“5-lər”ə çevrilmiş “6-lar”da qarşıdurma əlamətləri sezilir

Mirmahmud Fəttayev:

AMİP-in getməsi bizi beş etdi,
Yorub əldən saldı, sonra leş etdi,
Bu sabit durumu keşməkeş etdi,
Ancaq çıxış yolu tapa bilərik.

Əli Əliyev:

Boss asıb bir yekə kasa əlindən,
Çıxıb hər birinin masa əlindən,
Etibar əlindən, İsa əlindən,
Qazancı səmada qapa bilərik.

Mirmahmud Fəttayev:

Biz baş qoymamışıq əsla balınca,
Çapdıq beşimiz də yalın qılınca,
Bossların yanınca qrant dalınca,
Qərbə biz dördnala çapa bilərik.

Əli Əliyev:

Sürüşüb aşağı maya üstündən,
Keçərik üsullu qaya üstündən,
Keçib tənginəfəs dərya üstündən,
Yerdən ildırım tək qopa bilərik.

Mirmahmud Fəttayev:

Qaldıra bilərik göyə topu da,
Çox uca tutarıq hapı-gopu da,
Daxildə ən güclü mikroskopu da,
Əlbəttə, biz adi lupa bilərik.

Əli Əliyev:

İş çətinə düşər soncuqlar itsə,
Adam çılpaq qalar doncuqlar itsə,
Əlbəttə, qəflətən muncuqlar itsə,
Keçirib iynədən sapa, bilərik.
Mirmahmud Fəttayev:

Bosslar İsa üstə fəhlə tökür ki,
Üstümə radikal məhlə tökür ki,
"İP"-çilər o qədər zəhlə tökür ki,
Hətta yolumuzdan sapa bilərik.

Əli Əliyev:

Əgər ölüyüksə, çoxları diri,
Burdan yararlanır Moskva meri,
Burda var hər kəsin məxsusi yeri,
Bir yığın ifratı topa bilərik.

Mirmahmud Fəttayev:

Saxlarıq 10-larla toyuq otaqda,
Baş da çıxararıq oyuq otaqda,
Dözüb dura billik soyuq otaqda,
İsinən otağı soba bilərik.

Əli Əliyev:

"İP"-çilər dadardı lap adam dadı,
Mənə xoş gəlməkdə tut, badam dadı,
Qalıb ağzımızda ləziz tam dadı,
Borşa bilməsək də, supa, bilərik.

Mirmahmud Fəttayev:

Ayırıbdı bizi sərt divar özü,
İsa "İP" içində oldu xar özü,
Çıxdı "6-lar"dan Etibar özü,
"5-lər"də yaxşı iş yapa bilərik.
Əli Əliyev:

Hamımız düşmüşük Nuh gəmisindən,
Faydalanmaq olmaz tip zəmisindən,
Biz taxıl biçmərik İP" zəmisindən,
"5-lər" buğdamızı arpa bilərik.

Mirmahmud Fəttayev:

"İP"-də Əli-İsa bərkdən mələyər,
Bizim beş liderə ölüm diləyər,
Bosslar da beş başa qrant ələyər,
Qrant kisəsini zorba bilərik.

Əli Əliyev:

Qrant dilənçisi - çölük, bayırıq,
İsanın-Əlinin ağzı ayırıq,
"İP"-də düşmənləri zəif sayırıq,
Biz öz dostumuzu zorba bilərik.

Mirmahmud Fəttayev:

Daha gücsüzlərçün vuran qamçıyıq,
"İP"-çi qarnı üçün ağır sancıyıq,
Üstümüz unludu, dəyirmançıyıq,
Biz üst-başımızı çırpa bilərik.

Əli Əliyev:

Bosslar dadımıza gəlib yetməsə,
Bizim ardımızca İsa getməsə,
"5-lər" planını qəbul etməsə,
"İP" yetkilisini çırpa bilərik.
Mirmahmud Fəttayev:

Başımız üstündə əgər "İP" səksə,
Başını kəsərik, əgər qan töksə,
Kirpik qırmaq güclü dəstək deməksə,
Kirpiklərimizi qırpa bilərik.

Əli Əliyev:

Rəqib qazlı, bizlər nazlardan yekə,
"İP"-çilər danışır bazlardan yekə,
"5-lər" hinduşkadan, qazlardan yekə,
"İP"-i, "İP"-çiləri çolpa bilərik.

Mirmahmud Fəttayev:

Xaricə gedəni cırıb kəsərsə,
Qərb də əlaqəni qırıb kəsərsə,
Boss birdən qrantı xırıp kəsərsə,
Bunu özümünçün turba bilərik.

Əli Əliyev:

İsa da, Əli də trus xaloğlu,
Etibar Məmmədov virus xaloğlu,
Jirinovskini urus xaloğlu,
Sarkozini isə baba bilərik.

Mirmahmud Fəttayev:

Bosslar öz səsini sonor eləsə,
Vaşinqton uzaqdan fanar eləsə,
"İP" bizi yolundan kənar eləsə,
Silahı lapatka, yaba bilərik.

Əli Əliyev:

Sevinnik Qərb bizə 10 küpə versə,
İsa-Əli kimi bir tipə versə,
Boss pulu bizə yox, tərs "İP"-ə versə,
Bu cür davranışı qaba bilərik.

Mirzə QƏRƏNFİL