İsa Qəmbərov öz yerinə başqan tapıb

Arif Hacıyev:

Arzular-ümidlər sonuncu solsun,

Əsası, İsanın cibləri dolsun,

Arzu Səmədbəyli qoy başqan olsun,

Müsavat üzvləri səf-səf düzülsün.

İsa Qəmbərov:

Uğursuzluq pisdi əzmdən sonra,

Ah-vay nəyə lazım təzimdən sonra,

Arzu bir başqandı özümdən sonra,

Ardınca gurlayan yüz dəf düzülsün.

Arif Hacıyev:

Sədri qurultayda Müsavat seçsin,

Qoy İsa çəkilib kənarda içsin,

Seçki demokratik qaydada keçsin,

Arzu edən kəslər hədəf düzülsün.

İsa Qəmbərov:

Real həqiqətdi gözə görükən,

Təyinat vaxtıdı, deyildi erkən,

Arzunu mən başqan təyin edərkən,

Ayaqlar altına sədəf düzülsün.

Arif Hacıyev:

Kədərdən İsa bəy əsa qucacaq,

Arzu da gah sola, sağa qaçacaq,

İsa bəy Arzuya stol açacaq,

Süfrəyə araqla qədəh düzülsün.

İsa Qəmbərov:

Arzuya hədiyyə gətirsin hərə,

Qoy narıncı libas geysin dağ-dərə,

Olsun yol yoldaşı sevinc bizlərə,

Arzu-diləklərə fərəh düzülsün.

Arif Hacıyev:

"Böhtandan qaçarıq" bizlər and içək,

Sərfəli həmkarçün biz candan keçək,

Ədalət yoluyla biz sədr seçək,

Süfrəyə həm ciyər, ürək düzülsün.

İsa Qəmbərov:

Keçərmi bir Novruz tonqal, alovsuz,

Arzu Səmədbəyli qarmaq-tilovsuz,

Keçsin ziyafət də kabab-plovsuz,

Süfrəyə də yavan çörək düzülsün.

Arif Hacıyev:

Ər üzvlər Arzunu şil, topal salar,

Sədaqətli qəlbə xiffət xal salar,

Müsavat üzvləri qalmaqal salar,

Küçə-meydanlara xərək düzülsün.

İsa Qəmbərov:

Arzunun üstündə dayanıb təkər,

Müsavat min ağrı, min mərəz çəkər,

Qurultay Arzunu seçməsə əgər,

Ortaya maneə, dirək düzülsün.

Arif Hacıyev:

İstəyir, qalmaqal salsın kənarda,

İsa da xəyala dalsın kənarda,

Avamlar, nadanlar qalsın kənarda,

Müsavatdan olan zirək düzülsün.

İsa Qəmbərov:

Rəqibi qısnayıb büzüşdürməkçün,

Çıxarıq Arzunu gəzişdirməkçün,

Bədxah namizədi əzişdirməkçün,

Çoxsaylı yaba, bel, kürək düzülsün.

Arif Hacıyev:

Sözsüz Müsavatda qurarıq qala,

Reytinq toplayarıq biz bala-bala,

Arzunu, İsanı atmaqçün dala,

Arzu edən şəxslər gərək düzülsün.

İsa Qəmbərov:

Biz də ziyafətdə bol viski içək,

Vaşinqton başına ələyər çiçək,

Qərb özü Arzunu dəstəkləyəcək,

Bossun göndərdiyi xörək düzülsün.

Arif Hacıyev:

Qərbin bossları tək həyanda qalsın,

Başqan namizədi ziyanda qalsın,

İsanın Arzusu o yanda qalsın,

Əsl haqlı namizəd qoy tək düzülsün.

İsa Qəmbərov:

Müsbət qiymət verək gərək bu irsə,

Arzu Səmədbəyli toxum verirsə,

Müsavat qazanı axım verirsə,

Bu qazan altında ələk düzülsün.

Arif Hacıyev:

Boss bizə vermir bir quzu qətiyyən,

Bizə yaxınlaşmır ruzu qətiyyən,

Başqan olmayacaq Arzu qətiyyən,

İstəyir dəhlizdə fələk düzülsün.

İsa Qəmbərov:

İsanı qoy heç kəs saymasın hərif,

Arzunu nahaqdan etmirəm tərif,

Qoymaram sədr olsun Rauf, ya Arif,

Minnətə onlarla mələk düzülsün.

Arif Hacıyev:

Bossun xörəyini qusar, çəkərik,

Kənardan marıqda pusar, çəkərik,

Qarşısına möhkəm hasar çəkərik,

İsa lap onlarla kələk düzülsün.

İsa Qəmbərov:

Möhkəm dayaq tapdım Herkel, Qros da,

Onu alqışlasın tanış da, dost da,

Arzu Səmədbəyli əyləşsin postda,

Tamaşaya arzu-dilək düzülsün.

Arif Hacıyev:

O, nə qovuq kimi üfürə bilməz,

Bizim təkliflərə tüpürə bilməz,

İsa yolu üstdən süpürə bilməz,

Yüz xəzri, gilavar, külək düzülsün.

İsa Qəmbərov:

Onlar başqan olsa itərəm izsiz,

İstərəm mən görəm rəqibi gözsüz,

Yekdillik qazanar təklifim, sözsüz,

İstər çirkin, istər qəşəng düzəlsin.

MİRZƏ QƏRƏNFİL