Müxalifətin mitinqində az adam iştirak edib

Nüşabə Sadıxlı:

Mitinqə yollandıq biz gülə-gülə,

Düşündük kütlələr dönəcək selə,

Mitinq icazəli sayılsa belə,

Adam toplamadı kifayət qədər.

Gözəl Bayramova:

Təşkilatçıların artmışdı qəmi,

Qrantsız liderin gəlmirdi dəmi,

Keçmiş zamanlarda olduğu kimi,

Əli də, İsa da qışqırdı hədər.

Nüşabə Sadıxlı:

Akiflər, ariflər, zöhrələr tutqun,

Aksiyadakı gənc pöhrələr tutqun,

Qanımız qaraydı, çöhrələr tutqun,

İtin və ulağın qanından betər.

Gözəl Bayramova:

Bosslar "İP"-çiləri çevirər gerbə,

Biz xaric cibinə vurarıq zərbə,

Kütləni minlərlə göstərib Qərbə,

"İP"-də başbilənlər sırf maraq güdər.

Nüşabə Sadıxlı:

Çətin ki, fikrindən dönüb daşına,

Verilən qrantı danıb yaşına,

İsa da səsini salar başına,

Bizim başqanımız bülbül tək ötər.

Gözəl Bayramova:

Hər kəs xəcalətdən qəlbini yeyər,

Pul göndərən bossa dönüb baş əyər,

Bosslar ünvanına təriflər deyər,

Əlinin bağında qrantlar bitər.

Nüşabə Sadıxlı:

Sevinərək Qərbdən qrant saz gəlsə,

Mitinqlər də artar isti yaz gəlsə,

Gələcək mitinqə kütlə az gəlsə,

Bossun İsa bəyə hörməti itər.

Gözəl Bayramova:

"İP" 8 apreldə verdi tası da,

Adam unudardı qəmi, yası da,

İndiyədək pasport almaması da,

Bizim "Yurd" Əlinin qəlbini didər.

Nüşabə Sadıxlı:

Qərb də heç bir qüsur sezməyəcəkdi,

Kütlə dodağını büzməyəcəkdi,

Gələn mitinqlərdə üzməyəcəkdi,

Bizim liderlərin qəlbini kədər.

Gözəl Bayramova:

Piket yaxşı olar, baxarıq kefə,

O vaxt çox adamla vurruq hədəfə,

Bizi sevindirər növbəti dəfə,

Mitinqi uğura çatdırar Qədər.

Nüşabə Sadıxlı:

Aksiya olanda kütlə oyanar,

Küçələr narıncı rəngə boyanar,

Mitinqsiz "İP" özü donub dayanar,

Necə ki, gəmini gözləməz vətər.

Gözəl Bayramova:

Gülmürdü Əlinin, İsanın üzü,

Adamların sayı keçməzdi yüzü,

Bazar günü mitinq süst keçdi, düzü,

Bizim başımızda dolanır xətər.

Nüşabə Sadıxlı:

Radikal süst düşüb ölüdən artıq,

Söz də deməz bossa "bəli"dən artıq,

Kədərlənər İsa Əlidən artıq,

Həm də öz işinin dalınca gedər.

Gözəl Bayramova:

Son illər də dəymir yeli xaricə,

Əli deyə bilmir "bəli" xaricə,

Çatmadığı üçün əli xaricə,

Əli həmkarların cibini ütər.

Nüşabə Sadıxlı:

Adi ov da, sözsüz, qanlı olmalı,

Mitinqlər möhtəşəm, şanlı olmalı,

Yürüşlər, piketlər canlı olmalı,

Sönük mitinqləri keçirmək yetər.

Gözəl Bayramova:

Artmalı kütlənin sayı, həm miqdar,

Piketdə olmalı çox təmkin, vüqar,

Mitinqə gəlməli çox Ülvi, İlqar,

Əlbəttə, gəlməli həm Bəsti, Yetər.

Nüşabə Sadıxlı:

"İP"-in liderləri şər, cüdam olub,

Mitinqdə az adam öz xatam olub,

Boss bilsə meydanda az adam olub,

Qrant boğçasını dərzi tək çitər.

Gözəl Bayramova:

İndi liderlərin meyli araqdı,

Göyün dərinliyi bizdən iraqdı,

Yəmən, Oman bizdən xeyli uzaqdı,

Bizim səsimizə səs verməz Qətər.

Nüşabə Sadıxlı:

Üzvlər qurumda boğulub gedir,

Bossların cibləri sağılıb gedir,

Qurumlar, bloklar dağılıb gedir,

Olub qismətimiz bizlərin şit ər.

Gözəl Bayramova:

Kütlə bənzəmədi bu gün qoşuna,

Çox az adam çıxdı mitinq tuşuna,

Əgər buraxsaydıq onu boşuna,

Əli də kütlədən şikayət edər.

Nüşabə Sadıxlı:

Gözlərim su içmir tipin özündən,

Zəndi-zəhləm gedir "VİP"-in özündən,

Xeyir uzaqlaşıb "İP"-in özündən,

Bizə doğru sürət götürməkdə şər.

Gözəl Bayramova:

Yaxşı ki, "İP" qalıb bu günədək sağ,

Bundan heç baş açmaz nə falçı, nə maq,

Köhnə blokları söküb dağıtmaq,

Qurum yaratmalı yeni, təzə-tər.

Mirzə QƏRƏNFİL