Əli Kərimov “Azadlıq” qəzeti üzərində nəzarəti gücləndirir

Əli Kərimov:

Bizim "Azadlıq"da güclüdü yayım,

Məndə casus kimi nəzarət qaim,

Gözüm "Azadlığ"ın üstündə daim,

Nəzarət, nəzarət, yenə nəzarət.

Qabil Hüseynli:

Gedib boss qabını yalarsa əgər,

Xarici əmlakı talarsa əgər,

Kim bizə bəd nəzər salarsa əgər,

Həqarət, həqarət, yenə həqarət.

Əli Kərimov:

Kibriti çəkərəm həzin İsaya,

Tökərəm beş litr benzin İsaya,

Hücum etmək üçün sizin İsaya,

Tapmışam özümdə böyük cəsarət.

Qabil Hüseynli:

Yaşadın papağı yerə soxaraq,

Töküldü cibinə qrant axaraq,

Satdın vətənini Qərbə baxaraq,

Sənin siyasətin oldu ticarət.

Əli Kərimov:

İsadı bizləri eyləyən pamal,

Qrantı almalı, yox başda kamal,

Mən yalnız arabir vurmaqdayam xal,

İsadı oxuyan Qərbdə nəqarət.

Qabil Hüseynli:

Eynəyi fırladıb gözünə tərəf,

Yönəltdin başqanı izinə tərəf,

Çəkib bosslarını özünə tərəf,

İsanı bu yolla sən etdin qarət.

Əli Kərimov:

Qrantın dadını dilinə verdi,

İsa da ayını ilinə verdi,

Qəzeti Raufun əlinə verdi,

Özüm "Azadlığ"ı etdim qiraət.

Qabil Hüseynli:

İsadı toplayan əsas balları,

Sənin kimiləri onun qulları,

Yalnız İsadadı Qərbin pulları,

Qəzetdən qurardı sənə imarət.

Əli Kərimov:

Qəzeti başqanı sıxıb, qocaldıb,

O da siyasətdə çürüyüb, qartıb,

"Azadlıq" başımı göyə ucaldıb,

Liderlik edibdi mənə sirayət.

Qabil Hüseynli:

Meşədə şir-şür yox, lisa hökmran,

Sən öz partiyanda qısa hökmran,

"Yeni Müsavat"da İsa hökmran,

Sən öz qəzetini eylə ziyarət.

Əli Kərimov:

Xaric az verməkdə bizə qiymətlər,

Zülmətə aparır bizi niyyətlər,

Çoxdu ikimizdə xüsusiyyətlər,

İsada rəzalət, məndə dəyanət.

Qabil Hüseynli:

Min cildə düşdün sən həftədə, gündə,

Dedin İsa pisdi bucaqda-tində,

Nifrinlər yağdırıb öz qəzetində,

Sən etdin şefimə daim xəyanət.

Əli Kərimov:

Mənə kömək edər bu qadir Allah,

Pənah da gətirər bir mənə Pənah,

Əli istefaya gedir, inşallah,

Mənimdi küçələr, meydan, siyasət.

Qabil Hüseynli:

Meydanda İsaya sən yekə pazdın,

Mtinqdə, piketdə yolunu azdın,

İsa ayağının altını qazdın,

Olacaq nəsibin pislik, riyazət,

Əli Kərimov:

Qərbdən qrant qıran qanadlı quşam,

Sənin başqanınçün sərt qarlı qışam,

Qəzetdə yazımda səhv buraxmışam,

İsa törədibdi çoxlu cinayət.

Qabil Hüseynli:

Başqan siyasətdə yetkin, sənsə kal,

Gözünü bərəldib baxardın mal-mal,

Çəkilib durardın bir bucaqda lal,

İsa göstərərdi ancaq şücaət.

Əli Kərimov:

Düzgün mövqeyinə nəhsliklər edib,

Düz söz söyləmişəm, tərsliklər edib,

O, mənə nə qədər pisliklər edib,

İndinin özündə çəkmir xəcalət.

Qabil Hüseynli:

Qəzetin nə sənə, nə bizə qala,

Dediyin sözləri təkrar az yala,

Özünü salmısan eybəcər hala,

Əcəba, özün de, Əli, nə halət?

Əli Kərimov:

Müsavat dumanım, çənim olacaq,

Xaric başqanına qənim olacaq,

Həmişə "Azadlıq" mənim olacaq,

Sizin qəzetiniz mənə qənimət.

Qabil Hüseynli:

Qabil də axtarıb-itənin deyil,

İsa bəy süfrəni güdənin deyil,

Müsavat heç zaman düşmənin deyil,

Acı sözlər demə, məndən əmanət.

Əli Kərimov:

Ürəyim bulanır, həm mədəm basır,

Sizin Müsavatı dərd-sitəm basır,

İsa hansı yerə nəhs qədəm basır,

Fəlakət üstünə gəlir fəlakət.

Qabil Hüseynli:

Bilirəm, qamətin olduqca zərif,

Özünü lider tək eyləmə tərif,

Başını o qədər dik tutma, hərif,

İnşallah, "Yurd"unda qopar qiyamət.

Mirzə Qərənfil