Müsavatda başqanlıq məsələsi təzələnir

Arzu Səmədbəyli:

Bu xəmir deyildir o xəmir, əsla,

Əsəb ətdi, deyil heç dəmir, əsla,

Nə Fuad, nə Qubad istəmir əsla,

Arif də, İsa da sədr olmasın.

Nüşabə Sadıqova:

Eybi yox, tərsinə çevrilməkdə taxt,

Hamınınmı gülür üzlərinə baxt?

Qərbin səxavətlə pul verdiyi vaxt,

Niyə İsa bəydən çətir olmasın?

Arzu Səmədbəyli:

Necə ki, Məcnuna can atır Leyli,

Yaman başqanlığa salıbdı meyli,

Arif də türmədə qalaraq xeyli,

Niyə kamerada fətir olmasın?

Nüşabə Sadıqova:

Sizdən başqan çıxmaz, xoruz banıdı,

Bossların hamısı onu tanıdı,

İsa Müsavatın veteranıdı,

Niyə ona hörmət-xətir olmasın?

Arzu Səmədbəyli:

Mən sədr olsaydım sevinərdim, ah,

Məni dəstəklərdi bu yerdə Pənah,

Özüm pis namizəd deyiləm, vallah,

Nədən də arzumdan ətir olmasın?

Nüşabə Sadıqova:

Namizəd aynada baxsın özünə,

Bunlar çıxaracaq bizi ağ günə?

Qayıdıb yenidən öz kürsüsünə,

İsa başqanlıqda bədr olmasın?

Arzu Səmədbəyli:

Köhnə işıqlansın qoz ekranında,

Çökübdü İsanın toz ekranında,

Adım Müsavatın boz ekranında,

Sədr ekranında titr olmasın?

Nüşabə Sadıqova:

20 il bəzədi masa ömrünü,

Bəzəyib partiya qısa ömrünü,

Çürüdüb Müsavat İsa ömrünü,

Uğuru heç bircə metr olmasın?

Arzu Səmədbəyli:

De, nədən köhnənin balta sapısı,

Qamarlayıb yesin bossun hapısın?

Açılıb üzümə sədr qapısı,

Ömrümdə bir yeni sətir olmasın?

Nüşabə Sadıqova:

Siz də salmadınız başqanı saya,

Bu bədbəxt etmədi əldə bir maya,

Salmayın İsanı sıxma-boğmaya,

Niyə təkrar, ötür-ötür olmasın?

Arzu Səmədbəyli:

Daim hörmət ilə çəkdim bu adı,

Yamsılaya bilər Məşdi İbadı,

Saxla siyahıda hələ Qubadı,

Niyə məni axtar-itir olmasın?

Nüşabə Sadıqova:

İsa gətiribdi 20 il ətmək,

Tələb qoyursunuz indi də getmək,

Olmaz gəlirlərə gözü bərəltmək,

Nədən qazanc olsun, itir olmasın?

Arzu Səmədbəyli:

Fəsillər dalınca getdi fəsillər,

Pislər sədr oldu, qaldı əsillər,

Əgər gəlirlərsə yeni nəsillər,

Nə üçün İsaya gedir olmasın?

Nüşabə Sadıqova:

Səni tərs axıdım bulanıq çayla,

Sən də kütlələrə təbəssüm payla,

İsa getsə nədən, lent yazısıyla,

Şəninə oxuyan Qədir olmasın?

Arzu Səmədbəyli:

Şər işdə tutulub hər bir bədiniz,

20 il ərzində onu yediniz,

İsaya həmişə "etdi" dediniz,

Niyə biz gənclərçün "edir" olmasın?

Nüşabə Sadıqova:

O özü vermişdi sizə yaxşı vəd,

Başqanın önünə çəkirsiniz sədd,

Nədən istərsiniz güdəsiz məqsəd?

İsaya da məqsəd güdür olmasın?

Arzu Səmədbəyli:

Gəl çox da incitmə sən biz fağırı,

Hələ qabaqdadı işin ağırı,

Töküb zəhləmizi İsa uğuru,

Uğurum gözünü didir olmasın?

Nüşabə Sadıqova:

Tutdunuz qulpundan sizlər asanın,

Oturub böyründə hazır qazanın,

Çəllək boşaltdınız, nədən İsanın,

İçdiyi viski bir litr olmasın?

Arzu Səmədbəyli:

Bizim ömrümüzdə bir başqan vardı,

Uğura aparır sözümün ardı,

İsa çox pulları dartıb apardı,

Apar-apar olsun, gətir olmasın?

Nüşabə Sadıqova:

Səsiniz də çıxmır həyat dibindən,

Siz çiyrənmədiniz murdar çibindən,

Pul almaq istərsən bossun cibindən,

İsaya qrantı götür olmasın?

Arzu Səmədbəyli:

İstərəm sədr olam iti sürətlə,

Qrantdan zövq alam kamal-qüdrətlə,

Haqqımda danışdın kin-küdurətlə,

Dedin itir olsun, bitir olmasın.

Nüşabə Sadıqova:

Bir zərbə olacaq hər çıxıb gedən,

Siz lider deyilsiz, quru bir bədən,

Sizdən başqan çıxmaz, Arzu, bəs nədən,

İsa kimisini yetir olmasın?

MİRZƏ QƏRƏNFİL