Demokrat radikalı  yumşalmağa çağırır

Tofiq Yaqublu:

Biz addımımızı qısa ataraq,

Gedərik irəli, İsa ataraq,

Möhtəşəm mitinqə imza ataraq,

Sevinc bəxş edərik Qərbə, Şimala.

Araz Əlizadə:

Olur mitinqlərin kəskini, dinci,

Tapa bilməzsiniz burda dürr, inci.

Bəxş edəcəksiniz hansı sevinci,

Əli təsbehliyə, üzü şümala?!

Tofiq Yaqublu:

Deyirlər pul axar açsan krantı,

Bosslar verəcəkdi bizə qarantı,

Bizi cəlb eyləyir Qərbin qrantı,

Demədim söykəndik eşqə, amala.

Araz Əlizadə:

Getməyib burnundan yad payın buğu,

Hopub məsləkinə Qərbin buyruğu,

"İP"-in əlindədi xaric quyruğu,

Sizin əməliniz sığmır kamala.

Tofiq Yaqublu:

Bir sənin kimilər dodaq büzəcək,

Adımız xarici eldə gəzəcək,

Qərb öyüb bizləri, viski süzəcək,

Üstdən nuş edərik biz "Koko-Kola".

Araz Əlizadə:

Hətta kütləyə də qoymayın minnət,

Özünüz üçündür Qərbdəki cənnət,

Xalq da adınıza deyəcək lənət,

Sizin nüfuzunuz düşəcək dala.

Tofiq Yaqublu:

Bizə qrant verir xarici güclər,

Bu puldan imtina edər bir giclər,

Bizimlə olacaq mitinqdə gənclər,

Biz buna əminik, baxmışıq fala.

Araz Əlizadə:

Cəmiyyət içində qoymadınız iz,

Bir pis iş görməmiş yerə qoyun diz,

Utanıb, gənclərdən əl götürün siz,

Həm də adam olub bir gəlin yola.

Tofiq Yaqublu:

Nüfuz dairəniz çıxıbdı əldən,

Tez dönün özünüz müdhiş əməldən,

Vurub uçurarıq onu təməldən,

Çıxsa önümüzə alınmaz qala.

Araz Əlizadə:

Siz çiyrənmədiniz qaradan belə,

Bir vaxt da çıxdınız aradan belə,

Sizdən üz çevirib Yaradan belə,

Etina eyləməz miskin bir qula.

Tofiq Yaqublu:

Çox da dərinlərə soxmayıb bizi,

Aradan çıxarıb vaxtında bizi,

Boss da yaxşı duyub məqsədimizi,

İsalı, Əlili vurğunuq pula.

Araz Əlizadə:

"İP"-də lider yoxdu əzmkar, mətin,

İçində batarsan min əziyyətin,

Öyrəndikdən sonra tərgitmək çətin,

Böyük qəbahətdi alışmaq yala.

Tofiq Yaqublu:

Qərb hələ verməyib bizə qəm-qübar,

Deyib sərvəti ver, bol qrant apar,

Töküb önümüzə yetişmiş nə var,

Boss möhtac qoymayıb bizləri kala.

Araz Əlizadə:

Gözümə dəyirsən saralmış, ala,

Gah mıxa vurursan, gah da ki, nala,

Sən bu qabiliyyət, bu qanacaqla,

Salmısan özünü tikanlı kola.

Tofiq Yaqublu:

Olmaq istəməsən sağalmaz zökəm,

Sən Ayazdan ayrıl, bizlərə söykən,

Bossların yanında yerimiz möhkəm,

Qərb salmaz bizləri heç vaxt pis hala.

Araz Əlizadə:

Sizə hörmət edən yoxdu bölgədə,

Çatar camaatdan sizə sərt hədə,

Yoxdu dəstəkləyən sizi ölkədə,

Boss qazıb sizinçün dərin bir çala.

Tofiq Yaqublu:

"İP"-in ünvanına artsa "no, net"lər,

Biabır edərsə bizi qəzetlər,

Qiymətdən düşərsə təzə kasetlər,

Dərhal əl atarıq köhnəlmiş vala.

Araz Əlizadə:

Düz yola qayıdın, az qrant yığın,

Daxildəki şəri qazıyıb yıxın,

Dar məqamda belə xalqına sığın,

Xaric qarşısında az quyruq bula.

Tofiq Yaqublu:

Sərvətdən ölməyib gözümün qurdu,

Bol pula satardım həm "İP"-i, "Yurd"u,

Qərbin qrantı da gözümə nurdu,

Canımı verərdim narıncı çula.

Araz Əlizadə:

Hələ ki, sizlərlə iş görür sıcaq,

Pullar səngiyəndə, daralar qucaq,

Səndən yararlanıb boss da qaçacaq,

Həyan olmayacaq... ula ki, ula.

Tofiq Yaqublu:

Bizlər də coşarıq xaric coşanda,

Buynuz göstərərik, buynuz qoşanda,

Boss bizdən bezikib uzaqlaşanda,

Biz də cibimizə çəkərik mala.

Araz Əlizadə:

Boss sənə əbədi qaynatmaz qazan,

Sonda peşman olar yolunu azan,

Bir peşə öyrənib, namusla qazan,

Bir az da nəfsinə tət de, ay bala.

Mirzə QƏRƏNFİL