Yeni Müsavat başqanı Qərbdən qrantı birbaşa almaq imkanında olacaq

İsa Qəmbərov:

Çoxuyla tüpürdüm ilqara belə,

Düşdüm qəm-kədərə qübara belə,

O gün mən demişəm Sərdara belə,

Başqanlıq postuna mən getməyəcəm.

Arzu Səmədbəyli:

Bu yöndə qurumda tarif seçilsə,

Sənaye şöbəsi, maarif seçilsə,

Başqan Qubad, ya da Arif seçilsə,

Heç də qərargahdan şən getməyəcəm.

İsa Qəmbərov:

Dəryadan o yana axmaqdan bezdim,

Ağıllı görünən axmaqdan bezdim

Sozalmış üzlərə baxmaqdan bezdim,

Həmkar yetkiliyə tən getməyəcəm.

Arzu Səmədbəyli:

Hazırda İsayçün girməyə kol yox,

Sağa meyilliyəm, mənimçün sol yox,

Başqanlıq eşqindən geriyə yol yox,

Düşsə duman, çiskin, çən getməyəcəm.

İsa Qəmbərov:

Məni qınamaqda qohum-qardaşım,

Bu məsələdə çox ağrıyıb başım,

Artıq qocalmışam, keçibdi yaşım,

Düşübdü başıma dən getməyəcəm.

Arzu Səmədbəyli:

Bəlkə bir nəticə vermədi səyim,

Ali yığıncaqda pisləndi rəyim,

Mümkün ki, arzuma heç yetişməyim,

Çıxmasa da yuxum çin, getməyəcəm.

İsa Qəmbərov:

Təklifi çox yumşaq, ya da ki, bərk et,

Yaxud boss puluna Qərbi şərik et,

İstər başqanlığa məni təhrik et,

Noxtala, belimə min, getməyəcəm.

Arzu Səmədbəyli:

Kim dedi qəlbini bir yoluğa aç,

Qarmağına düşən o balığa aç,

Sən özün ağzını yaxşılığa aç,

Ya da xoşqılıq din, getməyəcəm.

İsa Qəmbərov:

Ürəyim nisgildən dağlanıb artıq,

Düzdü, qarnım, ardım yağlanıb artıq,

Başqalıq yolum da bağlanıb artıq,

Təklif et əlli, yüz, min getməyəcəm.

Arzu Səmədbəyli:

Mənə həmkarların artır hörməti,

Tökməz kütlələr də canımdan əti,

Başqanlıq mövqemdə niyyətim qəti,

Qaytarmaz məslək, din, getməyəcəm.

İsa Qəmbərov:

İsa bəy özü də düzümdən düşüb,

Zəif Müsavat da dözümdən düşüb,

Başqan vəzifəsi gözümdən düşüb,

Qrant versə də Çin, getməyəcəm.

Arzu Səmədbəyli:

İsa da qaytarmaz sərhəddən məni,

Heç kəs də çıxarmaz bu həddən mən,

Dödərmək çətindi məqsəddən məni,

Aldatsa şeytan, cin, getməyəcəm.

İsa Qəmbərov:

İstəsən başqan ol sən üzüyola,

Ataram postumu şən, üzüyola,

Getsəm, gedəcəyəm mən üzüyola,

Heç vaxt qəlbimdə kin, getməyəcəm.

Arzu Səmədbəyli:

Olmaq istəməsən əgər sən zökəm,

İsaya deyərəm, gəl mənə söykən,

Sədr kürsüsündə oturram möhkəm,

Postda cıraram şin, getməyəcəm.

İsa Qəmbərov:

Yazıqdı, kim düşsə belə cənnətə,

Salmaq istəyirlər məni sünnətə,

Qəbirdən dirilib mənə minnətə,

Gəlsə də Üsamə bin, getməyəcəm.

Arzu Səmədbəyli:

Ay İsa, bayıra çıx, xeyli haylan,

Hələ də tükənmir başqanlıq laylan,

Başını qaldırıb göylərə boylan,

Ya da ki, yerə sin, getməyəcəm.

İsa Qəmbərov:

Havada yellətmə nahaq qolunu,

Çox yaxşı bilirəm bunun yolunu,

Qəbul etməliyəm Qərbin pulunu,

Salsan da sən səs-küy, ün getməyəcəm.

Arzu Səmədbəyli:

Bossları marıqda yatıb güdərəm,

Pulçün Ermənistan deyib gedərəm,

Qrantı özüm də qəbul edərəm,

Lap yerdən yerə en, getməyəcəm.

İsa Qəmbərov:

Postumu sizlərə ötürəm desəm,

Gənclərə mən güzəşt edirəm desəm,

Nə qədər yalandan gedirəm desəm,

Məndə qalındı gön getməyəcəm.

Arzu Səmədbəyli:

Ay İsa, sən yenə danışdın qəliz,

Qurultay səni də eyləyər silis,

Elə ki, bu postda oturdum səlis,

İstəyir geri dön, getməyəcəm.

İsa Qəmbərov:

Yeni namizədlər qalıb pis gündə,

Vurub ayağına zaman bir kündə,

Bineyi-qədimdən olmuşam öndə,

Yenə də olaram ön, getməyəcəm.

Arzu Səmədbəyli:

Olmaram heç zaman "Yurd" Əli kimi,

İsa zor göstərir lap dəli kimi,

Posta yapışaram məni zəli kimi,

İstəyir alış, yan, sön, getməyəcəm.

MİRZƏ QƏRƏNFİL