Etibar Məmmədov kommersiya və siyasət arasında var-gəl edir

Yusif Bağırzadə:

İşığı azalıb, qaralıb meydan,

Qurumlar saralıb, saralıb meydan,

Radikal durumda daralıb meydan,

Mən varam, burada Etibar yoxdu.

Etibar Məmmədov:

Xəstə olan zaman xərək vermişəm,

Qorxan məqamlarda ürək vermişəm,

Mən onu sədr edib çörək vermişəm,

Yusifdə mətinlik, nə vüqar yoxdu.

Yusif Bağırzadə:

Etibar köhnəlib bir çətir kimi,

Onu saxlayırıq xoş ətir kimi,

Təzədən AMİP-ə bir sədr kimi,

Geri qayıtmağa ixtiyar yoxdu.

Etibar Məmmədov:

Yusiflə getmişəm lap Çinə kimi,

Onu çox ötürdüm biçinə kimi,

Səhv edir gözünün içinə kimi,

Dediyi formada bir şüar yoxdu.

Yusif Bağırzadə:

Etibar zəhəri ilandan alır,

Qüvvəni məkrli plandan alır,

O, hətta nəfəsi yalandan alır,

Onda müsbət imic, saf əyar yoxdu.

Etibar Məmmədov:

Olub ön planda gödən amili,

Bir qədər yekəpər bədən amili,

Zəifdi Yusifdə vətən amili,

Ürəkdən sevdiyi bir diyar yoxdu.

Yusif Bağırzadə:

Mən azman bir izəm, Etibar ləpir,

Onun tamahını örtəcək qəbir,

Qrantı yüz faiz gözünə təpir,

Onunçün bir ölçü, bir meyar yoxdu.

Etibar Məmmədov:

Yusif danışmaqda yaşından böyük,

Daş qaldıra bilmir daşından böyük,

Qələt qarışdırır başından böyük,

Onun məntiqində bir uyar yoxdu.

Yusif Bağırzadə:

Bizə yemək verir özü doyanda,

Mən əl götürürəm, düzü, doyanda,

Kənara çəkilmir gözü doyanda,

Etibar qarnında heç doyar yoxdu.

Etibar Məmmədov:

Çəkib sifətinə siyasi kiri,

Onu siyasətdə saymıram diri,

Yusif özlüyündə zırpının biri,

Milli mentalitet, nə də ar yoxdu.

Yusif Bağırzadə:

Guya bizdən artıq bir talantdı o,

Siyasətdə adi bir kursantdı o,

Deyir ki, Londonda kommersantdı o,

Nə daşınmaz mülki, nə də var yoxdu.

Etibar Məmmədov:

Bəyanatlar verdim bir siftə mən də,

Sədr olduq qurumda hərif də, mən də,

Kamil AMİP-çiyik Yusif də, mən də,

Bizim aramızda sərt divar yoxdu.

Yusif Bağırzadə:

Olub alma, armud, nar aramızda,

Məsləhət-məşvərət dar aramızda,

Nə bir sərhəd, nə hədd var aramızda,

Dialoqa zərər bir civar yoxdu.

Etibar Məmmədov:

Əli Əliyev tək olubdu xata,

Yusifin sözündən duydum qan-qada,

Xoş günlər, əlbəttə, qalıb arxada,

Məncə, aramızda qəm-qübar yoxdu.

Yusif Bağırzadə:

Bir neçə il öncə yayda qərq olduq,

Bossdan da yox fayda, mayda qərq olduq,

AMİP gəmisində çayda qərq olduq,

Xilas olmaq üçün bir avar yoxdu.

Etibar Məmmədov:

Deyirəm, oxucu, gəl, az deyinək,

Vardır ürəyində əbədi göynək,

Nə əynində gözəl narıncı köynək,

Yusifin əynində bir şalvar yoxdu.

Yusif Bağırzadə:

Düzü, eyləmirəm mən naz, küsmüşəm,

Mən saçlı-saqqallı, o, daz, küsmüşəm,

Lider Etibardan bir az küsmüşəm,

Onun başı üstə talvarı yoxdu.

Etibar Məmmədov:

Real sədr xeyli amansız adam,

Həm dindən çox uzaq, imansız adam,

Yusif həddən artıq imkansız adam,

İstirahət üçün bulvarı yoxdu.

Yusif Bağırzadə:

Mənim Etibara çox sualım var,

Cavab verə bilməz, pak amalım var,

Deyir ki, Londonda mülküm-malım var,

İlxısı, sürüsü, davarı yoxdu.

Etibar Məmmədov:

Xeyli fağırzadə məzlumun biri,

Həcmi ağırzadə məzlumun biri,

Yusif Bağırzadə məzlumun biri,

Yoxdu tavarnisi, tavarı yoxdu.

Yusif Bağırzadə:

Zərbəmdən saralıb dərhal solacaq,

O, məndən tutarlı cavab alacaq,

Etibar kobuddu, kobud qalacaq,

Adam sığallayan tumarı yoxdu.

Etibar Məmmədov:

Məzlum görkəmində görərəm onu,

Dipdiri divara hörərəm onu,

Əbədi yuxuya verərəm onu,

Yusifin yatmağı, xumarı yoxdu.

Mirzə QƏRƏNFİL