Etibar və Pənahın mükaliməsi

Etibar Məmmədov:

Aya nəhs hürüşü təbliğ etmirik,

Lüzumsuz görüşü təbliğ etmirik,

Mitinqi, yürüşü təbliğ etmirik,

Bilirik ki, sonu iflas olacaq.

Pənah Hüseynov:

Doyunca tıxarıq küftə, aş olsa,

Polisə atarıq çoxlu daş olsa,

Mitinq genişlənib iğtişaş olsa,

Qəti mövqeyimiz qisas olacaq.

Etibar Məmmədov:

Razılığı "hə, da, yes" tək verərdik,

Mitinqə, yürüşə istək verərdik,

Ona qoşaəlli dəstək verərdik,

Bilsəydik, bu, ciddi əsas olacaq.

Pənah Hüseynov:

"İP" başına Qərb də səpərdi şəkər,

Əlbəttə, olsaydı vasitə digər,

Müsavat başqanı mən olsam əgər,

Radikalın sonu xilas olacaq.

Etibar Məmmədov:

Bosslara yapışan saqqız açdınız,

Əvvəl çox donoslu kağız açdınız,

Avropaya geniş ağız açdınız,

Yediyiniz ancaq gilas olacaq.

Pənah Hüseynov:

Anbara narıncı libas vururuq,

Daxili qurumda əsas qururuq,

İndi kütlələrlə təmas qururuq,

"İP"-in gələcəyi klass olacaq.

Etibar Məmmədov:

Abır-həya da yox, sizin tək fərddə,

Gördüm hamınızı kədərdə, dərddə,

Çox uduzmusunuz siyasi nərddə,

Uğursuz sonluqlu çox tas olacaq.

Pənah Hüseynov:

Gəl, elə səninlə vuraq viskini,

İçər bizim kimi durak viskini,

Əvvəl gilləndirib araq, viskini,

Üstündən içilən kvas olacaq.

Etibar Məmmədov:

Tutmuşuq AMİP-də biz qəti yolu,

Tapa bilmədiniz ən iti yolu,

Yəqin sizin "İP"in növbəti yolu,

Gilan, Mazandaran, Sivas olacaq.

Pənah Hüseynov:

Qərbdə də, bizdə də işləyir qafa,

Məqsəd odur biz heç çəkməyək cəfa,

Yenə də edərik biz əhdə vəfa,

Seçim də narıncı libas olacaq.

Etibar Məmmədov:

Dəryada sahilə çatan zamanda,

Bosslar cümlənizi atan zamanda,

İsanın qayığı batan məqamda,

Görünür, Əli də qəvvas olacaq.

Pənah Hüseynov:

Batdınız zülmətin tünd qarasında,

Titullu kəslərin biz sırasında,

Bizim "İP"-lə məlum Qərb arasında,

Pozulmaz, qırılmaz təmas olacaq,

Etibar Məmmədov:

Siz geridə qalan, biz qaza verən,

Son anda uduzar avaza verən,

Sizi siyasətdə güdaza verən,

"Hizbullah" olmasa, "HƏMAS" olacaq.

Pənah Hüseynov:

Buxarlanan su tək töküldün geri,

Duruş gətirmədin, əkildin geri,

Siyasi meydandan çəkildin geri,

Nəsibin əzablı, boş-bas olacaq.

Etibar Məmmədov:

Ən yüksək kürsüdə ona yer olub,

Daim adlı-sanlı mister, ser olub,

Etibar həmişə "as" lider olub,

Bundan sonra daim o, "as" olacaq.

Pənah Hüseynov:

Qərb durub arxada, ən uca dağıq,

Dövlətə qarşı biz asiyik, ağıq,

Tezliklə qiyamət qoparacağıq,

"İP"-in son mənzili plas olacaq.

Etibar Məmmədov:

Əzəldən bosslara nökərsiniz siz,

Daş-kəsəkli yolda sökərsiniz diz,

İnşallah, tezliklə çökərsiniz diz,

Yeni uğursuzluq miras olacaq.

Pənah Hüseynov:

Tapdın yaşamağın çəmin, adamsan,

Ancaq dost-tanışa zəmin adamsan,

Heç dəyişməmisən, həmin adamsan,

Dəstəkləyənlər də pis mas olacaq.

Etibar Məmmədov:

Hətta ayağınız ağır ayaqdır,

Zaman sizi bənd-bənd doğrayacaqdır,

"İP"-niz qəzaya uğrayacaqdır,

Yolda kələ-kötür trass olacaq.

Pənah Hüseynov:

Tənha qalacaqsan son anda ancaq,

Ətrafında fikir haçalanacaq,

AMİP-in bir daha parçalanacaq,

Nümunən özünə tam xas olacaq.

Etibar Məmmədov:

Hopdun boss cibinə zəlilər kimi,

Hayqırdın meydanda dəlilər kimi,

Adın İsa kimi, Əlilər kimi,

Siyasətdən uzaq şünas olacaq.

Pənah Hüseynov:

İşim yox istiylə, boran-qar ilə,

"İP"-də rastlaşmazsan fikri dar ilə,

Adımız dollarla, avrolar ilə,

Dramla, rublla cinas olacaq.

Mirzə QƏRƏNFİL