Sərdar Cəlaloğlu “Yol xəritəsi”nin uğuruna inanır

Sərdar Cəlaloğlu:

Mənim bəyəndiyim "Yol xəritəsi",

Narahat etməsin qoy heç bir kəsi,

Yayılsın qoy bu xoş layihə səsi,

Uğura aparır bizi bu plan.

Nurəddin Məmmədli:

Səbəbkar bir odur biz pisi görsək,

Göstərib Sərdara "İP"-çilər dirsək,

"YX"-yə biz hədsiz üstünlük versək,

Yenə belimizə qoyarlar palan.

Sərdar Cəlaloğlu:

Onunla qüvvətli olar qolumuz,

Onunla bağlıdı qazanc pulumuz,

"Yol xəritəsi"di xilas yolumuz,

Əlbəttə, həmkarlar deyirlər yalan.

Nurəddin Məmmədli:

"İP" yaxşı bir plan qoyubdu mizə,

Qərb də çoxlu qrant verməkdə bizə,

Qərbdən axıb gələn maliyyəmizə,

Bu "Yol xəritəsi" salacaq talan.

Sərdar Cəlaloğlu:

Özün başdan-başa səhvsən, qüsursan,

Nə plan qururuq onu pozursan,

Hər şeyi bildiyin kimi yozursan,

Elə bu səbəbdən "göyçəkdi xalan".

Nurəddin Məmmədli:

Bəzən də gəlirsən bizlərə hədə,

Meylin yönəlməkdə pisliyə, bədə,

Sənin yol xəritən adi səfsətə,

Özünsən yalançı vəlvələ salan.

Sərdar Cəlaloğlu:

Sizin tərsliyiniz süni bir qaya,

İstərəm buraxsın Qərb bizə maya,

Mən real bir plan atdım ortaya,

Ona zərər vurur flankəs, filan.

Nurəddin Məmmədli:

Barmağında qızıl misdir deyəcəm,

Xəritənin üstü hisdir deyəcəm,

Həmişə planın pisdir deyəcəm,

Mənim boğazıma salsan da ilan.

Sərdar Cəlaloğlu:

Sən özün bir muzdur, don, yerində qal,

Sənin liderində yox ağıl, kamal,

Xəritə əbədiyaşar bir xəyal,

Sizin "İP" bir qurum saralan-solan.

Nurəddin Məmmədli:

Zərbələr gözünə, qaşına dəysin,

Qopub daşlarından daşına dəysin,

Sənin yol xəritən başına dəysin,

Bizim itimizdən çox pisdi tulan.

Sərdar Cəlaloğlu:

Şərə meyillidi sizdəki maddə,

Nöqsan gəzirsiniz hələ də bəddə,

Özünüz acından çığırmaq həddə,

Xəritə bizləri edərdi kalan.

Nurəddin Məmmədli:

Səni hər görəndə dönüb əkillik,

Arada məsafə olar min millik,

Əlbəttə, onsuz da keçinə billik,

Sizin xəritəniz bizimçün dalan.

Sərdar Cəlaloğlu:

Siz yük edibsiniz kədəri-dərdi,

"İP" də bəyənmədi mənim tək mərdi,

Hətta qlobus da gücdən düşərdi,

Olsaydı sizinçün bədxah dəf çalan.

Nurəddin Məmmədli:

Biz sənə heç zaman açmarıq ətək,

Yolumuz üstündə heç vaxt bitmə tək,

Aparma özünü yeniyetmə tək,

Müdriklik yaşına çat, bir az sulan.

Sərdar Cəlaloğlu:

Yeriniz uçurum, bəlkə də lap dib,

Heç vaxt olmadınız qorxulu rəqib,

Sizi edəcəkdir yalanlar təqib,

Mənim kimi olar ancaq düz olan.

Nurəddin Məmmədli:

Bizə xaric özü qurubdu tələ,

"İP"-də baş verməkdə hər gün zəlzələ,

Xəritən salmaqda cana vəlvələ,

Sən bir dərd satansan, bizik dərd alan.

Sərdar Cəlaloğlu:

Xaric etməz səni tox daş-başınla,

Yaşaya bilməzsən çox daş-başınla,

Düşünə bilmirsən ayıq başınla,

Xülyaya qovuşar xəyala dalan.

Nurəddin Məmmədli:

Yorub beynimizi böhtan, yalanlar,

Sizdə təklifçilər, bizdə klanlar,

Daha çox münasib bizim planlar,

"İP" Qırat-Düratdı, ADP qulan.

Sərdar Cəlaloğlu:

Hər qaranlıq gecə zülmət şəb deyil,

Xarici qrantlar, sözsüz, həb deyil,

Sizdə klançılıq çox da dəb deyil,

Qərbin güdazına gedər hər klan.

Nurəddin Məmmədli:

Xarici qonorar bizlərə paydı,

Bosslar bizim "İP"-ə yaxşı daydaydı,

Kim ki, xəritəni obyektiv saydı,

Salınar belinə çoxsaylı palan.

Sərdar Cəlaloğlu:

Bir vaxt Əli-İsa çıxmazdı bardan,

"İP" Qərbə baxaraq yapışıb vardan,

Mənim xəritəmi asıb divardan,

Kür təki dalğalan, Araz tək bulan.

Nurəddin Məmmədli:

"İP" qəbul eyləmir ucuz jestləri,

Soxma ürəyimə iti neştəri,

Biz sənə olmarıq yaxşı müştəri,

Götür xəritəni, get ayrı dolan.

Mirzə QƏRƏNFİL