İsa Qəmbərov sədr postunda qala bilməyəcəyini başa düşür

İsa Qəmbərov:

Daha başqanlığa etmirəm güman,

İstərdim ki, mənə verələr aman,

Əgər olsa idi bir yeni imkan,

Mən sədr postunda yenə qalardım.

Qabil Hüseynli:

Müsavat səhnəsi qulamsız keçir,

İsa iclasda da kəlamsız keçir,

Son vaxtlar yanımdan salamsız keçir,

Salam versə idi, bəlkə alardım.

İsa Qəmbərov:

Hər gün almaqdayam bir yeni töhmət,

Həmkarlar verməkdə mənə min möhnət,

Versəydilər mənə yeni bir möhlət,

Başqan olmaq üçün fikrə dalardım.

Qabil Hüseynli:

Başqanda pisləşib əhvali-şərif,

Heç onun şəninə demədim tərif,

Məni saya salmır son vaxtlar hərif,

İsanın qəlbinə mən xof salardım.

İsa Qəmbərov:

Sədr olmayacam dedilər qəfil,

Yetkili gözündə olmuşam səfil,

Başqan qoysaydılar məni bircə il,

Qərbli boss cibini bir il yolardım.

Qabil Hüseynli:

Seçməyən kəslərə deyərdim əhsən,

Başqan kürsüsündə oturardım mən,

İsa seçilməsə başqan yenidən,

Şadlıq nəğməsini tarda çalardım.

İsa Qəmbərov:

Bəzisi də məndən intiqam alar,

Digərləri məndən çox geri qalar,

Başqa üzvlərdə sönükdü çalar,

Başqanlığa layiq müsbət çalardım.

Qabil Hüseynli:

Çətin əli çatsın bossa yenidən,

Dövrü də olardı qısa, yenidən,

Səhvən seçilsəydi İsa yenidən,

Hikkəmdən saralar, həm də solardım.

İsa Qəmbərov:

Siyahıda bədxah tək yazdı məni,

Xaricə getməyə qoymazdı məni,

Başqan olmasam, Qərb saymazdı məni,

Qəzəbdən saçımı dartıb yolardım.

Qabil Hüseynli:

Axacaq xaricdən çoxlu bal-şəkər,

Buraxıb İsada artıq dörd təkər,

Müsavatda sədr olsaydım əgər,

Mən özümə yeni dostlar bulardım.

İsa Qəmbərov:

Mənim niyyətimi pisliyə yozdu,

Artıq istəmirəm qardaşı, dostu,

Bataram çirkaba tərk edib postu,

Yəqin ki, dörd yanı qusub bulardım.

Qabil Hüseynli:

Bir dəfə demədi gərək mən gedəm,

Ona həmkarlarım verdilər sitəm,

Başqanlıq postuna qoysaydım qədəm,

Mən də kamilləşər, aqil olardım.

İsa Qəmbərov:

Şəxsiyyətim buna, həm fərdim buna,

Tab da gətirərdi qəm-dərdim buna,

Başqan olmasam da dözərdim buna,

Xaricə qrantsız, pulsuz ulardım.

Qabil Hüseynli:

Dərdini daşıya bilməz bir gəmi,

Onsuz da artıbdı kədəri-qəmi,

İsa partiyanı tərk edən kimi,

Daim sataşardım, onu dolardım.

İsa Qəmbərov:

Heç mənim özümçün olmazdı asan,

Mənim damarımda kükrəyərdi qan,

Kimsəni görsəydim postumda başqan,

Qəflətən qocalar, yaşa dolardım.

Qabil Hüseynli:

Sevinərdim bizdən kənar qaçsaydı,

Partiyadan kənar mazaqlaşsaydı,

İsa Müsavatdan uzaqlaşsaydı,

Mən oruc tutardım, namaz qılardım.

İsa Qəmbərov:

Bir dəfə baxmayıb onlar tərəfə,

Nifrin boşaldardım, sözsüz, hədəfə,

Şans versə idilər sonuncu dəfə,

Bütün rəqibləri sular, sulardım.

Qabil Hüseynli:

Təhdid eyləməkdə hər gün tip bizi,

Narahat etməkdə bomboş cib bizi,

İsa başqanlığı bezdirib bizi,

Mən özüm xaricdən alardım yardım.

İsa Qəmbərov:

Dollar-sent tükənib, qəpik vurarlar,

Mənə iclaslarda çəkip vurarlar,

Adama nə qədər təpik vurarlar,

Kobud təpiklərdən ağrıyır ardım.

Qabil Hüseynli:

Bizlər mum edirik möhkəm dəmiri,

Tezliklə qovarıq başqan Şümürü,

Qubad İbadoğlu onun kumiri,

Deyir münasibdi Müsavat sortum.

İsa Qəmbərov:

Sıravi üzvlərə qatsalar məni,

Həmkarlar çox ucuz satsalar məni,

Postumdan qoparıb atsalar məni,

İstərəm yerimə Qubadı dartım.

Qabil Hüseynli:

O, burda olduqca çox baş aparıb,

Öz başqanlığıyla dərinə varıb,

İsa hamımızı təbdən çıxarıb,

Az qalıram onun qarnını yortum.

Mirzə QƏRƏNFİL