“İP” “VİP” və “ALP”-ni yanına çağırır

İsa Qəmbərov:

Burda çevirməkdə sal buza məni,

"İP"-də urcah edib qaz-quza məni,

"Yurd" Əli yığıbdı boğaza məni,

"VİP" Əli, yanıma çağır, Laləni.

Əli Əliyev:

Liberal buxovu asanmı verim,

Sənə həmkarımı ehsanmı verim,

Yüngül qədəminə qurbanmı verim,

Siyasi sanballı ağır Laləni?

İsa Qəmbərov:

Sanma lider kimi yarımaqdasan,

Lalədən də betər qarımaqdasan,

De, kimin yerinə sırımaqdasan,

O dünənki müti, fağır Laləni?

Əli Əliyev:

İndi Lalə adı bitib dilində,

Boğulan həmkardı coşqun selində,

Özün fiqur oldun Lalə əlində,

Sən edə bilməzsən fiqur, Laləni.

İsa Qəmbərov:

Laləni qurumda tənhalıq yedi,

Onu ancaq bizim yuva isidi,

Dərd-bəla əbədi müjdəçisidi,

"İP"-də gözləməkdə uğur Laləni.

Əli Əliyev:

Nəzər cəlb eyləmə kliplərinlə,

Az bezdir bizləri öz miflərinlə,

Özünün lüzumsuz təkliflərinlə,

Sən əsla eyləmə yağır Laləni.

İsa Qəmbərov:

Daim yaxşı olmur zamanın diski,

Gözünün altına qoy alsın riski,

Ayılda bilərdi yüz qram viski,

Bircə şüşə əla çaxır Laləni.

Əli Əliyev:

Müsavatı, "İP"-i, bir məni dinlə,

Süquta uğratdın təməllərinlə,

Özünün yöndəmsiz əməllərinlə,

Çox narahat etdin axır, Laləni.

İsa Qəmbərov:

Lalə xoşbəxtliyi axtardı Çində,

Bir vaxt çox boğuldu qəzəbdə, kində,

Son vaxtlar liberal "MBH"-sində,

Basıbdı çirk-pasla paxır, Laləni.

Əli Əliyev:

İncitmə, bir daha sən bu qadını,

Xanım gözləməkdə tez vəfatını,

Bir daha eşidib bədnam adını,

Xəcalət lap yerə soxur, Laləni.

İsa Qəmbərov:

Gəlmək olmazdımı məgər təcili?

Gəlsə, xoş bir toxum əkər təcili,

O, "İP"-ə gəlməsə əgər təcili,

Alar ağuşuna çuxur Laləni.

Əli Əliyev:

A bədxah, düşmüsən özün tünlüyə,

İndi təsəlli tap, beş-on günlüyə,

"İP"-ində sən düşsən bir çətinliyə,

Çağır köməyinə bağır, Laləni.

İsa Qəmbərov:

"İP"-də kim nə tapsa boğaza tıxar,

Nahaq iş adamı yandırar-yaxar,

Hardan istəyirsən, tap üzə çıxar,

Necə bacarırsan yoğur, Laləni.

Əli Əliyev:

Üzüb əldən salar mərdi, kədəri,

Deyildi gözündə fərdi kədəri,

Çıxıb kəlləçarxa dərdi-kədəri,

Sənin bəd niyyətin boğur, Laləni.

İsa Qəmbərov:

Mükafat verərəm bizə gətirsən,

De ki, Lalə xanım, gülsən-ətirsən,

Tap bizdə sən onu harda itirsən,

Mənim qurumumda doğur Laləni.

Əli Əliyev:

Özünü hamıdan sən say aşağı,

Bir pay qaldır göyə, bir pay aşağı,

Axıdıb əlinlə lap çay aşağı,

İstər çay yuxarı axır Laləni.

İsa Qəmbərov:

Çox da tərifləmə idbar bayquşu,

Tərif nəyə gərək köntöy, zay quşu,

Əsla qorxmasın ki, itirər huşu,

Özünə gətirər buxur, Laləni.

Əli Əliyev:

Toz əksən verəcək, sözsüz, qoz torpaq,

Onun qibləgahı adi boz torpaq,

Gözünü açmağa qoymur toz-torpaq,

Artıq əldən salıb suxur Laləni.

İsa Qəmbərov:

"Yurd" Əli ilə mən "İP"-də pan kimi,

Laləylə olarıq qəlbdə can kimi,

Qoca, əldən düşmüş bir madyan kimi,

Gözləyir, əlbəttə, axur Laləni.

Əli Əliyev:

Xanımı yuxudan çox pis oyadır,

Sanki bu arvadı xəsis oyadır,

Uzaqlığın onda xoş hiss oyadır,

Sənin yaxınlığın sıxır, Laləni.

İsa Qəmbərov:

Siz mahir qaçmaqda bir dovşan kimi,

Hər biri kükrəyib lap coşan kimi,

Qoparıb mənəvi bir nişan kimi,

Döşə, sinəsinə taxır Laləni.

Əli Əliyev:

Çatmaz "MBH"-yə "İP"-lərin yüzü,

Yeyərdi Laləni İsanın özü,

"İP"-də heç bir kəsin götümür gözü,

Tapıb dirigözlü tıxır Laləni.

MİRZƏ QƏRƏNFİL