Müxalifət islah olunmaq iqtidarında deyil

Araz Əlizadə:

"İP"-çilər, "6-lar" çox hay-küy salır,

Onlara xaricdən maraq azalır,

Müxalifət bu gün geridə qalır,

İslah olunmazdı ifrat radikal.

Arzu Səmədbəyli:

Qüvvədə Çingiz xan, monqol Batı mən,

İsanın sözüylə guya Fatı mən,

İslah edəcəyəm Müsavatı mən,

Başqan seçilməyim buna xoş misal.

Araz Əlizadə:

Keçsək bu mövzuya günah olunmaz,

Başqan postuna da tamah olunmaz,

İfratlar bir daha islah olunmaz,

Baha başa gələr sənə bu vüsal.

Arzu Səmədbəyli:

Bizim dərdimizə Qərb edər əlac,

O zaman qalmarıq yetkililər ac,

Bizə pul buraxıb boss versə rəvac,

Yerbəyer edilər pulla bu əmsal.

Araz Əlizadə:

İsanın əlindən çıxdı çox tava,

Sən qura bilməzsən özünə yuva,

Çənədən boşsunuz, ağızdan yava,

Uğursuzluğadı sizin bu timsal.

Arzu Səmədbəyli:

Biz kütlə, o isə lüks insan olub,

Cibini doldurub, qəlbi qan olub,

O, bizə həmişə pis başqan olub,

İsanı yıxmaqçün yüksəkdi əhval.

Araz Əlizadə:

Konflikt kükrəyib başa çıxıbdı,

Cüt şeş atmağınız qoşa çıxıbdı,

Sizin planınız boşa çıxıbdı,

Arzu-niyyətiniz olubdu pamal.

Arzu Səmədbəyli:

Başqan söz deməyə bizə endirmir,

Onu maşınına boss da mindirmir,

İsanı indi heç pul da dindirmir,

Mənim kimiləri dindirmir kamal.

Araz Əlizadə:

Qərbin marağı yox nemət açmağa,

Cəhd etmə beh verib, qiymət açmağa,

Lüzum yox kamaldan söhbət açmağa,

Yox səndə, İsada ən cüzi amal.

Arzu Səmədbəyli:

Məni qane edir İsa ilə hərb,

Onun ürəyində qalaqlanıb ərp,

Bizə pul verməkdən üz döndərsə Qərb,

Bunu öhdəsinə götürür Şimal.

Araz Əlizadə:

Yıxdı Müsavatı sürəkli hürüş,

Sən də zilə çıxma, en aşağı düş,

Yalançı göz yaşı, yalançı gülüş,

İndi dəbdə deyil yalançı camal.

Arzu Səmədbəyli:

Alaram, erməni göndərsə dram,

Məni qarşılayar Parisdə Aram,

İsadan yaxşı bir başqan olaram,

Mənə gənc "İP"-çilər verəcək medal.

Araz Əlizadə:

Cibgir tək ciblərə soxulacaqsan,

Oturub yerində qaxılacaqsan,

İsadan hündürdən yıxılacaqsan,

Arzu-xülyaların deyildir real.

Arzu Səmədbəyli:

İsanın getməsi bizlərə bəsdi,

Bir onu yıxmaqdı dostların qəsdi,

Bosslar verməsə də böyük pul dəsti,

Yəqin boss bağışlar bir parça "Opal".

Araz Əlizadə:

Nə Tanya alqışlar səni, nə Meqqi,

Bir İsaya görə danmayın həqqi,

Səni məşğul edir hansı tərəqqi?

Sizi gözləməkdə de, hansı iqbal?

Arzu Səmədbəyli:

Başından böyükdü həm də qələti,

O, biabır edib eli, milləti,

İsa getməkdədi deyirik qəti,

Bizi düşündürmür bu axmaq sual.

Araz Əlizadə:

Əsla öyünmə ki, münasib bəy sən,

Sonradan İsaya deyərsən əhsən,

Döymə sinənə ki, yaxşı lidersən,

İsa çolaqdısa, sizlər şil, topal.

Arzu Səmədbəyli:

Eşitdik ki, Qərbdən bizə par gəlir,

Onun çox qalması bizə ar gəlir,

Artıq başqan postu ona dar gəlir,

Atılar İsa bəy sanki bir motal.

Araz Əlizadə:

İsa tək küt getmiş bir gündəsiniz,

Allahın altında pis bəndəsiniz,

Hamınız o qədər bəd gündəsiniz,

Sizə çarə etməz nə Rac, nə Qopal.

Arzu Səmədbəyli:

Quruma bağlayan bizi and idi,

Onu məşğul edən çox qrant idi,

İsa qərargahı kvadrat idi,

Mənim kabinetim olacaq oval.

Araz Əlizadə:

Heç zaman da ölmür xəbis qurdunuz,

Quzğun tək qərbliyə cəld cumursunuz,

Dərd-azar bilmədən pul umursunuz,

Sizə rəqs etməkçün lazımdı qaval.

Arzu Səmədbəyli:

Təmsil etməkdəyik bizlər solları,

Ayrıldı başqanın bizdən yolları,

Cibinə yığardı İsa dolları,

Mən qrant yığardım tapsaydım çuval.

MİRZƏ QƏRƏNFİL