Radikal gənclər İsa Qəmbərovu Pənah Hüseynova qarşı mübarizəyə çağırırlar

İsa Qəmbərov:

"İP"-də, düzü, cəbhə-cinah kükrəyib,

Rəzilliklər artıb, günah kükrəyib,

Gənclər deyir Qarpız Pənah kükrəyib,

Radikalı çökürdəcək bəd yeli.

Pənah Hüseynov:

Tez-tez istəyərlər Qərbdən bal-pətək,

Qrant versin istər boss ətək-ətək,

Başqan qalmaq istər Qiyamətədək,

Yığıbdı başına İsa kor-şili.

İsa Qəmbərov:

Pənah çayxanada daim dardadı,

Mənə çatdırdılar o, bulvardadı,

Axı bu Pənahda o güc hardadı

Ki, yıxsın mənim tək azman bir fili?!

Pənah Hüseynov:

Həm gündüz qısılıb, gecə qısılıb,

Qısılıb, özü də, incə qısılıb,

İsa Müsavatda küncə qısılıb,

Totuq vurmaqdadı son vaxtlar dili.

İsa Qəmbərov:

Məcnunu Leyli ki, dirçəldəcəkdir,

Bizi qrant meyli dirçəldəcəkdir,

Sözsüz, məni xeyli dirçəldəcəkdir,

Pənahı yeyəcək Əjdaha ili.

Pənah Hüseynov:

Başqanın ardınca hürüyəcəyəm,

Üstünə çıxaraq yürüyəcəyəm,

İsanı yıxaraq sürüyəcəyəm,

Gənclərin gözünə çəkəcəm mili.

İsa Qəmbərov:

Burnundan gəlmişə çox verdim çörək,

O, mənim arxamda olmadı dirək,

Vuraram Pənahın başına zirək,

Yerdən götürərək kürəkli beli.

Pənah Hüseynov:

Müsavat budağı bir quş gətirməz,

Bu mövqe başqana quruş gətirməz,

İsa qarşısında duruş gətirməz,

Sapdırmaz önündən mənim tək seli.

İsa Qəmbərov:

Bu adam dolaşır boşuna qəfil,

Zəhər də qatarıq aşına qəfil,

Tökərik Pənahın başına qəfil,

Xeyli qarışdırıb betonlu gili.

Pənah Hüseynov:

Son senti götürüb İsa son bossdan,

Biçdirir əyninə neçə don bossdan,

Mükafat götürür gündə on bossdan,

Odur ki, artıbdı üzünün çili.

İsa Qəmbərov:

Əta edəcəkdir boss paydan bizə,

Dram axacaqdır bu haydan bizə,

Tezliklə dəryadan o taydan bizə,

Yardım göstərəcək Ekvador, Çili.

Pənah Hüseynov:

Bu adam qudurdu Qərbdən axından,

Bir tük də verməmiş başqan bağından,

İsanın gənclərə yaxşılığından,

Daha çox pisliyi, məkri və feli.

İsa Qəmbərov:

Sırsıdar sis duman, həm də çən onu,

Çıxarıb atmışam ürəkdən onu,

O, məni eşitmir, sözsüz, mən onu,

Mən Əli olmuşam, Pənah da Vəli.

Pənah Hüseynov:

Radikal gənclərlə olub tən kimi,

Göstərir özünü xeli şən kimi,

Mənim planımı eşidən kimi,

İsa Müsavatda olubdu dəli.

İsa Qəmbərov:

Girib siyasətə qolumun üstdən,

Keçdi ora-bura pulumun üstdən,

Mən onu atsam da yolumun üstdən,

O, mənə qurubdu sarsılmaz pəli.

Pənah Hüseynov:

Nə bir məramı var, amal cəhənnəm,

İsada baş yoxdu, kamal cəhənnəm,

Cənub sola getsin, Şimal cəhənnəm,

Heç Qərbə də çatmır İsanın əli.

İsa Qəmbərov:

Başqan boyun qırdı, əsil sırt, Əli,

Onunla "İP"-də çox vurdu mırt Əli,

İsa çaqqal, tülkü, əsil qurd Əli,

Toya getməmişdi bizim "Yurd" Əli.

Pənah Hüseynov:

İsaya çevirib çoxdan dal, gənclər,

Gömüb onu qəbrə radikal gənclər,

Yanında boynunu büküb mal gənclər,

Öküzü andırır İsa, mən kəli.

İsa Qəmbərov:

Pənah dəstəklədi harınlarımı,

Bosslardı dolduran qarınlarımı,

Məhv etmək istəyir qurumlarımı,

Olub mənim üçün Pənah bir zəli.

Pənah Hüseynov:

Haqsızdı önündə İsanın dinən,

Ondan tədbirlidi Nüşabə zənən,

Hazırda İsa bəy ölübdü mənən,

Heç ola bilərmi başqan da ölü?

İsa Qəmbərov:

Pənah sönük şamdı, İsa mayakdır,

Özümə radikal gənclər dayaqdır,

Gənclərin gözündə o, baş-ayaqdır,

Əsil vələdüzna, Pənah bəy tülü.

Pənah Hüseynov:

Dilində həmişə andlar-amanlar,

İsanın başının üstü dumanlar,

Qapıdan içəri girən zamanlar,

Həmkarlar göstərir İsaya çölü.

MİRZƏ QƏRƏNFİL