Xaliq Bahadır “İP”-çilərə və müsavatçılara hücum edir

Xaliq Bahadır:

Yalan söyləmirəm mən sizə, vallah,

"Gizli qüvvələrə" işləyib Pənah,

Onun məxfi kodu "Mamedov"du, ah,

Rauf da onun tək xəyanətkardır.

Pənah Hüseynov:

Kasıb olmaq üçün maya getməli,

İftira atmaqçün həya getməli,

Mən onun yanında toya getməli,

Xaliq Bahadırın özü kaftardır.

Xaliq Bahadır:

İş görməkdən artıq salır səs-səda,

Başqasında yoxdu ondakı əda,

Yasda ehsan onun sevdiyi qida,

Orucluq zamanı yağlı iftardır.

Pənah Hüseynov:

Rəyasət heyəti üzvündən biri,

Qəlbində qalaqlar çirk-pası, kiri,

Görmür öz gözündə ən yoğun tiri,

Bu adam qılıqsız həm bədrəftardır.

Xaliq Bahadır:

Olubdu həmişə bosslara möhtac,

Qarnı doymayıbdı, gözü qalıb ac,

Bu adam ideya eyləyir ixrac,

Əsil həqiqətdə məntiqi dardır.

Pənah Hüseynov:

Lider olmaq üçün axtarır zəmin,

Bu adam içində daimi qəmin,

Olmamış heç bircə marağı təmin,

Cismini çuğlayan dərddir-azardır.

Xaliq Bahadır:

Pənah Neyl kimi Aya getməli,

Arxasında uzun paya getməli,

Kədərim yanında toya getməli,

Mənimkindən artıq dərd-qəmi vardır.

Pənah Hüseynov:

Boynu bənzəməkdə nazik saplağa,

Əlinə keçəni çəkir tabağa,

Bu, məni bədxah tək verib qabağa,

Xaliq kimisindən aləm bezardır.

Xaliq Bahadır:

Pənahı görüblər Qərbdə mul ilə,

Oturub-durmağa hazır qul ilə,

Qane etməsələr bosslar pul ilə,

O öz çöhrəsini dərhal bozardır.

Pənah Hüseynov:

Taktika sarıdan reytinqdə "ən"nəm,

Yalnız din desələr, söz atıb dinnəm,

Xaliq Bahadırın özü cəhənnəm,

O, "Yurd" daxilində sədri qızardır.

Xaliq Bahadır:

Qorxur xarab olsun dollarsız dəri,

O, nə bir qılmandır, nə də ki pəri,

O, bəzən özünü saysa da diri,

Pənah taktikası bumbuz məzardır.

Pənah Hüseynov:

"Yurd"un çox ehtikar həvəsi ki var,

Aləmi dağıdan nəfəsi ki var,

Əlinin, Xaliqin cəbhəsi ki var,

Bossun meydanında ucuz bazardır.

Xaliq Bahadır:

İnsafından güclü onun nifrəti,

Tərəddüd edəndi deyildir qəti,

Nəzərəçarpmazlıq onun sifəti,

Heç vaxt demək olmaz o, ecazkardır.

Pənah Hüseynov:

Olmamış heç zaman sözdə kəsəri,

Sevdiyi tərəvəz - soğan, vəzəri,

Nə ideyası var, nə bir əsəri,

O, ən primitiv, adi yazardır.

Xaliq Bahadır:

Vicdanı bomboşdur cibinə kimi,

Ehtiram göstərir çibinə kimi,

Enib cəmiyyətin dibinə kimi,

Fikir oyadır ki, guya kübardır.

Pənah Hüseynov:

Özünə yalandan ad qoyur şir də,

Xaliq çox salıbdı haray-həşir də,

Üz cırıb, diz döyüb, ediləşir də,

Göz yaşı axıdıb, aləm qopardır.

Xaliq Bahadır:

Bir addım atmamış yad firiştəsiz,

Bir gün də keçinmir o, əriştəsiz,

Siyasi meydanda tam səriştəsiz,

Qərbin nəzərində ucuz tavardır.

Pənah Hüseynov:

Arzusu daima Bombeylə Dehli,

Siyasi meydanda geridir xeyli,

Nə bir mövqeyi var, nə bəlli meyli,

Naxıra qatılan adi davardır.

Xaliq Bahadır:

Hiss edib özünü bəy yox, xan kimi,

Zəif taktika yox, taktikan kimi,

Aparıb özünü Mogikan kimi,

Həmişə zənn edib mərd Delevardır.

Pənah Hüseynov:

Nəslinə status verib cədd kimi,

Sərsəm əməlləri gəlir bəd kimi,

Özünü göstərir möhkəm sədd kimi,

O özü özülsüz uçmuş divardır.

Xaliq Bahadır:

Deyir ki, məhşurdur Tomas Mor kimi,

Aləmi dərk edir məzar, gor kimi,

Özünü aparır gözü kor kimi,

Yaxşı eşitsə də, mənən o, kardır.

Pənah Hüseynov:

İndi Müsavatla giribdi qəsdə,

Cəbhədə Xaliqi sayırlar xəstə,

Guya o qoyubdu dağı-dağ üstə,

Dodağından qopan adi şüardır.

MİRZƏ QƏRƏNFİL