçün tapılmır marıq,

Xeyli qocalıbsan, dişlərin mırıq,

Tüfəngin çaxmaqsız, xəncərin qırıq,

Kamana ilişib yay, İsa Qəmbər.

Vurğun Əyyubov:

Sən elə getmirsən, indi get belə,

Qura bilməmisən bir maket belə,

Keçirə bilmədin bir piket belə,

Yaman isti keçdi yay, İsa Qəmbər.

İsa Qəmbərov:

Düşündün məkrli, dindin məkrli,

Bir zaman danışdın sən dürsüz-dürlü,

Lap doğru deyirlər, Arazlı-Kürlü,

Dizdən aşağıydı çay, İsa Qəmbər.

Vurğun Əyyubov:

Qərbli bosslarına söylədin sağlıq,

Mitinqdə kütləyə eylədin maqlıq,

Xatırla, nə qədər etdin bədxahlıq,

Bir az iç limonlu çay, İsa Qəmbər?

İsa Qəmbərov:

Günah bağışlanmır islam dinində,

Qoy Tofiq Yaqublu qalsın gönündə,

Yıxılma Gülağa, Vurğun önündə,

Dur ayaq üstündə day, İsa Qəmbər.

Vurğun Əyyubov:

Çıxdın meydanlara fitnəylə-şərlə,

Hətta yaxalığın işlənib zərlə,

Mehriban olmusan ermənilərlə,

Çox dram göndərib hay, İsa Qəmbər.

İsa Qəmbərov:

Yardım eyləmirlər sənə misterlər,

Yeyib çörəyini, səni pislərlər,

Səni uçuruma atmaq istərlər,

Vermə həmkarlara hay, İsa Qəmbər.

Vurğun Əyyubov:

Özünün köhnəlmiş cipində qaldın,

Bossun pulsuzlaşmış cibində qaldın,

Həmişə zirvənin dibində qaldın,

Nəsibin olubdu vay, İsa Qəmbər.

İsa Qəmbərov:

Elə bil, divlərdən, cindən qaçırlar,

Yaxına gəlmirlər, gendən qaçırlar,

İndi həmkarlar da səndən qaçırlar,

Qışqırıb deyirlər vay, İsa Qəmbər.

Vurğun Əyyubov:

Az olubdu şirin, kişmiş günlərin,

Çox olub çaqqallı, çəpiş günlərin,

Qalıbdı keçmişdə keçmiş günlərin,

Qalan günlərini say, İsa Qəmbər.

İsa Qəmbərov:

Mitinqçün, yürüşçün açıqdı yollar,

Ayağın altında xalçalar, çullar,

Bir zaman bossların verdiyi pullar,

Cibində olmuşdu lay, İsa Qəmbər.

Vurğun Əyyubov:

Oldu önümüzdə boss verən yol buz,

Biz həmkarların da qalmışdıq yalqız,

Daim sən özünü düşündün yalnız,

Etdin hamımızı bay, İsa Qəmbər.

İsa Qəmbərov:

Həmkarlar əksinə nöş səlib gedir?

Pis nəzər qəlbi də lap dəlib gedir,

Yanına bu qədər boss gəlib-gedir,

Tapmadınmı bir dayday, İsa Qəmbər?!

Vurğun Əyyubov:

Çörək tapmasaq da, fətir taparıq,

Bossdan özümüzə çətir taparıq,

Müsavata bizlər sədr taparıq,

Et öz küncündə baybay, İsa Qəmbər.

İsa Qəmbərov:

Gözlər ucuzlaşmış bazarda qalsın,

Bədxah həmkarları azarda qalsın,

Taqımlar, batalyon bezarda qalsın,

Kömək etməz nə alay, İsa Qəmbər.

Vurğun Əyyubov:

Bizdə liderliyə var yaman həvəs,

Burda lazım deyil nə Lalə, Əvəz,

Səni biz şərəflə edərik əvəz,

Vurma burda sən valay, İsa Qəmbər.

Mirzə QƏRƏNFİL