Müxalifətin Milli Məclisə alternativ yaratdığı “Xalq Məclisi” süqut etdi, indi də “Xalq Hərəkatı” yaratmaq ideyası ortaya atılıb

Vurzun Əyyubov:

Boş durduq, boss bizə qida vermədi,

Qrant verən Qərb də əda vermədi,

"Xalq Məclisi" bizə fayda vermədi,

İndi yaradarıq "Xalq Hərəkatı".

Fuad Qəhrəmanlı:

A kütlə, sən bizim hərəkata gəl,

Oxuyaq səninçün füsunkar qəzəl,

Bu yeni hərəkat məclisdən gözəl,

"İP"-də dəyişəcək sönük həyatı.

Vurğun Əyyubov:

Bir məsləhət verim sözün sonunda,

Sizə qoy gəlməsin iblis donunda,

Əlbəttə, biz bu hərəkat fonunda,

Xalqa oxuyarıq şirin bayatı.

Fuad Qəhrəmanlı:

Çoxları heç baxmaz bəd kəsirinə,

Çevrilib əbədi bir əsirinə,

Kütlələr düşəcək xoş təsirinə,

Sallıq cəngimizə, hətta Heratı.

Vurğun Əyyubov:

Təşviqatı başa yeritmək üçün,

Kütlə ürəyində tez bitmək üçün,

"Xalq Hərəkatı"nı vəsf etmək üçün,

Özüm oxuyaram pəsdən "Heyratı".

Fuad Qəhrəmanlı:

Bu işdə iş keçməz neştərsiz, bizsiz,

Bizim "Xalq Məclisi" qalıbdı gözsüz,

Bu "Xalq Hərəkatı" şəninə, sözsüz,

Özüm gurladardım yolda "qradı".

Vurğun Əyyubov:

Biz qalib də gəldik hər dərdə, əlbət,

Burda lazım deyil heç pərdə, əlbət,

Əli də, İsa da bu yerdə, əlbət,

Şahə qaldırardı bu cip Qıratı.

Fuad Qəhrəmanlı:

O, bizi maqnit tək özünə çəkdi,

Hərəkat, əlbəttə, böyük istəkdi,

Zəncilər özü də bizə dəstəkdi,

"İP"-ə cəlb etmişik xeyli mulatı.

Vurğun Əyyubov:

Hamı fərəhlidi, əhvallar da şad,

İnşallah, yaranmaz aramızda çat,

Elə ki, yarandı "Milli Hərəkat",

"İP"-ə toplayarıq bütün elatı.

Fuad Qəhrəmanlı:

Üzvlər də ələkdə ələnməkdədi,

Bədxah özbaşına sülənməkdədi,

Hərəkat küləyi güclənməkdədi,

Bizə çatacaqdı xalis boyatı.

Vurğun Əyyubov:

Bizi təhdid edir iflas his kimi,

Kiməsə gəlməkdə bəlkə pis kimi,

Düzü, "Xalq Məclisi" yumşaq mis kimi,

Bu qurum yumşaldar möhkəm poladı.

Fuad Qəhrəmanlı:

Bosslar yelləncəkdə yelləndirəcək,

Bizi səmt küləyi helləndirəcək,

"İP" onu düz səmtə yönləndirəcək,

Bu "Xalq Hərəkatı" güclü qaladı.

Vurğun Əyyubov:

Burda bossların da çox səyi olub,

Bizə, sözsüz, Qərbin köməyi olub,

Hərəkat hamının əməyi olub,

Burda rol oynamır İsa soyadı.

Fuad Qəhrəmanlı:

Əvvəllər qoyurduq çox ləng, daşları,

"İP" çox hellədibdi nəhəng daşları,

Biz onun xırdaca məhək daşları,

Bu "Xalq Hərəkatı" möhkəm qayadı.

Vurğun Əyyubov:

Pul lazım bosslardan hər xodu üçün,

Hərəkat deyildir hər lotu üçün,

Qurumun həm duzu, istotu üçün,

Bizə çox lazımdı Fatı blatı.

Fuad Qəhrəmanlı:

Hər qurumçün tökmək olmaz göz yaşı,

Bunu başa düşməz həddən çox naşı,

"İP", sözsüz, bunların böyük qardaşı,

Məclis hərəkatdan xeyli baladı.

Vurğun Əyyubov:

Elə ki, bir qədər pisləşdi durum,

Qarşıda göründü geniş uçurum,

Gətirməkdən ötrü əsrəyə qurum,

Çoxları xaricdə boşqab yaladı.

Fuad Qəhrəmanlı:

Aldırıb qadın tək qaşını azca,

Həm də göstərəndə yaşını azca,

Biz boş buraxanda başını azca,

Reytinqsiz liderlər "İP"-i taladı.

Vurğun Əyyubov:

Həm də arxa bilib bu boss sipəri,

İstərik "İP" üstdən götürək şəri,

Yola gətirməkçün qarətçiləri,

Qoyarıq stola paytaxt salatı.

Fuad Qəhrəmanlı:

Çoxu ağzımızı tutdu bulvara,

Biz gedib orada qaldıq avara,

Narıncı geyimi atıb kənara,

Geydik əynimizə bomboz xalatı.

Vurğun Əyyubov:

Çox qurum yaradıb, düzəltmişik bum,

Bosslar pul göndərsə, düzələr durum,

Göstərib xaricə yeni bir qurum,

Allıq boss əlindən çoxlu baratı.

Fuad Qəhrəmanlı:

Gələr başımıza bəla pis kimi,

Başımız üstünə çökər sis kimi,

Hərəkat da gedər o məclis kimi,

Qalar əlimizdə bir içalatı.

Mirzə QƏRƏNFİL