Lalə Hacıyeva fəal siyasətə qayıtmaq istəyir

Əvəz Temirxan:

Çox titrəyişlər var Lalə səsində,

Gənclik həvəsi var bas nəfəsində,

Otursun özünün "MBH"-sində,

Mənim ALP-mə sədr gəlməsin.

Lalə Hacıyeva:

Çox cangüdən ilə qorunur kartej,

Gəlirəm, özünə başqa qurum seç,

Səni müavin də götürmərəm heç,

ALP mənimdi, mənim olacaq.

Əvəz Temirxan:

Heç razı deyiləm qəlbimi üzsün,

Demədim gec gəlsin, ya da tələssin,

İstərəm ki, Lalə məndən gen gəzsin,

Burnuma laləli ətir gəlməsin.

Lalə Hacıyeva:

Gözlərim həsrətlə baxar zirvəyə,

Ürəyim ulduz tək axar zirvəyə,

ALP dirçəlib qalxar zirvəyə,

Lalə meydanlarda tufan salacaq.

Əvəz Temirxan:

Bizə əldən düşmüş bir pələng gəlsin,

Siyasi meydana xeyli ləng gəlsin,

O, bizə sədr yox, qonaq tək gəlsin,

Arxasınca ərzaq, fətir gəlməsin.

Lalə Hacıyeva:

Bir Əvəz pisləyib onu yanıdı,

Kütlə onu əsil lider tanıdı,

Siyasət Lalənin qanı-canıdı,

Lalə həmişəlik orda qalacaq.

Əvəz Temirxan:

İndi Laləsiz də doludu pətək,

Mən ona heç zaman açmaram ətək,

İstəmirəm keçmiş vaxtlardakı tək,

Lalə mənə ötür-ötür gəlməsin.

Lalə Hacıyeva:

Siyasət əbədi yolu olubdu,

Arvaddı, həmişə ulu olubdu,

Əvvəl də meydanı dolu olubdu,

Lalənin ətrafı yenə dolacaq.

Əvəz Temirxan:

Onun gəlişilə dolmaz heç kasa,

Mən də öz sözümü deyəcəm qısa,

Sədr gəlsə belə partiyamıza,

Üstümə nə örtük, çətir gəlməsin.

Lalə Hacıyeva:

Adama yapışan saqqız, qıram mən,

Deyirlər yaşlıyam, cayıdıram mən,

Yenə siyasətə qayıdıram mən,

Yamanca sümüyə dirənib bıçaq.

Əvəz Temirxan:

Bir iş görə bilməz qəfəssiz Lalə,

De kimə lazımdı həvəssiz Lalə?

Bir iş görə bilməz Əvəzsiz Lalə,

Əvəz qəbul etməz, Lalə gəlməsin.

Lalə Hacıyeva:

Qurdla qiyamətdə yaşıd olubdu,

Nə olsun bir qədər yaşa dolubdu,

Lalə həmişə də qalib olubdu,

O, bundan sonra da zəfər çalacaq.

Əvəz Temirxan:

Onda az da olsa qalmayıb həvəs,

İndi ALP-də möhkəmdi Əvəz,

Lalə çox qocadı, əmr verə bilməz,

Mən ondan cavanam, qoy özü desin.

Lalə Hacıyeva:

Əvəz çıxa bilməz yoxuşlarımı,

Əriyər, görəndə baxışlarımı,

Görəndə alovlu çıxışlarımı,

Əvəz susqun durub, fikrə dalacaq.

Əvəz Temirxan:

Onu yıxmaq üçün çox qurdum tələ,

Tələmdən qurtula bilməyib hələ,

Ona qrant verməz bircə boss belə,

Qoy Lalə oturub cibindən yesin.

Lalə Hacıyeva:

Daim gur axına qarşı mən axdım,

Yaman gözlüləri odlayıb yıxdım,

Elə ki, qayıdıb kürsümə çıxdım,

Əvəz yenə mənə açacaq qucaq.

Əvəz Temirxan:

Ailə qurarsa, qoca da almaz,

O, nə siyasətdə, meydanda qalmaz,

Bundan sonra Lalə heç yaxşı olmaz,

Adı pis olacaq, əlbəttə, pisin.

Lalə Hacıyeva:

Gözlərim qamaşmaz bir mayak olsa,

Altına girərəm bir dayaq olsa,

Əvəz qabağımda baş-ayaq olsa,

Onu partiyadan salaram qaçaq.

Əvəz Temirxan:

Qəlbi fikri kimi dar olub gedib,

Onun blankları saralıb gedib,

Lalə də mis kimi qaralıb gedib,

Fərqi çox adicə dəmirdən misin.

Lalə Hacıyeva:

Siyasi mənafe güdən olmuşam,

Həmişə köməyə yetən olmuşam,

Mən daim irəli gedən olmuşam,

Qabağımı kəsən xəstə və naçaq.

Əvəz Temirxan:

Lalə olmayacaq partiyaya paz,

O, nə nitq söyləməz, nə də cayıtmaz,

Heç vaxt partiyaya Lalə qayıtmaz,

Şübhəsi olmasın, əsla, heç kəsin.

Lalə Hacıyeva:

Hər bir kəsə bəlli adım-sanım da,

Rahat oturmuşam mən öz qınımda,

İşləmək istəsə Əvəz yanımda,

Şübhəsiz, sayaram onu mən qoçaq.

Mirzə QƏRƏNFİL