Müxalifət daxilində qarşıdurma get-gedə artır

Rauf Arifoğlu:

Əli "Yurd" cəbhəsi qəfəsindədir,

Murdarlıq İsanın nəfəsindədir,

Hər bir "bəy" liderlik həvəsindədir,

Radikal durumda didişmə artıb.

Qabil Hüseynli:

Qərb qrantlarını bizə yaladır,

Didişmə kənardan gələn bəladır,

Bizim içimizdə hər şey əladır,

Sadəcə, bir qədər gicişmə artıb.

Rauf Arifoğlu:

İfrata bəxş edib bunu Yaradan,

Biri seçə bilmir ağı qaradan,

Burada sabitlik qalxıb aradan,

Təlatüm, ixtilaf, icəşmə artıb.

Qabil Hüseynli:

Əli də "Yurd"unda erkən durubdu,

İsa da pislərlə əhdi qırıbdı,

Qrant məbləğini Qərb artırıbdı,

Avrolar, dramlar- gur çeşmə, artıb.

Rauf Arifoğlu:

İsa yalançıya olsun ayıblar,

Əliyə kütlə çox verdi qayıblar,

Ayaqlar altını çox qazıyıblar,

Odur ki, özünə gor eşmə artıb.

Qabil Hüseynli:

"İP" də, Müsavat da cağbacağ, abad,

Bizdə yox əskiklik, nə də tələfat,

Pulsuzluq yaradıb ciddi tələbat,

Həmkarın cibini tək deşmə artıb.

Rauf Arifoğlu:

Bol məhsul yetişir indi bu bağda,

Yardımı axtaraq gərək biz Haqda,

Yetkilinin çoxu arıqlamaqda,

Lider qarınında köp, şişmə artıb.

Qabil Hüseynli:

Bosslar istəyir ki, ciddi iş görək,

Bizlərə həmişə Qərb verir çörək,

Xeyli xoş əməldən sıxılmır ürək,

Qaysaqlı yarada xılt, bişmə artıb.

Rauf Arifoğlu:

Mənim qəzetimin çapı açıqdı,

Bizə dəyən balta sapı açıqdı,

Burdan gedənlərə qapı açıqdı,

Saralan yarpaqtək sərt düşmə artıb.

Qabil Hüseynli:

Bizlərə gülməkdə boss üzü belə,

Eşələyən azdı od-közü belə,

Artıq bağlanıbdı "Yurd" özü belə,

Müsavata, "İP"-ə üzv keçmə artıb.

Rauf Arifoğlu:

Problem yoxdusa, giley qalmayıb,

Viski, araq, çaxır, saf mey qalmayıb,

Müsavatda yaxşı bir şey qalmayıb,

Qab dolu qəm-qübar, dərd içmə artıb.

Qabil Hüseynli:

Pulu Qərb bossundan almaq istəyir,

"Bəy" dadaş postunda qalmaq istəyir,

İsa da namizəd olmaq istəyir,

Başqanlığa layiq sayseçmə artıb.

Rauf Arifoğlu:

Quru dollarını a boss, nəmişlə,

Uzağa getməzsən ifrat Məmişlə,

İsanın əlində olan qəmişlə,

Boyunları ölçmə və biçmə artıb.

Qabil Hüseynli:

Bu yerə qısalıb dəstək verən əl,

Hər yerindən duran "bəy"ə vurur pəl,

Başlıca peşəmdi burada var-gəl,

Sağ-sola getməklə həm ölçmə artıb.

Rauf Arifoğlu:

Rəqiblər boylanır küncdən, dalandan,

Yaman qürrələnir qrant alandan,

İsa bəy boş yerə hay-küy salandan,

Radikal durumda hürüşmə artıb.

Qabil Hüseynli:

Həmişə özündən razı qalsa da,

İsa bəy araya dava salsa da,

Dediyinə görə az pul olsa da,

Qərbli serlər ilə görüşmə artıb.

Rauf Arifoğlu:

Çəkdikcə içinə pis nəfəsini,

Büruzə verdikcə pul həvəsini,

İsa qabartdıqca öz sinəsini,

Müsavat içində gəlişmə artıb.

Qabil Hüseynli:

Başqan əldən vermir səy bölgüsünü,

O, əsas tutmaqda vəhy bölgüsünü,

İsa sevməsə də rəy bölgüsünü,

Həmkarla fikrini bölüşmə artıb.

Rauf Arifoğlu:

Qrant qazanaraq şişdikcə İsa,

Bossun qazanında bişdikcə İsa,

Meymun obrazına düşdükcə İsa,

Radikal durumda gülüşmə artıb.

Qabil Hüseynli:

İsa dövrü üçün yetib ərəfə,

Mən də tost demişəm məhz bu şərəfə,

Yol yoxdu başqandan əks tərəfə,

İsa bəy tərəfə sürüşmə artıb.

Rauf Arifoğlu:

Onun yekə başı, əli xınalı,

O, dollar atalı, avro analı,

İsa getməmişdi, bu, birmənalı,

Artıq köhnələrdə ilişmə artıb.

Qabil Hüseynli:

Biri Sabirabad, biri salyanlı,

Başqan beynilmilər, özü hər yanlı,

Hazırda İsanın ağzı qəlyanlı,

Ətrafında bığları eşmə artıb.

MİRZƏ QƏRƏNFİL