İsa Qəmbərov başqanlığının ömrünü uzatmaq istəyir

Arzu Səmədbəyli:

İsa bəy, tarixdə böyük qan edib,

Məni, deyirdi ki, o, başqan edib,

İsa söz vermişdi, and-aman edib,

Başqanlıq kürsüsü olacaq mənim.

Vurğun Əyyubov:

Çox gözəl eşqilə yazmışam qəzəl,

Nədənsə İsaya uyub hər gözəl,

Gözümü açanda 20 il əvvəl,

Müsavat olubdu mənim vətənim.

Arzu Səmədbəyli:

Bir falçıya gedib istədim aman,

İş xeyli şuluqdu dedi bir şaman,

Qurultay gününü uzadır yaman,

Allah İsa bəyə qoy olsun qənim.

Vurğun Əyyubov:

İsa ucqarları ələt eyləyir,

Çoxları özünü alət eyləyir,

Arzu Səmədbəyli qələt eyləyir,

Başqanlıq eşqilə yanır bədənim.

Arzu Səmədbəyli:

Dedim başqan olub alaram çox pay,

Düzü, çox eylədi o, şaltay-baltay,

Tezliklə olmasa əgər qurultay,

Artacaq İsaya, yəqin ki, kinim.

Vurğun Əyyubov:

Cavab verməliyəm ki, get ləhləmi?

Məni zənn edirlər qara fəhləmi?

Mütəmadi mənim töküb zəhləmi,

Qıcıq verirlər ki, hirslənib dinim.

Arzu Səmədbəyli:

Mən də xatırladım "KAMAZ" vaxtını,

İsa tətbiq edib "HƏMAS" vaxtını,

Ötürdüm həmişə namaz vaxtını,

Vallah, əldən getdi imanım-dinim.

Vurğun Əyyubov:

İsadı əyninə geyib zay donu,

Açılmır nədənsə qurultay donu,

Əsəbin-qəzəbin olur bir sonu,

Bu cür davam etsə, tutacaq cinim.

Arzu Səmədbəyli:

Kamança milini təzanə bilər,

Burda yalnız İsa qazana bilər,

Qurultay bir il də uzana bilər,

Qorxuram boşala başlıca şinim.

Vurğun Əyyubov:

Cəhənnəm əzabı, çox zülüm keçdim,

Kobud davrananda mən həlim keçdim,

Mən onun yanında çox təlim keçdim,

İsadan gəlibdi həmişə dənim.

Arzu Səmədbəyli:

Çox ağır şələdə yaşamaqdayam,

İsayla tələdə yaşamaqdayam,

Mən özüm hələ də yaşamaqdayam,

Çox tez ələ keçdi Ladenim, binim.

Vurğun Əyyubov:

20 il olmadım mən nə naşı, loş,

Ey qafil, sən mənə az ayama qoş,

Qoy əğyar saymasın məni başı boş,

Sədr olmaq üçün doludu çənim.

Arzu Səmədbəyli:

Başqanlıq gəlməkdə, düzü, bir mif tək,

Bir tip tapmazsınız bu İsa tip tək,

Qurultayın vaxtı uzanır ip tək,

Kədərə bürünür fərəhim, şənim.

Vurğun Əyyubov:

Özümü öldürrəm, masa gedərsə,

Dözmərəm, boss verən kasa gedərsə,

Dərhal xəbər verin İsa gedərsə,

Açıq "Narmobayl"ım, "Baksel"im, "Cin"im.

Arzu Səmədbəyli:

Pis təsir oyadır guya kütlüyüm,

Gözlərə dürtülür, düzü, bədliyim,

Bir şübhə doğursa namizədliyim,

Gərək İsa bəyin boynuna minim.

Vurğun Əyyubov:

İsa soyuq qışı bahar eyləməz,

Başqa birisiylə nahar eyləməz,

İsa özü məni inkar eyləməz,

Arxamda dayanıb beş yüzüm, minim.

Arzu Səmədbəyli:

Sadiq elektorat yetirmək üçün,

Çoxsaylı rəqibi itirmək üçün,

Simurqdan bir qanad götürmək üçün,

Gərək mən zülmətin dibinə enim.

Vurğun Əyyubov:

Sığınacaq yerim, bəli, məhz yuvam,

Olubdu, olacaq bura nəhs yuvam,

Müsavat olubdu müqəddəs yuvam,

Qərargah olacaq daimi hinim.

Arzu Səmədbəyli:

Bədxahlar mayasız xəmir yoğurur,

Bu, mənə gətirmir, əsla, bir uğur,

Köhnə fikirlərim şübhə doğurur,

Sədri qane etmir ən nadir yenim.

Vurğun Əyyubov:

İçib "Akvavita", "Fanta", "Şollar"dan,

Onlara pay verib avro, dollardan,

Xeyli qüvvə yığıb ardıcıllardan,

10-larla, 100-lərlə Arzunu yenim.

Arzu Səmədbəyli:

Mən özüm türk oğlu, diyarım Turan,

Rəqib axtarıram etməkçün taran,

Çəkilmir başımın üstündən bir an,

Sıxılmış buludlar, dumanım-çənim.

Vurğun Əyyubov:

Ardıcıllarımı səf eliyərəm,

İsanı bir anda məhv eliyirəm,

Başqan olanları dəf eliyərəm,

Mənə qüvvə verir Müsavat tinim.

MİRZƏ QƏRƏNFİL