Müxalifət itirə-itirə gedir

Tahir Kərimli:

Arzu-diləkləri dönübdü külə,

Düşüb canlarına təlaş, vəlvələ,

Xaricdən qazancı olmayıb hələ,

Radikal itirə-itirə gedir.

Əli Orucov:

Ətrafda artmaqda avam leşlər də,

İsa da, Əli də keşməkeşlərdə,

İtki çoxalanda "İP"-də, "5-lər"də,

AMİP də yetirə-yetirə gedir.

Tahir Kərimli:

Yəqin heç tarlası yetirmir yonca,

Radikal yetkili düşüb qulunca,

Bosslar senti səpsə qabaqlarınca,

İfratlar götürə-götürə gedir.

Əli Orucov:

Dağılır dediksə, dağılır demək,

Ağır bir problem onlarçün əmək,

Bosslar əllərinə versələr yemək,

Yolboyu ötürə-ötürə gedir.

Tahir Kərimli:

Atılıb kənara çoxdan mitili,

Ayaqlar altına düşüb kətili,

Boss versə onlara hansı şitili,

Tarlada bitirə-bitirə gedir.

Əli Orucov:

İfratlar hər şeyi çoxdan danıbdı,

Onlar suda batıb, odda yanıbdı,

Guya Qərbdə qrant qalaqlanıbdı,

Radikal götürə-götürə gedir.

Tahir Kərimli:

Onlar hissə gəlib, duyuq düşəndə,

Sərxoşluq səngiyib, ayıq düşəndə,

Başına gün dəyib, soyuq dəyəndə,

Bizim müxalifət çətirə gedir.

Əli Orucov:

Hövlanak oyanıb, kal dayanırlar,

Dindirilsələr də, mal dayanırlar,

Sual verilsə də, lal dayanırlar,

Yazılar sürətlə titrə gedir.

Tahir Kərimli:

Yarımçıq çeynəyir son tikəsini,

Almır nəfəsini, qısır səsini,

Qısaldır xaricə məsafəsini,

Yolu santimetrə, ya metrə gedir.

Əli Orucov:

Çox vaxt boss puluyçün ölür, bayılır,

Bəzən də yuxa tək nazik yayılır,

Bəzən yuxulardan sərsəm ayılır,

Xaricə qrantçün ətirə gedir.

Tahir Kərimli:

Bəzən radikallar blata dönür,

Bəzən şahə qalxıb o, ata dönür,

Bəzən bossu üçün zəkata dönür,

Bəzən o məqsədlə lap fitrə gedir.

Əli Orucov:

Hələ ki, radikal itirir qrant,

Həvəsə gələndə ötürür qrant,

Bossdan qalaq-qalaq götürür qrant,

Acaq həmkarlara o, qətrə gedir.

Tahir Kərimli:

İfrat Qərbə quyruq bulaya gərək,

Xeyli həyəcanla vuranda ürək,

Bir az gec gələndə xaricdən çörək,

Bizim radikallar fətirə gedir.

Əli Orucov:

Əynini o, köhnə-küşkül edəndə,

İşləri bir azca müşkül edəndə,

Bəzən bənd istisna təşkil edəndə,

İfratlar tələsik sətirə gedir.

Tahir Kərimli:

Bosslar gəl deyəndə, yüyürüb gəlsə,

Gözlərdə incəlib xeyli nazilsə,

Özü tir olmaqdan yayına bilsə,

Sözsüz, mütəmadi o, tirə gedir.

Əli Orucov:

İndi radikalda azalıb güman,

İnternetə girmir, oxuyur roman,

İfrata Araza get deyən zaman,

O, yolunu çaşıb düz Kürə gedir.

Tahir Kərimli:

Tutulubdu qəlbi, hissi azara,

İstər ki, geyinsin daim zər-xara,

Ona yaraşardı ancaq boz-qara,

Ancaq göy paltarda o, ərə gedir.

Əli Orucov:

İndi sıralarda Leyli azalıb,

İfratın işləmək meyli azalıb,

Xeyirə gedənlər xeyli azalıb,

İndi hamılıqla o, şərə gedir.

Tahir Kərimli:

Eşşəyə miniblər düşüb yəhərdən,

Azad olmuşdular bardan-bəhərdən,

Çoxdan düşmüşdülər onlar nəzərdən,

İndi radikal da nəzərə gedir.

Əli Orucov:

Qərb də onlar üçün bol qrant yazar,

Onlar bir-birinə dar qəbir qazar,

Elə ki, çıxıbdı əllərdən bazar,

İfratlar qızışıb həzərə gedir.

Tahir Kərimli:

Xoşlarına gəlir xoşa gələndə,

Onlar da gülürlər bossu güləndə,

Hər biri kükrəyib cuşə gələndə,

Elə mənim kimi yüz nərə gedir.

Əli Orucov:

Xoruz eləyiblər dişi fərəni,

Marqarin ediblər indi kərəni,

Zaman batırıbdı sənin nərəni,

Nərəni aparan san bərə gedir.

Mirzə QƏRƏNFİL