Müxalifət daha çox şəxsi ambisiyalarını düşünür

Nüşabə Sadıxova:

Liderlər döşündə xarici sancaq,

İdarə eləyir çoxunu "Qnçaq",

Hər biri cibini düşünür ancaq,

Bunlardan uzaqdı milli maraqlar.

Tofiq Yaqublu:

Demişdin ilanla yola gedirsən,

Zirvədən sürətlə nola gedirsən,

İçimizdə olub sola gedirsən,

Səni tovlayıblar bizdən qıraqlar.

Nüşabə Sadıxova:

Qərbi özlərinə zır peyk deyərək,

Dığa salamına əleyk deyərək,

Xaricə həmişə ləbbeyk deyərək,

Saqqal sığallayır saqqal daraqlar.

Tofiq Yaqublu:

Uğur qazanmadı "İP" də bu turda,

Qrant qismət olub yenə də qurda,

Ağlayıb-sıtqayan liderlər burda,

Keçmiş günlərini anıb varaqlar.

Nüşabə Sadıxova:

Sifətlər dirənib üzü divara,

Lider tənbəlliyi çıxıb civara,

Cibi boş liderlər olub avara,

Hər biri imkanlı bir boss soraqlar.

Tofiq Yaqublu:

Xaric verməyəcək heç sement belə,

Bizi xilas etməz hətta ment belə,

Heç ala bilməyək bircə sent belə,

Qorxuram çevrilə bizə yaraqlar.

Nüşabə Sadıxova:

Daim bir-birini basıb yeyərlər,

Pul üstə dostu da basıb döyərlər,

Çarpmır heç nəzərə sivil dəyərlər,

Süfrədə düzülüb saysız araqlar.

Tofiq Yaqublu:

Hələ damaqlarda qrantın dadı,

Təəssüf ki, bolluca verən olmadı,

Sivillik vücudda, ruhumuzdadı,

Burda gur yanmaqda indi çıraqlar.

Nüşabə Sadıxova:

Bizim başqanımız olubdu xitri,

Başımın üstündə ayın da bədri,

İstərdim mən olam Müsavat sədri,

İşləyər xeyrimə yəqin oraqlar.

Tofiq Yaqublu:

Atmışıq aradan çox ayıb şəxsi,

Problem daxildə qalmayıb şəxsi,

Bizdə ambisiya olmayıb şəxsi,

Bizi yamanlayır bizdən iraqlar.

Nüşabə Sadıxova:

Çoxu radikala mövqesiz deyib,

İsaya, Əliyə qoy olsun eyib,

Onları heç zaman düşündürməyib,

Dövləti maraqlar, himn, bayraqlar.

Tofiq Yaqublu:

Onları tərpətməz ən yoğun çomaq,

Hər bir ambisiya sədrlərə yamaq,

Hər lider istər ki, çəksin kef-damaq,

Yaman tez dəyişdi indi növraqlar.

Nüşabə Sadıxova:

Ötürür estafet ənənə kimi,

Yapışır qranta bir gənə kimi,

Ağır durumdaydı dünənə kimi,

Qarın doydurmaqda bu gün qıvraqlar.

Tofiq Yaqublu:

Bosslar çox demişdi bu bəyə əyil,

O, Qərbə salardı həmişə meyil,

İsanın sevdiyi vətən, xalq deyil,

Puldan ayrı salıb onu fəraqlar.

Nüşabə Sadıxova:

Pul olsa, olardı çəkic-oraqlı,

Onların hər günü viski-araqlı,

Nə Əli, nə İsa deyil maraqlı,

Qalıbdı, gedibdi yoxsa torpaqlar.

Tofiq Yaqublu:

İndi əllərində sərvət yoxsa da,

Çoxu postundadı səhv buraxsa da,

"Bəylər" tərpənməyib, çox su axsa da,

Tökülüb o vaxtdan xeyli yarpaqlar.

Nüşabə Sadıxova:

Bossdan alınacaq barat çoxalır,

Mənlik yoxsullaşır, arat çoxalır,

Ambisiya artır, irad çoxalır,

Gözlərində bir dağ düzlər-irmaqlar.

Tofiq Yaqublu:

Hamıda hər şey var, üzündən başqa,

Hər şeyini verər gözündən başqa,

Sevməz təmtəraqdan, özündən başqa,

Bosslar pul verməsə, dönüb cırmaqlar.

Nüşabə Sadıxova:

Qıfılı itirmiş paslı açardı,

Pul görsə, bosslara doğru qaçardı,

Hər lider cibini geniş açardı,

İstərdi pul vursun sulu şırnaqlar.

Tofiq Yaqublu:

Deyirlər gedirik birgə zəfərə,

Acdılar, meyil edir hər biri zərə,

Beş sent basdırsaydı boss möhkəm yerə,

İşə salınardı dərhal dırnaqlar.

Nüşabə Sadıxova:

Yemək də az yeyir, dişi olsa da,

İşləmir çoxusu, işi olsa da,

Liderlərin çoxu kişi olsa da,

Zərifdi zəhmətdən uzaq barmaqlar.

Tofiq Yaqublu:

İtirib liderlər boss dartımını,

Sədr də göstərmir öz artımını,

İşə verdiyindən Qərb yardımını,

Artıb-çoxalardı qrant sormaqlar.

MİRZƏ QƏRƏNFİL