Rauf Arifoğlu: “Başqan postunda iti görüm - qurdu görüm, Arif Hacıyevi görməyim”

Rauf Arifoğlu:

İsa tək "yalançı div"i görməyim,

Məndən uca heç bir KİV-i görməyim,

Təki Arif Hacıyevi görməyim,

İti-qurdu görməyə də hazıram.

Arif Hacıyev:

Dərin quyu qazdım çox nakəslərə,

Arzu tək naxələf çıxan pəslərə,

Rauf tək namizəd olan kəslərə,

İsaya qazdığım qəbri qazıram.

Rauf Arifoğlu:

Arif başqanlığa gələcəksə tuş,

Çox su aparacaq bu köntöy uçuş,

İşdi, buraxanda Ləbbeyk Arif quş,

Dərhal qəzetimdə yazı yazıram.

Arif Hacıyev:

"Tövrat"ı bitirdim, Musanı yıxdım,

Tülküdən tülüngü lisanı yıxdım,

Bir xətt üstə duran İsanı yıxdım,

Digər rəqiblərçün plan cızıram.

Rauf Arifoğlu:

Gözdən buraxmaram bu miskin bəyi,

Bu bədnam adamın yamandı səyi,

Gözümə dəyəndə namizədliyi,

Arifin adını dərhal pozuram.

Arif Hacıyev:

Qərbi dönük görcək xeyli çaşıram,

Hər boss görəndə baryer aşıram,

Raufu görəndə coşub-daşıram,

İsanı görəndə bir az mısıram.

Rauf Arifoğlu:

"İP"-in günü-gündən rəngi saralır,

Müsavata baxcaq səbrim daralır,

İsanı görəndə qanım qaralır,

Arif nə danışsa, tərsə yozuram.

Arif Hacıyev:

Halım xarab Misir, Yəməndən sonra,

Qərbin bosslarını əməndən sonra,

İsanı dar qəbrə göməndən sonra,

Qurumda yeganə milli kozuram.

Rauf Arifoğlu:

Bilir getməlidi, o, bunu duyur,

İsa məni görüb yatıb uyuyur,

Arifi görəndə axşam soyuyur,

Günortaya yaxın yaman qızıram.

Arif Hacıyev:

Məni öz yerində görüb o, susur,

Başqan İsa bəydə yüzlərlə qüsur,

Bayırda qalanda çoxları qusur,

Türməyə salırlar, orda qusuram.

Rauf Arifoğlu:

Fələk indi başqan yoğurur məni,

Qələm dostlarım da doğurur məni,

Eşitsəm, kütlələr çağırır məni,

O vaxt aram olub, qulaq asıram.

Arif Hacıyev:

Qərbdə bu adamı sevib duyan yox,

Son vaxtlar İsaya bossdan həyan yox,

Biləndə ki, məni qurdalayan yox,

O vaxt sakitləşib qəsdən susuram.

Rauf Arifoğlu:

İsa cəhənnəmə, basıb qəm onu,

Çürüdür günbəgün içdən nəm onu,

Arif zəif gəlsə, yenirəm onu,

Təzyiq göstərəndə, quyruq qısıram.

Arif Hacıyev:

Ay Rauf, quruma çoşqan gələrsə,

Bişirib yeyərdim, asan gələrsə,

Yerimə başqası başqan gələrsə,

Elə bilərəm ki, dərdli qısıram.

Rauf Arifoğlu:

Amerika, Rusiya, Hindistan, Çində,

Qışın şaxtasında, yayda biçində,

Hazırda Arifi türmə içində,

Onu izləyərək gizli pusuram.

Arif Hacıyev:

İsanın azalıb sözdə kəsəri,

İndi kəsib yeyir keşniş, vəzəri,

Süquta uğradıb namizədləri,

Gərək İsa kimi qəbrə basıram.

Rauf Arifoğlu:

İsa başqan olar, etmirəm güman,

Arifə, Arzuya vermərəm aman,

Kimsə məni keçmək istəyən zaman,

İki ayağımla qazı basıram.

Arif Hacıyev:

Başa dırmaşıram imkan verəndə,

Zamanım daralır, məkan verəndə,

Mənə kiçicik bir təkan verəndə,

Dərhal qudururam, həddi aşıram.

Rauf Arifoğlu:

Arif bəy, köklənib mırroya doğru,

Mənsə milliliyə, həm soya doğru,

Redaksiyam olan Vosmoya doğru,

Başımı götürüb dərhal qaçıram.

Arif Hacıyev:

Müsavatın çörək sacı itibdi,

Qərbin də gümüşü tacı itibdi,

"İP"-də də kələfin ucu itibdi,

İsanı görəndə, daim çaşıram.

Rauf Arifoğlu:

Çoxunu yenmişəm şişimə çəkib,

Cılızlaşdırmışam peşimə çəkib,

Bir çox namizədi dişimə çəkib,

Arzu eyləyirəm yeyib aşıram.

Arif Hacıyev:

A bosslar, önəmli toçkan oluram,

Ya İsa əlində çuşkan oluram,

Ya mən qurultayda başqan oluram,

Ya Qərbə, ya da ki, Şərqə uçuram.

MİRZƏ QƏRƏNFİL