ALP, “VİP” və “KAXCP” “Üçlər”i

Mirmahmud Fəttayev:

"İP" "Üçlər"i görüb xeyli pərt oldu,

Qurumun nəsibi kədər, dərd oldu,

Doğrudur, altı, beş, sonra dörd oldu,

Buradan meydana atıldı "Üçlər".

Əli Əliyev:

"İP"-çilər qərənfil, jalə Mirmahmud,

Olubdu "Üçlər"də halə Mirmahmud,

Yekdil fikrə gəldi Lalə, Mirmahmud,

Mənim təkidimlə birləşdi güclər.

Mirmahmud Fəttayev:

İnşallah, "İP" yerə qoymaqda dizi,

Bir təkan yerindən qoparar bizi,

"Üçlər" üfüqlərə aparar bizi,

"İP"-də çox avara qalıbdı giclər.

Əli Əliyev:

Narıncı köpəklər ağ, boza hürər,

Bosslar üç badama, bir qoza hürər,

"İP"-dəki sərsəmlər ulduza hürər,

Bundan faydalanar "Üçlər"də biclər.

Mirmahmud Fəttayev:

Zaman bəxş edibdi əzm quruma,

Çoxları etməkdə təzim quruma,

İndi lağ edən çox bizim quruma,

Vaxt gələr təmkinlə alınar öclər.

Əli Əliyev:

"İP"-in həm İsası, Əlisi nəhslər,

Aranı yamanlar sürəkli bəhslər,

Özləri bir iş də görməyən kəslər,

Çəkilən əməyi dərhal da heçlər.

Mirmahmud Fəttayev:

Üç lider arası birləşib güclər,

"İP"-ə həmin andan başlanıb teçlər,

Siyasi meydana giribdi "Üçlər",

Qanlar qaralsa da, kökəlib veclər.

Əli Əliyev:

"İP"-çilər boğular bossun tasında,

Qüsur var hər kəsin xartiyasında,

Əlinin, İsanın partiyasında,

Başlanıb daxildə gizli "inç, inç"lər.

Mirmahmud Fəttayev:

Bizə gətirəcək cəddim, pir uğur,

"İP"-i sarmaqdadı çirk - pas, kir "uğur",

Əgər əldə etsə "Üçlər" bir uğur,

Verilər ziyafət, qonaqlıq, linçlər.

Əli Əliyev:

Sabiqlər girdiyi qurumu yıxır,

Rəqib qurumlardan kadrlar axır,

"İP"-in tərkibindən liderlər çıxır,

"Üçlər"ə girməkdə çoxsaylı gənclər.

Mirmahmud Fəttayev:

Rəqib qurumlarda gedişat boyat,

"Üçlər"də günbəgün canlanır həyat,

"İP"-də İsa, Əli olub narahat,

Bizim son qurumda yığışıb dinclər.

Əli Əliyev:

Qərargahları da zövqsüz yuvadı,

Rəqib də çatışmaz o şey havadı,

"İP"-də liderlikçün güclü davadı,

Üz-üzə dayanıb, dirəşib kəclər.

Mirmahmud Fəttayev:

Biz qərar tutmuşuq zirvədə, pikdə,

"İP" yamaca enib, "Üçlər"sə dikdə,

Bizdə daxilimiz təmizlənməkdə,

Rəqib qurumunda çürüyür içlər.

Əli Əliyev:

Biz "Üçlər" ən böyük sümükdə qaldıq,

İsa, Əli deyir bir tükdə qaldıq,

"Altılar" dağıldı, üçlükdə qaldıq,

Bir dəstək olmadı bizlərə pənclər.

Mirmahmud Fəttayev:

Bütün radikallar işlər civara,

Üzvlər acından çıxır divara,

Əli öz "Yurd"unda qalıb avara,

İsa fırça ilə divar kirəclər.

Əli Əliyev:

Əlini, İsanı boss qoyub yavan,

Hər biri hirsindən deşməkdə tavan,

Vaşinqtonda Billdi, Kremldə İvan,

İranda dəstəkdi "İP"-ə İrəclər.

Mirmahmud Fəttayev:

Bir bizik üstünlük verən yumora,

Əli bir ehtiyac duyur tumara,

Sabiqlər qurşanıb deyən qumara,

Onları yenibdi kazino, mərclər.

Əli Əliyev:

Qurbağa, tısbağa boldu, ilan yox,

Burda nə filankəs, nə də filan yox,

"İP"-də məqsədyönlü plan-mlan yox,

Artıq pozulubdu o qalaq dəclər.

Mirmahmud Fəttayev:

Vəziyyət həminki vəziyyət deyil,

"İP"-i qımıldadan qətiyyət deyil,

Bir məqalə belə xoşniyyət deyil,

Ürək bulandırır yazılı dərclər.

Əli Əliyev:

"İP"-də qərar tutmaz qanmaz mal belə,

Daim üzv yazılır ahıl, kal belə,

Bizə meyil edir o Basqal belə,

"Üçlər"ə gəlməkdə Vəndamlar, Niclər.

Mirmahmud Fəttayev:

İsanın durumu liksik görünür,

"Üçlər"in zirvəsi çox dik görünür,

"İP"-də çöhrələrdə əskik görünür,

Şən əhval-ruhiyyə, fərəh, sevinclər.

Əli Əliyev:

"Üçlər"də hər bir şey münasib, əntiq,

Nə İsa, nə Əli sevməmiş tənqid,

Donub liderlərdə siyasi məntiq,

Sarıb ruhlarını ağır ifliclər.

MİRZƏ QƏRƏNFİL