ADP-çilərin fikrincə, İsa başqan postundan gedirsə, Sərdar da analoji addım atmalıdır

Taliyət Əliyev:

Herkellər, Qrosslar "qastin"dən gedir,

Onu görən bosslar rastından gedir,

İsa qərarlıdı, postundan gedir,

Sərdar da bu yöndə düşünməlidir.

Sərdar Cəlaloğlu:

"Qarabağ" bloku gur yanan bir şam,

Qalıb sədrlikdə ayıq durmuşam,

Mən hələ postumda sayıq durmuşam,

Bu cür düşünənlər xalis dəlidir.

Taliyət Əliyev:

Bəlkə də xaricdə haray salacaq,

Lalə, Etibartək gendə qalacaq,

İsa Müsavatda lider olacaq,

Növbədə Sərdardır, həm də Əlidir.

Sərdar Cəlaloğlu:

Sevmirəm ADP hərislərini,

Qovaram üzvlərin ən pislərini,

Taliyət, cilovla öz hisslərini,

Sərdar ADP-nin ön təməlidir.

Taliyət Əliyev:

Xoş haldı küçəyə səfil verməmək,

Maraqlı, nə versən qəfil verməmək,

Postunu gənclərə təhvil verməmək,

Əlbəttə, Sərdarın bəd əməlidir.

Sərdar Cəlaloğlu:

Taliyətfasonlar azıb qudurur,

Arxamca gah nala, gah mıxa vurur,

Məni istəyənlər arxamda durur,

Kim məni istəmir bəd deməlidir.

Taliyət Əliyev:

Daxilə vəlvələ salmaq istəyir,

Bizdən çünki qisas almaq istəyir,

Sərdar öz postunda qalmaq istəyir,

Yəqin hamımızı o, yeməlidir.

Sərdar Cəlaloğlu:

ADP-də möhkəm dayanmaqda taxt,

Hələ ki, uğurla üzləşməkdə baxt,

"Qarabağ" bloku gücləndiyi vaxt,

Postdan atılmağım çox gülməlidir.

Taliyət Əliyev:

Bir sədr tək, sözsüz, o, kütdü tamam,

Son illər dənini üyütdü tamam,

Sərdarın getməsi labüddü tamam,

Getməsə, güman ki, o, ölməlidir.

Sərdar Cəlaloğlu:

Taliyət kimilər savadsız, loxdu,

Başdan xarabların sayı lap çoxdu,

Burda məndən güclü bir sədr yoxdu,

Tutalım gedirəm, kim gəlməlidir?

Taliyət Əliyev:

Yalan deyiriksə, adi böcəyik,

Qurumu tərsinə çevirəcəyik,

Getməsə, biz onu devirəcəyik,

Bunu Sərdar özü də bilməlidir.

Sərdar Cəlaloğlu:

Mən işə salaram bıçqı, mişarı,

Mənə əsaslanıb işin aşarı,

Atsam qərargahdan onu dişarı,

Goreşən tək yeri o, dəlməlidir.

Taliyət Əliyev:

Bir gündə bizlərə min hiylə qurur,

Dili pəltəkləşib lap topuq vurur,

İsmi siyahıda baş-ayaq durur,

Adını sədr tək o, silməlidir.

Sərdar Cəlaloğlu:

Saldı bir vaxt Rəsul, İlyas pozuntu,

Burada salmaqda çox qaz pozuntu,

Saldım ADP-də mən az pozuntu,

Taliyət qurumu tam bölməlidir.

Taliyət Əliyev:

Getdikcə diş düşür, beli bükülür,

ADP əlində tamam sökülür,

Ağzını açanda suyu tökülür,

Sərdar aramızda bəd kəlməlidir.

Sərdar Cəlaloğlu:

Pis günə düşübdü, bu hala şadam,

Onun ürəyinə, canına qadam,

Taliyət cadulu-pitili adam,

O, kəndir-çatılı, həm ilməlidir.

Taliyət Əliyev:

Gərək o, başını çölə soxmaya,

Onu möhtac qoyub adi loxmaya,

Sərdarı biz salaq sıxma-boğmaya,

Bilirəm, son sözü onun "bəli"dir.

Sərdar Cəlaloğlu:

Mənə dedilər ki, badyan danışır,

Zənn etdim önümdə madyan danışır,

Cızığından çıxıb hədyan danışır,

Bu gün Taliyətin gəlhagəlidir.

Taliyət Əliyev:

Yaman sərsəmləyib, yuxu danışır,

Onun bicliyini çoxu danışır,

Qarşıda Sərdarın ruhu danışır,

O, çoxdan ölübdü, sabah ilidir.

Sərdar Cəlaloğlu:

Üstünə qoyubdu, davalanıbdı,

Jmıxca, samanca havalanıbdı,

Taliyət yamanca havalanıbdı,

Başında fırlanan səmum yelidir.

Taliyət Əliyev:

Utanır, desək də ona ayıbdı,

Bizim başımızı tumarlayıbdı,

Pulları havada qamarlayıbdı,

Sorub qanımızı, o, bir zəlidir.

Sərdar Cəlaloğlu:

Olmamış bir üzvə örtük, çətir də,

Bilməyib nə hörmət, izzət, qədir də,

Heç vaxt çıxmayacaq ondan sədr də,

Gözümdə Taliyət əsil ölüdür.

MİRZƏ QƏRƏNFİL